ތެލަށް ދޭ ސަބްސިޑީ ހުއްޓާލާ އިޔާދަ ކުރަނިވި ހަކަތައާ ދިމާއަށް މިސްރާބު ޖަހަންޖެހޭ ކަމަށް ސަލީމު ވިދާޅުވި
ހޯރަފުށީ ދާއިރާގެ މެމްބަރ އަހުމަދު ސަލީމު
އަންނަ އަހަރަކީ ދިވެހި ރާއްޖެއިން ސޯލަރއަށް އިންވެސްޓް ކޮށްގެން ދުނިޔެއަށް ނަމޫނާ ދައްކާ އަހަރަކަށް ހެދުމަށް ހޯރަފުށީ ދާއިރާގެ އެމްޑީޕީ މެމްބަރ އަދި އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީގެ މުގައްރިރު އަހުމަދު ސަލީމު އެދިވަޑައިގެންފި އެވެ.
ސަލީމު މިގޮތަށް އެދިވަޑައިގަތީ ސަލީމު ހުށަހެޅުއްވި ދުނިޔޭގެ މޫސުމަށް އަންނަ ބަދަލުތަކުގެ މައްސަލައަށް ހައްލެއް ނުލިބި އަދި މިބޮޑު ނުރައްކަލުން ދުނިޔެ ސަލާމަތްކުރުމަށް އޮތް ހަނި ފުރުސަތު ދުވަހެއް ދުވަހަކަށް ކުޑަވަމުންދާތީ އެކަމުގެ ކަންބޮޑުވުން ދުނިޔޭގެ ސަމާލުކަމަށް ގެނައުމަށް އެދި ހުށަހަޅާ ގަރާރަށް ފަހު ބަސް ވިދާޅު ވަމުންނެވެ. ސަލީމު ވިދާޅުވީ ތެލަށް ދޭ ސަބްސިޑީ ހުއްޓާލާ އިޔާދަ ކުރަނިވި ހަކަތައާ ދިމާއަށް މިސްރާބު ޖަހަން ޖެހޭކަމަށެވެ.
މިހިނގަމުންދާ އަހަރު ތެލުގެ އަގު ހެޔޮ ކުުރުމުގެ ގޮތުން ބިލައަނަކާ ގާތަށް ފައިސާ ހޭދަކުރާކަމަށް މެމްބަރ ސަލީމު ވިދާޅުވި އެވެ. ކުރިޔަށް އޮތް އަހަރަށް ހުށަހަޅާފައިވާ ބަޖެޓުގައިވެސް ކަންއޮތީ އެގޮތަށްކަން ފާހަގަ ކުރައްވާ ސަލީމު ވިދާޅުވީ މަޖިލީހުން ފާސްކުރާ ބަޖެޓުގައި އެގޮތަށް އެކަން އޮވެ ތެލަށް ދޭ ސަބްސިޑީ ހުއްޓާލުމަށް މިގަރާރުން ގޮވާލުމަކީ ކަންބޮޑުވެ ވަޑައިގަންނަވާ ކަމެއްކަމުގަ އެވެ. އެހެންކަމުން ބަޖެޓް ކޮމެޓީން ބަޖެޓް ދިރާސާކުރާއިރު އެކަމަށް ސަމާލުކަން ދެެއްވުމަށް ސަލީމު އެދިވަޑައިގެންނެވި އެވެ.
ސަލީމު ވިދާޅުވީ ތެލަށް ދީފައިވާ ސަބްސިޑީގެ ތެރެއިން 119 މިލިއަން ރުފިޔާ ދެހާހުން ދަށުގެ 143 ރަށަކަށް ދީގެން ކަރަންޓު ބިލު ކުޑަކުރެވިގެންދާނެ ކަމަށެވެ. އެއީ އެއިން ކޮންމެ ގެއެއްގެ ފުރާޅުގައި ތިން ކިލޯ ވޮޓުގެ ސޯލަރ ޕެނެލް ބަހައްޓައިގެން ކަމަށް ސަލީމު ވިދާޅުވި އެވެ. އޭރުން މަހެއްގެ މައްޗަށް މިހާރު ދައްކަމުންދާ ހާހަކަށް ވުރެ ބޮޑު ކަރަންޓު ބިލް 700 ރުފިޔާއަށް ތިރިކުރެވޭނެ ކަމަށް ސަލީމު ވިދާޅުވި އެވެ. ސަލީމު ވިދާޅުވީ މިއަދަދުތަކަކީ މިދާއިރާގެ ތަޖުރިބާ ކާރުންނާއެކުގައި ޖަހާފައިވާ ހިސާބުތަކަކުން ފެންނަ އަދަދު ކަމަށެވެ.
ސަލީމު ވިދާޅުވީ 119 މިލިއަން ރުފިޔާ އަކީ ކައުންސިލްތަކުން އިންޓެރެސްޓް ކުޑަކުރުމަށް ހުށަހަޅާ ފައިސާގެ ގޮތުގައި ހަމަޖެއްސިދާނެ ކަމަށެވެ. ސަލީމު ވިދާޅުވީ އިންޓަރެސްޓަކާއި ނުލާ ގޭގޭގައި ސޯލާރ ޕެނަލް ހަރުކުރުމަށްދަނީ 46،000 ރުފިޔާއަށް ކަމަށެވެ. އެހެންކަމުން މިމިސްރާބަށް ދާންނުޖެހޭ ސަބަބެއް އޮތް ކަމަށް ދެކިވަޑައިނުގަންނަވާ ކަމަށާއި މާލޭގައި ރަނގަޅު ފެންވަރެއްގައި ގްރިޑްގެ ހިދުމަތް މިހާރުވެސް ދެމުން ގެންދާކަން ސަލީމު ފާހަގަކުރެއްވި އެވެ.
މީގެއިތުރުން ސަލީމު ވިދާޅުވީ ދުނިޔޭގެ މޫސުމަށް އަންނަ ބަދަލުގެ މައްސަލާގައި ރާއްޖެއިން ކަންކުރާ ގޮތް ބަދަލުކުރަން ޖެހޭކަމަށެވެ. ކުލައިމެންޓް ކޮންފަރެންސްތަކަށް ގޮސް ކުރިމަތިވެގެން އުޅޭ މައްސަލަ ހާމަކުރުމުން ކޮންމެސް މަޝްރޫޢަކަށް ފައިސާ ލިބޭކަމަށާއި އެފައިސާއިން ކުލައިމެޓް އެޑަޕްޓޭޝަންގެ ނަމުގައި ކޮންމެސް މަޝްރޫޢެއް ހިންގަނީ ކަމަށާއި ނަމަވެސް ހަގީގީ މައްސަލައަކީ ޖައްވަށް ބޭރު ކުރާ ގްރީން ހައުސް ގޭސް ކަމަށް ސަލީމު ވިދާޅުވި އެވެ.
ސަލީމު ވިދާޅުވީ ދިވެހިރާއްޖޭގައި ކުލައިމެޓް އެމަރޖެންސީ އިއުލާން ކުރަންޖެހޭ ކަމަށާއި މި ގަރާރު މަޖިލީހުން ފާސްވެެއްޖެނަމަ އެކަން ކާމިޔާބު ވެގެންދާނެ ކަމަށެވެ. މިއަދުގެ ޖަލްސާގައިވަނީ މިގަރާރު މަޖިލީހަށް ބަލައިގަނެ އިތުރަށް ދިރާސާކުރުމަށް އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީ އަށް ފޮނުވާފައެވެ.
