ކ.ގުރައިދޫ ނަރުދަމާ ނިޒާމާއި ސްޓެލްކޯއިން ހަވާލުވެ ފެނުގެ ހިދުމަތްދޭ އިތުރު ޕްލާންޓެއް ގާއިމްކޮށްފި

ލޯކަލް ޓޫރިޒަމްގައި ކުރި އަރަމުން އަންނަ ކ. ގުރައިދޫގައި ގާއިމްކޮށްފައިވާ ނަރުދަމާ ނިޒާމަށް ސްޓެލްކޯއިން އިން ހަވާލުވެ، ފެނުގެ ހިދުމަތަށް އިތުރު ޕްލާންޓެއް ގާއިމްކޮށް ހިދުމަތްދޭން ފަށާފިއެވެ.

ގުރައިދޫ އިން ދެމުންގެންދާ ފެނުގެ ހިދުމަތްތައް އިތުރަށް ފުރިހަމަކުރުމަށްޓަކައި 100 ޓަނުގެ ޕްލާންޓެއް ގާއިމްކޮށް މިދިޔަ ހަފްތާގެ ތެރޭގައި ހިދުމަތްދޭން ފަށާފައިވީ ނަމަވެސް ރަސްމީކޮށް ހިދުމަތްދޭން ފެށީ ބުރާސްފަތި ދުވަހުއެވެ.

ނަރުދަމާ ނިޒާމާއި ފެނުގެ ހިދުމަތަށް ފުރިހަމަކަން ގެނައުމަށް ގާއިމްކުރި ޕްލާންޓް ރަސްމީކޮށް އިފްތިތާހު ކުރުމަށް ބުރާސްފަތި ދުވަހު ހަވީރު ގުރައިދޫގައި ބޭއްވި ހާއްސަ ރަސްމިއްޔާތުގައި ނޫސްވެރިންނާ ވާހަކަ ދައްކަވަމުން ސްޓެލްކޯގެ މެނޭޖިން ޑިރެކްޓަރ ހަސަން މުގުނީ ވިދާޅުވީ، މީގެ ކުރިން ގުރައިދޫގައި ގާއިމް ކޮށްފައިވަނީ 30 ޓަނުގެ ދެ ޕްލާންޓް ކަމަށާއި އެ އަދަދަކީ ލޯކަލް ޓޫރިޒަމް އެ ރަށުގައި ފުޅާވެގެންދާއިރު ބޭނުންވާ ވަރަށް ވުރެއް މަދު މިންވަރެއް ކަމަށެވެ.

އިތުރަށް މުގުނީ ވިދާޅުވީ، ނަރުދަމާގެ ނިޒާމާއި ހަވާލުވިއިރު ދައުލަތުގެ ބަޖެޓުން މިދިޔަ އަންގާރަ ދުވަހު ބަޖެޓު ހަމަޖެހިފައިވާ ކަމަށް މައުލޫމާތު ދީފައިވާ ކަމަށާއި މަސައްކަތް ކުރިޔަށް ގެންދިޔުމަށް އަންގާފައިވާ ކަމަށެވެ. އިތުރަށް ވިދާޅުވީ އެރަށުގެ ނަރުދަމާ ނިޒާމުގައި ވަރަށް ގިނަ މައްސަލަތަކެއް އެބަހުރި ކަމަށާއި އިތުރަށް ފުޅާ ކޮށް ހަރުދަނާ ކުރުމަށް ހަތް މިލިއަން ރުފިޔާގެ ބަޖެޓެއް ދައުލަތުން ކަނޑައަޅާފައިވާ ކަމަށެވެ.

އެ ރަސްމިއްޔާތުގައި ވާހަކަ ދައްކަވަމުން ޝަރަފުވެރި މެހެމާން އަދި މަތިވެރި ދާއިރާގެ މެންބަރު ހަސަން ޒަރީރް ވިދާޅުވީ، ގުރައިދޫ އަކީ ލޯކަލް ޓޫރިޒަމްގައި ވެސް ނަމޫނާ ދައްކަމުންދާ ރަށެއް ކަމަށާއި އެރަށަށް އެންމެ ބޮޑަށް ދަތިވާ ހިދުމަތަކީ ފެނުގެ ހިދުމަތް ކަމަށެވެ. އެހެން ނަމަވެސް ސްޓެލްކޯގެ ސަބަބުން މިއަދު އެ ހިދުމަތަށް ވެސް ހައްލު ލިބިގެން ހިނގައްޖެ ކަމަށް އޭނާ ވިދާޅުވިއެވެ.

އިތުރަށް ޒަރީރު ވިދާޅުވީ ރައްޔިތުން އަބަދުވެސް އެދެމުން ދިޔައީ ލާމަރުކަޒީ އުސޫލުން އަތޮޅު ތަކާއި ރަށްތައް ހިންގުމަށް ކަމަށާއި މިއަދު ރާއްޖެ ކަޑައްތު ކުރަމުންދަނީ މީގެ ކުރިން ނުދެކޭ ފަދަ ތަރައްގީގެ ވަރަށް ބާރު ސްޕީޑެއްގައި ކަމަށެވެ.