9.95 މިލިޔަން ޑޮލަރު ހަރަދުކޮށްގެން 13 ރަށެއްގައި ސޯލާ ޑީސަލް ހައިބްރިޑް ޕަވާ ސިސްޓަމް ގާއިމްކުރަނީ
މަސައްކަތް އެއް އަހަރު ތެރޭ ނިންމަން ޖެހޭ
ސޯލާ ޑީސަލް ހައިބްރިޑް ޕަވާ ސިސްޓަމް ގާއިމްކުރުމުގެ އެއްބަސްވުމުގައި ސޮއި ކުރުމުގެ ރަސްމީއްޔާތުގެ ތެރެއިން
ރާއްޖޭގައި މީހުން ދިރިއުޅޭ ހުރިހާ ރަށެއްގައި ސޯލާ ޑީސަލް ހައިބްރިޑް ޕަވާ ސިސްޓަމް ގާއިމްކުރުމަށް ސަރުކާރުން ކުރިއަށް ގެންދާ ޕްރޮޖެކްޓްގެ ދަށުން ހދ. އަތޮޅުގެ މީހުން ދިރިއުޅޭ ހުރިހާ ރަށެއްގައި ސޯލާ ޑީސަލް ހައިބްރިޑް ޕަވާ ސިސްޓަމް ގާއިމްކުރުމުގެ އެއްބަސްވުމުގައި ސޮއިކޮށްފިއެވެ.
އެންވަޔަރަންމަންޓް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ އެންވަޔަރަންމަންޓް މިނިސްޓަރު ތާރިގް އިބްރާހީމެވެ. މި މަސައްކަތް ހަވާލުކުރި ޖަޕާންގެ ކުންފުންޏެއް ކަމަށްވާ ޗަންގ ޒޫ ޓްރީނާ ސޯލާރ އެނާޖީގެ ފަރާތުން ސޮއިކުރެއްވީ އެކުންފުނީގެ ޖެނެރަލް މެނޭޖަރު ފްރޭންކްއެވެ.
ޗަންގ ޒޫ ޓްރީނާ ސޯލާރ އެނާޖީއާ މި މ ަސައްކަތް ހަވާލު ކޮށްފައި ވަނީ 9.9 މިލިޔަން ޑޮލަރަށެވެ.
ޕްރޮޖެކްޓްގެ ދަށުން 2.27 މެގަވޮޓްގެ ސޯލަރ ޕަވަރ ޕްލާންޓް ގާއިމްކުރުމަށް ވަނީ ހަމަޖެހިފައެވެ. އަދި ގްރިޑް ސަޕޯޓިންއަށް 1.49 މެގަވޮޓް ގެ ބެޓެރީ ސްޓޯރޭޖް ސިސްޓަމް ގާއިމްކުރުމަށް ވަނީ ހަމަޖެހިފައެވެ.
ޕްރޮޖެކްޓަކީ ޔޫރަޕިއަން އިންވެސްޓްމެންޓް ބޭންކާއި އޭޑީބީ އިން ފަންޑުކޮށްގެން ކުރިއަށްގެންދާ ޕްރޮޖެކްޓެކެވެ. މި މަޝްރޫއު އެއް އަހަރުގެ ތެރޭގައި ނިންމަން ޖެހޭނެއެވެ. ޕްރޮޖެކްޓުގެ ދަށުން 14 ޖެނެރޭޓަރު ސަޕްލައިކޮށް އިންސްޓޯލް ކުރެވޭނެއެވެ. އަދި ގްރިޑް އަޕް ގްރޭޑް ކުރުމުގެ ގޮތުން 47.35 ކިލޯމީޓަރުގެ ކޭބަލް އެޅުމަށް ހަމަޖެހިފައިވާ ކަމަށް އެންވަޔަރަންމަންޓް މިނިސްޓްރީން ބުނެއެވެ.
މީގެ އިތުރުން އިތުރުން 12 އޮޓޮމެޓިކް ޖެނެރޭޓަރު ކޮންޓްރޯލް ޕެނަލް އާއި 425 ޑިސްޓްރިބިއުޝަން ފޮށި ބެހެއްޓިގެންދާނެ ކަމަށާއި މަޝްރޫއު ނިމުމުން ޖައްވަން ބޭރުވާ ކާރބަންޑައިއޮކްސައިޑްގެ މިންވަރު ގާތްގަނޑަކަށް އަހަރަކު 2278 ޓަނު މަދުވެގެންދާނެ ކަމަށް ވެސް އެންވަޔަރަންމަންޓް މިނިސްޓްރީން ބުނެއެވެ.
