މާސް އިންސްޕެކްޝަންގައި އުސޫލުތަކާ ތަކުރާރުކޮށް ޚިލާފުވުމުން 37 ތަނަކަށް ރެޑް ނޯޓިސްދީފި
މާސް އިންސްޕެކްޝަންގައި 568 ތަނެއް ވަނީ ބަލާފައި
މާލޭގެ ކެފޭއެއް
އެޗްޕީއޭއާއި ކަމާބެހޭ ފަރާތްތަކުން އެންމެ ފަހުން ކުރިއަށްގެންދިޔަ މާސް އިންސްޕެކްޝަންތަކުގައި މާލެ ސަރަހައްދުގައި އާންމު ހިދުމަތް ދޭ ތަންތަނުގެ ތެރެއިން އެޗްޕީއޭގެ އުސޫލުތަކާ ޚިލާފަށް ޚިދުމަތް ދެމުންދަނިކޮށް އެކަން ރަނގަޅުކުރަން އަންގާ ރަނގަޅު ނުކުރުމުން 37 ތަނަކަށް ރެޑް ނޯޓިސް ދީފިއެވެ.
ހެލްތް އިމަޖެންސީ އޮޕަރޭޝަން ސެންޓަރ، އެޗްއީއޯސީގެ ނޫސްވެރިންގެ ބައްދަލުވުމުގައި އެންމެ ފަހުގެ އިންސްޕެކްޝަންގެ ތަފްސީލް ހިއްސާކުރައްވަމުން، އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ ހުސައިން ޒާމިރު ވިދާޅުވީ މިފަހަރުގެ އިންސްޕެކްޝަންގައި މިހާތަނަށް 568 ތަނެއް ބަލާފައިވާއިރު، މި އިންސްޕެކްޝަން ކުރިއަށްގެންދިޔައީ މާލެ ސަރަހައްދު 7 ބަޔަކަށް ބަހާލައިގެންކަމަށެވެ. ޑެޕިއުޓީ މިނިސްޓަރ ޒާމިރު ވަނީ، މިހާތަނަށް އައައިރު ކާބޯތަކެތީގެ ހިދުމަތް ދޭ 198 ތަނާއި، ޖިމްތަކާއި ފިޓްނަސް ސެންޓަރުގެ ކެޓަގަރީގެ 12 ތަނަކާއި، 4 މާރުކޭޓް، 10 ސެލޫން، 344 ފިހާރަ އިންސްޕެކްޓްކޮށްފައިވާކަމަށް ވިދާޅުވެފައެވެ. ކޮވިޑްގެ ބަލިމަޑުކަން ކޮންޓްރޯލްކުރުމަށް އަޅާ ފިޔަވަޅަުތައް އެންމެ ރަނގަޅުގޮތުގައި އެކަށައަޅާތޯ ބެލުމަށް ގިނަ އިންސްޕެކްޝަންތައް ކުރިއަށްގެންގޮސްފައިވާކަން ފާހަގަކުރައްވާ ޑެޕިއުޓީ މިނިސްޓަރ ވަނީ، އިންސްޕެކްޝަންގެ ނަތީޖާ އެންމެ އެދެވޭގޮތައް ނުފެންނަކަމަށް ވިދާޅުވެފައެވެ. އެހެންންނަމަވެސް، ޖުމުލަކޮށް، ގިނަ ފަރާތްތަކުން އިންސްޕެކްޝަނަށް ވަރަށް ބޮޑަށް އެއްބާރުލުންދީ، ކަންކަން ރަނގަޅުކުރަން ބޭނުންވާކަން ފާހަގަކުރެވުމުން، އެކަމާ އުފާކުރައްވާކަމަށް ވެސް ވިދާޅުވިއެވެ. ޑެޕިއުޓީ މިނިސްޓަރ ޒާމިރު ވަނީ މި އިންސްޕެކްޝަންގައި ޤަވައިދާ ޚިލާފުވި ފަރާތްތަކަށް އެޅި ފިޔަވަޅުގެ ތަފްސީލު ވެސް ހިއްސާކޮށްފައެވެ. އެގޮތުން މި އިންސްޕެކްޝަންގައި ގައިޑްލައިންތަކާ އެއްގޮތަށް ވިޔަފާރިކުރާ ކަމަށް 243 ތަނަކަށް ސްޓިކާ ދީފައިވާއިރު، ފުރަތަމަ އިންސްޕެކްޝަނުގައި ރަނގަޅުކުރަން ޖެހޭ ކަންތައްތަކެއް ފާހަގަވެގެން 288 ތަނަކަށް ވަނީ ވައިޓް ނޯޓިސް ދީފައެވެ. އަދި ވައިޓް ނޯޓިސްގައި ރަނގަޅުކުރަން ބުނާ ކަންކަން ރަނގަޅު ނުކޮށްގެން 37 ތަނަކަށް ރެޑް ނޯޓިސް ދިން ކަމަށް ޒާމިރު ވިދާޅުވިއެވެ. މި އިންސްޕެކްޝަންގައި މިހާތަނަށް އައިރު އެއްވެސް ތަނެއް ޖޫރިމަނާކޮށްފައެއް ނުވެއެވެ.
އެޗްޕީއޭއިން އާންމުކޮށްފައިވާ ޖޫރިމަނާކުރާ އުސޫލުގައި ވާގޮތުން ފުރަތަމަ ފަހަރަށް ނަމަ ޖޫރިމަނާކުރަނީ 5000 ރުފިޔާއިންނެވެ. އަދި ދެވަނަ ފަހަރު ނަމަ 25،000 ރުފިޔާއިން ޖޫރިމަނާ ކުރެވޭއިރު، އެންގުމާ ޚިލާފުވެ ކަންކަން ރަނގަޅު ނުކުރާނަމަ، ތިންވަނަ ފަހަރަށް 50،000 ރުފިޔާއިން ޖޫރިމަނާކުރާނެއެެވެ. ހަތަރުވަނަ ފަހަރުގެ ޖޫރިމަނާއަކީ 75،000 ރުފިޔާއެވެ. ފަސްވަނަ ފަހަރު ޖޫރިމަނާ ކުރާނީ އެއްލައްކަ ރުފިޔާއިންނެވެ.
ޢާއްމު ޚިދުމަތްދޭ ތަންތަން ބަލައި ފާސްކޮށް އެޗްޕީއޭގެ މިންގަނޑުތަކަށް ފެތޭގޮތަށް ހުރިތޯ ބެލުމަށް ކުރިއަށްގެންދިޔަ ހަތަރުވަނަ ބުރުގައި މިދިޔަ އަހަރުގެ އޮކްޓޯބަރު މަހުގެތެރޭގައި ވަނީ ތިންހާހަށްވުރެ ގިނަ ތަންތަން ބަލައި ފާސްކޮށްފައެވެ. މި އިންސްޕެކްޝަންގެ ތެރެއިން ސަތޭކައަށްވުރެ ގިނަ ތަންތަންވަނީ މިންގަނޑަށް ނުފެތޭތީ ބަންދު ވެސް ކޮށްފައެވެ. ކޮވިޑް-19ގެ ކޭސްތައް މަދުކުރުމުގައި ޢާއްމު ޚިދުމަތްދޭ އެކި ތަންތަން ބަލައިފާސްކުރުމަށް ކުރިއަށްގެންދާ މާސް އިންސްޕެކްޝަންތަކުގެ ދައުރު ބޮޑުކަމަށް އެޗްއީއޯސީން ފާހަގަކުރައްވައެވެ. މިގޮތަށް ބަލާއިރު ޚިދުމަތްދޭ ތަންތަނުގައި ގައިދުރުކަން ކަށަވަރުކުރެވޭނެ ގޮތަށް އިންތިޒާމުކޮށްފައި ހުރިތޯ އާއި މާސްކު ބޭނުންކުރުމަށް ބާރު އަޅާމިންވަރާއި އަތްދޮވުމާއި ހޭންޑް ސެނިޓައިޒާ ބޭނުންކުރެވޭނެ އިންތިޒާމުތައް ހަމަޖެހިފައިވާ ގޮތް އަންނަނީ ބަލަމުންނެވެ. މީގެ އިތުރުން އެއްފަހަރާ ޚިދުމަތްދިނުމަށް ކަނޑައަޅާ މިންވަރާއި އެއަށް ޢަމަލުކުރާ މިންވަރު ވެސް އަންނަނީ ބަލަމުންނެވެ.
