ގިނަ އަދަދެއްގެ ލަކުޑި ކަނޑަށްއެޅި އޮޔާދާތީ އެކަމަށް ސަމާލުވުމަށް އެމްއެންޑީއެފުން އިލްތިމާސްކޮށްފި
މުދާ އުފުލާ އެދޯނި އަރާފައި ވަނީ ކ، ކާށިދޫ ނެރުމައްޗަށް
އެމްއެންޑީއެފްގެ ކޯސްޓްގާޑުގެ އުޅަނދެއް --
މުދާ އުފުލާ ދޯންޏެއް ފަރަށް އެރުމުގެ ސަބަބުން އެދޯނިން ކަނޑަށްއެޅިފައިވާ ލަކުޑިތައް އޮޔާ ދާތީ، އެކަމަށް ކަނޑުދަތުރުކުރާ ފަރާތްތަކުން ސަމާލު ވުމަށް އެމްއެންޑީއެފުން އިލްތިމާސްކޮށްފިއެވެ.
އެމްއެންޑީއެފްގެ އިންފޮމޭޝަން އޮފިސަރ މޭޖަރ އަދުނާނު މުހައްމަދު ބުރާސްފަތު ދުވަހު "ރާއްޖެއެމްވީ"އަށް މައުލޫމާތު ދެމުން ވިދާޅުވީ ކ.ކާށިދޫ ނެރުމަށްޗަށް އެރި މުދާއުފުލާ ދޯންޏަކުން ގިނަ އަދަދެއްގެ ލަކުޑި ކަނޑަށް އެޅިފައިވާ ކަމަށެވެ.
އަދުނާނު ވިދާޅުވީ އެ ލަކުޑިތައް ބ.އަތޮޅާއި ދިމާލަށް އޮޔާދާތީ އެ ސަރަހައްދުން ދަތުރުކުރައްވާ ފަރާތްތަކުން މިކަމަށް ސަމާލުކަންދިނުމަށް އިލްތިމާސްކުރާ ކަމަށެވެ. އަދި ހާއްސަ ގޮތެއްގައި ރޭގަނޑު ދަތުރުކުރައްވާ ފަރާތްތަކުން މިކަމަށް ހާއްސަ ސަމާލުކަމެއް ދެއްވުމަށް އެދޭ ކަމަށް ވެސް އެމްއެންޑީއެފުން ބުނެއެވެ.
އަދުނާނު ވިދާޅުވީ ކާށިދޫ ނެރުމައްޗަށް އެ ދޯނި އަރާފައިވަނީ ބުދަ ދުވަހުގެ ރޭގެ ވަގުތެއްގަ ކަމަށާއި ހަމަ އެ ރޭ އެ ދޯނި ފުންކޮށްފައިވާ ކަމަށެވެ.
އަދުނާނު ވިދާޅުވީ އެދޯނިން ދަތުރުކުރި އެއްވެސް މީހަކަށް ގެއްލުމެއް ލިބިފައިނުވާ ކަމަށެވެ.
