ޔާމީން ރަޝީދުގެ މަރުގެ ތަހުގީގު ފުޅާދާއިރާއެއްގައި ދަނީ ކުރެވެމުން
ޔާމީންގެ މަރާގުޅިގެން މީޑިއާއަށް މައުލޫމާތު ދިނުމަށް ފުލުހުން ބޭއްވި ޕްރެސް
ޔާމީން ރަޝީދުގެ މަރުގެ ތަހުގީގަށް ހުރަސްއެޅިދާނެފަދަ މައުލޫމާތު އާއްމު ނުކުރުމަށް މީޑިއާތަކަށް ފުލުހުން އިލްތިމާސްކޮށްފިއެވެ.
ފުލުހުން ބުނީ ޔާމީން ރަޝީދުގެ މަރުގެ ތަހުގީގު ފުޅާދާއިރާއެއްގައި ކުރެވެމުންދާއިރު، މި ނާޒުކު ވަގުތުގައި، އެ ހާދިސާއާއި، ގުޅޭގޮތުން އެކިއެކި ޚިޔާލުތަކުގެ މައްޗަށް ބިނާކޮށް ޚަބަރާއި މައުލޫމާތު މީޑިއާގެ ފަރާތްތަކުން ރައްޔިތުންނާއި ހިއްސާކުރުމުން މައްސަލައިގެ ތަހުގީގަށް ހުރަސްއެޅި، ކުރެވެމުންދާ މަސައްކަތުގެ ނަތީޖާއަށް އަސަރުކުރާނެކަމަށް ގަބޫލުކުރެވޭކަމަށެވެ.
އެހެންކަމުން މިފަދަ މައުލޫމާތު ހިމެނޭ ޚަބަރާއި ވީޑިއޯ އަދި ތަސްވީރު، މީޑިއާތަކުން ހިއްސާ ނުކުރުމަށް އިލްތިމާސްކުރާކަމަށް ފުލުހުން ބުންޏެވެ.
ފުލުހުން މިހެން ބުނެފައިވާއިރު، ތަހުގީގައް ހުރަސް އެޅެނީ ކޮންކަހަލަ މައުލޫމާތެއް ހާމަކޮށްގެން ކަމެއް ސާފުކޮށްދީފައެއް ނުވެއެވެ.
ބްލޮގަރ ޔާމީން ރަޝީދު މަރާލި މައްސަލައިގައި ތުހުމަތުކުރެވޭ ދެމީހެއްގެ ފޮޓޯ އާއްމުކޮށް އެދެމީހުންނާއި ގުޅޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ އެކަން ފުލުހުންނަށް އެންގުމަށް ފުލުހުން ވަނީ އެދިފައެވެ.
ތޫނު އެއްޗަކުން ހަމަލާދީ ޔާމީން ރަޝީދު މަރާލާފައި އޮއްވާ ފެނުނީ އޭނާ ދިރިއުޅުނު މ. ސްޕެޓިއުލާގޭގެ ސިޑިކައިރިން މި ދިޔަ ހޮނިހިރު ދުވަހުގެ ރޭގައެވެ.
