ރާއްޖޭގައި ދާޚިލީ ހަމަޖެހުން އޮތުން އިންޑިއާއަށް މުހިއްމުވާނެކަން ޔަޤީން، އިންޑިއާއިން ދިވެހިންނަށް ހެޔޮއެދޭނެ: އިދިކޮޅު
21 ފެބުރުއަރީ 2021 | އާދީއްތަ 14:09އިންޑިއާގެ އެކްސްޓަރނަލް އެފެއާޒް މިނިސްޓަރާއި ބައްދަލު ކުރެއްވި
އިދިކޮޅު ކޯލިޝަނުން އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ ޖައިޝަންކަރއާއި ބައްދަލު ކުރެއްވުން
ރާއްޖޭގައި ދާޚިލީ ހަމަޖެހުން އޮތުން އިންޑިއާއަށް މުހިންމުވާނެކަން ޔަޤީންވާ ކަމަށާއި، އިންޑިއާއަކީ ދިވެހި ރައްޔިތުންގެ ލާބައާއި މަންފާއަށް އިސްކަންދޭނެ ޤައުމެއްކަމަށް އިދިކޮޅު ކޯލިޝަނުން ބުނެފިއެވެ.
އިދިކޮޅުން އެހެން ބުނެފައިވަނީ އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ ސުބަރްމަނިޔަމް ޖައިޝަންކަރއާއި ބައްދަލު ކުރެއްވުމަށްފަހު، އާންމުކުރި ބަޔާނެއްގައެވެ. އެގޮތުން އިދިކޮޅުން ވަނީ ރާއްޖޭގައި ދާޚިލީ ހަމަޖެހުން ޤާއިމު ކުރުމާއި، ސަރުކާރަށް ފާރަވެރިވެ، ޑިމޮކްރަސީގެ އުސޫލުތައް ދެމެހެއްޓުމަށް ސަރުކާރަށް ބާރު އެޅުމަށް އިންޑިއާގެ ކިބައިން އެދިފައެވެ.
މި ބައްދަލު ކުރެއްވުމުގައި ޕީއެންސީގެ ރައީސް އަބްދުއްރަޙީމް އަބްދުﷲ ގެ އިތުރުން، ދެޕާޓީގެ ނައިބުރައީސުންނާއި، ކޯލިޝަންގެ ސްޕެޝަލް އެޑްވައިޒަރުން ކަމަށްވާ ޑރ މުޙައްމަދު ޖަމީލްއާއި ޑރ މުޙައްމަދު ވަޙީދު ޙަސަން މަނިކު ބައިވެރިވެވަޑައިގެންނެވިއެވެ. އަދި އިދިކޮޅު ލީޑަރު އަބްދުﷲ ޔާމީން މިނިވަން ކުރުމާއި، ކުރިއަށް އޮތް ކައުންސިލް އިންތިޚާބާ ގުޅޭގޮތުންވެސް އިދިކޮޅުން ވަނީ ޑރ ޖައިޝަންކަރާއި މަޝްވަރާ ކުރައްވާފައެވެ.
ރާއްޖޭގެ ދާޚިލީ ކަންކަމާއި ސިޔާސީ ހަމަޖެހުމަށް އިންޑިއާގެ އެހީތެރިކަަމަށް އިދިކޮޅުން އެދިފައިވާއިރު، ދިވެހިރާއްޖޭގެ ދާޚިލީ ކަންކަމަށް ބޭރުގެ ފަރާތްތަކުން ފާޑުނުކިޔުމަށް ކުރީގެ ރައީސް އަބްދުﷲ ޔާމީން ވަނީ އެމަނިކުފާނުގެ ސަރުކާރުގައި އެތައް ފަހަރެއްގެ މަތިން ގޮވާލައްވާފައެވެ. އަދި އިދިކޮޅުންވެސް ދާދި މިދާކަށް ދުވަހާއި ޖެހެންދެން ގެންދެވީ އެމޭރުމުން ވާހަކަތައް ބައްޓަން ކުރަމުންނެވެ. އެހެންނަމަވެސް، ޑރ ޖައިޝަންކަރްއާއި ބައްދަލު ކުރެއްވުމަށްފަހު، އިދިކޮޅުން ދައްކަމުން ގެންދާ ވާހަކަތައް މުޅިން ތަފާތެވެ.
