އޮސްޓްރޭލިއަން އޯޕަން: ޖޮކޮވިޗް ތަށި ދިފާޢުކޮށްފި

އޮސްޓްރޭލިއަން އޯޕަން ޓެނިސް މުބާރާތުގެ ފިރިހެން ސިންގަލްސްގެ ތަށި ސާބިއާގެ ނޯވަކް ޖޮކޮވިޗް ދިފާޢުކޮށްފިއެވެ.

މިދިޔަ އަހަރުގެ ޗެމްޕިއަންކަންވެސް ހޯދި ޖޮކޮވިޗް މި އަހަރުގެ މުބާރާތް ކާމިޔާބުކުރީ އާދީއްތަ ދުވަހު ކުޅުނު ފައިނަލް މެޗުގައި ދުނިޔޭގެ ރޭންކިންގެ ހަތަރުވަނައިގައި އޮތް ރަޝިއާގެ ޑެނީލް މެޑްވެޑޭވް އަތުން ސީދާ ތިން ސެޓުން މޮޅުވެގެންނެވެ. މި މެޗުގެ ސެޓުތައް ޖޮކޮވިޗް ގެންދިޔައީ 7-5، 6-2 އަދި 6-2 ންނެވެ.

މިއީ އުމުރުން 33 އަހަރުގެ ޖޮކޮވިޗް އޮސްޓްރޭލިއަން އޯޕަން ޓެނިސް މުބާރާތް ކާމިޔާބުކުރި ނުވަވަނަ ފަހަރެވެ. އަދި މިއީ ދުނިޔޭގެ ރޭންކިންގެ އެއްވަނައިގައި އޮތް ޖޮކޮވިޗް ކާމިޔާބުކުރި 18 ވަނަ ގްރޭންޑް ސްލޭމް މުބާރާތެވެ.

އާދީއްތަ ދުވަހު ކުޅުނު ފައިނަލް މެޗުން އުމުރުން 25 އަހަރުގެ މެޑްވޭވް ބަލިވިއިރު، މިހާތަނަށް ކުޅުނު ގްރޭންޑް ސްލޭމް ދެ ފައިނަލުންވެސް އޭނާ ވަނީ ބަލިވެފައެވެ. އެކަމަކު މެޑްވޭވް ވަނީ މި މުބާރާތުގެ ފައިނަލް މެޗުގެ ކުރިން، މެޗަކުން ބަލިނުވެ 20 މެޗު ހަމަކޮށްފައެވެ.

މި އަހަރުގެ އޮސްޓްރޭލިއަން އޯޕަންގެ ފިރިހެން ސިންގަލްސްގެ ޗެމްޕިއަންކަން ޖޮކޮވިޗް ހޯދިއިރު، އަންހެން ސިންގަލްސްގެ ޗެމްޕިއަންކަން ހޯދާފައިވަނީ ޖަޕާނުގެ ނައޯމީ އޮސާކާއެވެ.