ޒައިދުލް އަމީންގެ ޝަރީޢަތް މާދަމާރެއަށް ތާވަލްކޮށްފި
ޒައިދުގެ މައްޗަށް ތިން ދައުވާއެއް އުފުލާފަވޭ
ޒައިދުލް އަމީން ރައީސް މައުމޫން އަރިހުގައި
ފަނޑިޔާރަކު ބްލެކްމެއިލް ކުރިމަކުގެ ތުހުމަތުގައި ހައްޔަރުކުރި މާލޭ ސިޓީކައުންސިލްގެ މެމްބަރު ޒައިދުލް އަމީނުގެ މައްޗަށް ދައުލަތުން އުފުލާފައިވާ ތިން ދައުވާގެ ޝަރީޢަތް އަންގާރަ ދުވަހުގެ ރެ އަށް ކްރިމިނަލް ކޯޓުގައި ތާވަލް ކޮށްފިއެވެ.
ރާއްޖެއެމްވީ އަށް މައުލޫމާތު ދެއްވަމުން ޒައިދުލް އަމީންގެ ގާނޫނީ ވަކީލް މަހުފޫޒް ސައީދު ވިދާޅުވީ ޒައިދުގެ ޝަރީޢަތް ތާވަލް ކޮށްފައި ވަނީ އަންގާރަ ދުވަހުގެ ރޭ 8:00 އަށް ކަމަށެވެ. މަހުފޫޒް ވިދާޅުވީ އެ މައްސަލައިގައި އެންމެ ފަހުން ބޭއްވި ޝަރީޢަތުގެ މަޖިލީހުގައި ދައުލަތުން ޒަިއދުގެ މައްޗަށް އުފުލާފައިވާ ތިން ދައުވާ އަށް ވެސް ޒައިދު އިންކާރު ކޮށްފައިވާ ކަމަށެވެ.
އެންމެ ފަހުން ބޭއްވި ޝަރީޢަތުގައި ދައުލަތުން އެދުނީ ޝަރީޢަތް ނިމެންދެން ހޯމްމިނިސްޓްރީން ކަނޑައަޅާ ތަނެއްގައި ޒައިދުލް އަމީން ބެހެއްޓުމަށެވެ. އަދި ދައުލަތުން އެދުނު ގޮތަށް އެ މައްސަލަ ބައްލަވާ ފަނޑިޔާރު އަހުމަދު ޝަކީލް ވަނީ އެގޮތަށް އަމުރު ނެރުއްވާފައެވެ.
ޒައިދުގެ މައްޗަށް ކުރަނީ ގާނޫނީ ބާރު ހިންގުމަށް ދަތިކުރުމަށް މަސައްކަތް ކުރުމާއި، ހުއްދަ ނޫން ގޮތުގައި މައުލޫމާތު ހޯދުމާއި ހުއްދަ ނޫންގޮތުގައި މައުލޫމާތު ހާމަކުރުމަށް މަސައްކަތް ކުރުމުގެ ދައުވާއެވެ.
ޒައިދު ހައްޔަރުކޮށްފައި ވަނީ މި އަހަރުގެ ޖެނުއަރީ މަހުއެވެ. އޭގެ ފަހުން 16 ފަހަރު މުއްދަތު ޖެހުމަށްފަހު ޒައިދު މިހާރު ހުންނެވީ ފުލުހުންގެ ބެލުމުގެ ދަށުގައެވެ.
ޒައިދަކީ ދެކަފިވެފައިވާ ޕީޕީއެމް ރައީސް މައުމޫނު ފެކްޝަނަށް ނިސްވަތްވާ ރައީސް މައުމޫނުގެ ސަޕޯޓަރެކެވެ.
