ޓެރަރިޒަމްގެ ކުށް ސާބިތުކޮށް 12 އަހަރަށް ޖަލަށްލާފައި ހުންނެވި އަދާލަތު ޕާޓީގެ ރައީސް ޝެއިހު އިމްރާނު އަބްދުﷲ ގެ އިސްތިއުނާފްގެ މައްސަލައިގެ ޝަރީއަތް 10 މަސް ފަހުން ބުދަ ދުވަހަށް ތާވަލްކޮށްފި އެވެ.

ޝެއިޚް އިމްރާނުގެ ވަކީލު އަލީ ޒާހިރު ކުރެއްވި ޓްވީޓެއްގައި ވިދާޅުވެފައިވަނީ، ޝައިޚް އިމްރާނުގެ މައްޗަށް ހައިކޯޓުގައި ހިންގާ ޝަރީއަތް ބުދަ ދުވަހުގެ ހެނދުނު 10:15 ގައި ބޭއްވުމަށް ތާވަލްކޮށްފައިވާ ކަމަށެވެ.

ޓެރަރިޒަމްގެ ކުށް ސާބިތުވި ކަމަށް ކަނޑައަޅައި އިމްރާނު 12 އަހަރަށް ޖަލަށް ލުމަށް ހުކުމްކޮށްފައިވަނީ 2016 ވަނަ އަހަރުގެ ފެބްރުއަރީ މަހު އެވެ.

އޭނާގެ މައްޗަށް މިގޮތަށް ހުކުމްކޮށްފައި ވަނީ، 2015 ވަނަ އަހަރުގެ މެއި މަހު ބޭއްވި އެއްވުމުގައި ހަމަނުޖެހުމަށް ހިއްވަރު ލިބޭ ގޮތަށް ވާހަކަދެއްކި މައްސަލައާ ގުޅިގެންނެވެ.

މި މައްސަލައިގެ އިސްތިއުނާފު އަޑުއެހުމަށް ބާއްވަން ބުދަ ދުވަހަށް ތާވަލްކޮށްފައިވާ އިރު އެއީ ޝަރީއަތުގެ އެންމެ ފަހު އަޑުއެހުމެވެ.

އިމްރާނަށް ޖަލު ހުކުމެއް އައިސްފައިވާ އިރު ޖަލުގެ މަރާމަތަކަށް ކަމަށް ބުނެ މިދިޔަ އަހަރު އޭނާ ވަނީ ގޭބަންދަށް ބަދަލުކޮށްފަ އެވެ.