ބްލެކްމެއިލް ކުރިކަމަށް ބުނާ މައްސަލާގައި ފުލުހުންގެ ހައްޔަރުގައިހުރި މާލެ ސިޓީ ކައުންސިލްގެ މެމްބަރު ޒައިދުލް އަމީންގެ ބަންދަށް 10 ދުވަސް އިތުރުކޮށްފިއެވެ.

ޒައިދުލް އަމީން ނިސްބަތްވާ ޕީޕީއެމްގެ ރައީސް މައުމޫން ފެކްޝަނުންގެ ނައިބު ލީޑަރު އާމިނަތު ނާދިރާ ވިދާޅުވީ ޒައިދު މި ފެބުރުއަރީ މަހުގެ 2 ވަނަ ދުވަހު ގޭބަންދަށް ބަދަލުކޮށްފައި ބެހެއްޓުމަށްފަހު، އާދިއްތަ ދުވަހު ކޯޓަށް ހާޒިރުކޮށް 10 ދުވަސް ޖަހާފައިވާކަމަށެވެ. އަދި އެ ދިހަ ދުވަހު ފުލުހުން ބޭނުން ތަނެއްގައި ބެހެއްޓުމަށް އަމުރުކޮށްފައިވާކަމަށެވެ.

ނާދިރާ ވިދާޅުވީ ޒައިދުލް އަމީން މިވަގުތު ބަހައްޓާފައި ހުރީ ގޭގައިކަމަށެވެ. އަދި ކޯޓު އަމުރެއްގެ ދަށުން އޭނާގެ ޕާސްޕޯޓް ވެސް ވަނީ ހިފަހައްޓާފައިކަމަށް ނާދިރާ ވިދާޅުވިއެވެ.

މިކަމާ ގުޅޭގޮތުން ފުލުހުންގެ ބަހެއް ލިބޭގޮތް ވަނީ ނުވެފަ އެވެ.

ފުލުހުން ޒައިދުން އަމީން ހައްޔަރުކޮށްފައިވަނީ މިދިއަ ޖެނުއަރީ މަހުގެ 12 ވަނަ ދުވަހު އެވެ. ޖެހިގެންއައި 13 ވަނަ ދުވަހު ކްރިމިނަލް ކޯޓުން ވަނީ ފުލުހުންގެ ބަންދުގައި ބަހައްޓައިގެން ތަހުގީގު ކުރުމަށް 15 ދުވަހުގެ މުއްދަތެއް ޖަހައިފަ އެވެ. އަދި އޭގެފަހުން ޖެނުއަރީ 28 ވަނަ ދުވަހު ދެވަނަ ފަހަރަށް ޒައިދުލް އަމީންގެ ބަންދަށް 15 ދުވަސްޖަހާފައި ވެއެވެ. އޭނާ ގޭބަންދަށް ބަދަލުކުރީ މި މަހުގެ 2 ވަނަ ދުވަހުއެވެ.

ބްލެކްމެއިލްކުރި ކަމަށް ބުނާ މައްސަލައެއްގައި ޒައިދުލް އަމީންގެ ހައްޔަރުކޮށްފައިވީ ނަމަވެސް އެ މައްސަލައިގެ ތަފްސީލެއް ލިބިފައެއް ނުވެއެވެ. އަދި ފުލުހުންގެ އިދާރާއިންވެސް އެކަމުގެ މައުލޫމާތު ހާމައެއް ނުކުރެ އެވެ.

ޒައިދުލް އަމީނަކީ މާލޭ ސިޓީ ކައުންސިލްގެ ހުޅުހެންވޭރު ދާއިރާގެ މެމްބަރެވެ. އޭގެ އިތުރުން ޒައިދުއަކީ ޕީޕީއެމްގެ ރައީސް މައުމޫނު އަބްދުލްގައްޔޫމާ ވެސް ގާތްގުޅުމެއް އޮންނަ ބޭފުޅެކެވެ. ޕީޕީއެމް ދެ ފެކްޝަނަށް ބެހުނުއިރު، ޒައިދު ހުންނެވީ ރައީސް މައުމޫނުގެ ފެކްޝަންގަ އެވެ.