އިސްރާއީލްގައި ފައިޒަރ ވެކްސިންގެ ދެ ޑޯޒް ޖެހި މީހުންގެ ތެރޭގައި ކޮވިޑް-19ގެ އަލާމާތްތައް ފެންނަ މިންވަރު 94 އިންސައްތަ ދަށަށް ގޮސްފައިވާކަމަށް އެގައުމުގައި ކުރިޔަށް ގެންދިޔަ ދިރާސާއަކުން ދައްކައިފިއެވެ.
އިސްރާއީލުން ވަނީ ފައިޒަރ ވެކްސިންގެ ދެ ޑޯޒް އެގައުމުގެ 600،000 (ހަ ލައްކަ) މީހުންނަށް ދީފައެވެ. އަދި ވެކްސިން ޖެހި މީހުންނާއި އެނޫން މީހުންގެ މެދުގައި ހުރި ތަފާތުތަކާއި ވެކްސިނުން ކުރާ އަސަރާއި ގުޅޭގޮތުން އަންނަނީ ދިރާސާކުރަމުންނެވެ.
ހެލްތު މެއިންޓެނަންސް އޯގަނައިޒޭޝަން (އެޗްއެމްއޯ) އިން ވަނީ ދިރާސާކުރިޔަށް ގެންދިޔުމަށްޓަކައި އިސްރާއީލްގެ އާބާދީގެ ދެ ބައިކުޅަ އެއްބަޔަށްވުރެ ގިނަ މީހުން ދިރާސާގައި ބޭނުންކޮށްފައެވެ. އެގްރޫޕުން ބުނާގޮތުގައި ވެކްސިންގެ ދެ ޑޯޒް ހަމަކުރި މީހުން ކޮވިޑްގެ ސީރިއަސް ހާލަތަށް ދިޔުމުގެ ފުރުސަތު 92 އިންސައްތަ ދަށްކަމަށެވެ.
މިދިރާސާކުރުމުގައި އަޅާކިޔާފައިވަނީ ވެކްސިން ޖަހާފައި ތިބި މީހުންނާއި ވެކްސިން ނުޖަހާ މީހުންގެ ތެރެއިން ސިއްހީ ގޮތުން އެއް މައްސަލަތަކެއް ދިމާވެފައި ތިބި މީހުންގެ ދެމެދުއެވެ.
އެޗްއެމްއޯގެ ޗީފް އިނޮވޭޝަން އޮފިސަރ ރެން ބެލިސަރ ވިދާޅުވީ ދިރާސާއިން ދެއްކި ނަތީޖާއަކީ ފައިޒަރ ވެކްސިނުން ކުރާ އަސަރު ދެނެގަތުމަށް ކުރިޔަށް ގެންދިޔަ ކްލިނިކަލް ޓްރެއަލްގެ ނަތީޖާ ދެއްކި ގޮތަށް އެވެކްސިނަކީ ހަގީގަތުގައިވެސް ކާމިޔާބު ވެކްސިނެއް ކަމެވެ. އޭނާ އިތުރަށް ވިދާޅުވީ ފައިޒަރ ވެކްސިނުން އެންމެ ރަނގަޅަށް އަސަރުކުރަނީ ދެ ވަނަ ޑޯޒް ޖަހާތާ ދެ ހަފްތާ ނުވަތަ އެއަށްވުރެ ފަހުންކަމަށެވެ.
އިސްރާއީލަކީ އާބާދީގެ ނިސްބަތުން އެންމެ ގިނަ އަދަދެއްގެ މީހުންނަށް ވެކްސިން ދީފައިވާ ގައުމަށްވާއިރު އެންމެ ފުރަތަމަ ވެކްސިން ދިން އުމުރު ފުރައިގެ މީހުން ހޮސްޕިޓަލްތަކުގައި އެޑްމިޓްކުރާ މިންވަރާއި ސީރިއަސް ބަލި ހާލަތަކަށް ގޮސްފައިވާ މީހުންގެ ނިސްބަތްވެސް ދަށަށްގޮސްފައިވާކަމަށް މިދިރާސާއިން ދައްކައެވެ.
އެހެންނަމަވެސް ފަހުން ވެކްސިން ޖަހަން ފެށި ޒުވާނުންގެ އުމުރުފުރައިގެ މީހުން ހޮސްޕިޓަލްތަކުގައި އެޑްމިޓްކުރަން ޖެހޭ މިންވަރާއި ސީރިއަސް ހާލަތަށްދާ މިންވަރު ދަށްނުވާކަމަށް ދިރާސާއިން ދައްކައެވެ.
އިސްރާއީލުން އާބާދީގެ ބޮޑު ބަޔަކަށް ވެކްސިން ދެމުން އަންނައިރު އެގައުމުން އަންނަނީ ހަރޑް އިމިޔުނިޓީއަކާ ހިސާބަށް ދެވޭނީ ކިހާތާކުތޯ ބަލަމުންނެވެ. އެކަމަށްޓަކައި އެގައުމުގައި އަންނަނީ ދިރާސާތައް ކުރަމުންނެވެ.
