ކުރިން ލޮކްޑައުން ކުރިއިރު ދޫކޮށްފައިވާ ފާސްތައް ބައެއް ފަރާތްތަކުން ބޭނުން ކުރަމުންދޭ: ފުލުހުން
15 ފެބުރުއަރީ 2021 | ހޯމަ 02:31ހުއްދައަށް އެދުމުން އެސްއެމްއެސް އެއްގެ ޒަރީއާއިން އެމީހެއްގެ މޯބައިލް ފޯނަށް ހުއްދަ ލިބިގެންދާނެ
ކާފިއު ގަޑީގައި ފުލުހުން އާންމުންގެ މީހަކު ހުއްޓުވައި ސުވާލުކުރަނީ
ކުރިން ލޮކްޑައުން ކުރިއިރު ދޫކޮށްފައިވާ ފާސްތައް ބައެއް ފަރާތްތަކުން ބޭނުން ކުރަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ ކުރިން ދޫކޮށްފައިވާ ފާސް މިހާރު ބޭނުމެއް ނުކުރެވޭނެ ކަމަށެވެ. އަދި ވެހިކަލް ދުއްވުން މަނާގަޑީގައާއި ކާފިއު ވަގުތުގައި ޒަރޫރީ ބޭނުންތަކަށް ބޭރަށް ނުކުތުމަށް ފުލުހުންގެ ހުއްދަ (ޕޮލިސް ޕާމިޓަށް) އެދެން ޖެހޭ ކަމަށެވެ.
24 ގަޑިއިރު ޑިއުޓީ ކުރާ ތަންތަނުގެ ޑިއުޓީތަކަށްދާ މުވައްޒަފުންނާއި ކެފޭ ރެސްޓޯރަންޓްތަކުގެ ޑެލިވަރީ އަދި އިމަރޖެންސީ އެކި ބޭނުންތަކަށް ޕޯޓަލް މެދުވެރިކޮށް ހުއްދައަށް އެދެވޭނެ ކަމަށާއި، ހުއްދައަށް އެދުމުން އެސްއެމްއެސް އެއްގެ ޒަރީއާއިން އެމީހެއްގެ މޯބައިލް ފޯނަށް ހުއްދަ ލިބިގެންދާނެ ކަމަށް ފުލުހުން ބުންޏެވެ. އަދި ހުއްދަ ލިބުމުން އެގޮތަަށް އަމަލު ކުރެއްވުމަށް ވަނީ އެދިފައެވެ.
ހެލްތު އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ސްޕްރިންޓެންޑެންޓް އޮފް ޕޮލިސް ޙުސައިން ސަމީރު ވިދާޅުވީ މިހާރު އަޅާފައިވާ ފިޔަވަޅުތައް ތަންފީޒުކުރުމުގެ މަސައްކަތްތައް ހާއްސަ އިސްކަމެއްދީގެން ފުލުހުން ކުރާ މަސައްކަތެއްގެ ގޮތުގައި ކޮމިޝަނަރ އޮފް ޕޮލިސް ކަނޑައަޅުއްވާފައިވާ ކަމަށާއި، އާންމު ރައްޔިތުންނަށް އެހީތެރިކަން ފޯރުކޮށްދީ ޚިދުމަތްތައް ފޯރުކޮށްދިނުމަށްޓަކައި މިހާރު ވަނީ ކުރިން ބޭނުންކުރަމުން އައި ޕޮލިސް ޕަރމިޓް ޕޯޓަލް ހުޅުވައިލާފައި ކަމަށެވެ.
ކޮވިޑް 19 އާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތައް ތަންފީޒުކުރުމުގެ މަސައްކަތްތަކާ ގުޅިގެން އެކިއެކި އިންތިިޒާމްތައް ހަމަޖެހިފައިވާ ގޮތުގެ މައުލޫމާތު ދެއްވަމުން ސްޕްރިންޓެންޑެންޓް އޮފް ޕޮލިސް ޙުސައިން ސަމީރު ވިދާޅުވީ ޕޯޓަލް މެދުވެރިކޮށް ކެފޭ ރެސްޓޯރަންޓްތަކަށް ޑެލިވަރީ ކުރުމުގެ ހުއްދަ ލިބިގެންދާނީ 18:00 އިން 22:30 އާހަމައަށްކަމަށާއި 22:30 ގެ ފަހުން ޑެލިވަރީ ކުރުން މަނާވާނެކަމަށެވެ. އަދި ޑެލިވަރީކުރާ ތަންތަނުގެ ތެރެއިން ކޮންމެ ތަނަކަށް ދެ އުޅަނދަކަށް ހުއްދަ ލިބިގެންދާނެކަމަށް ވިދާޅުވިއެވެ.
މީގެއިތުރުން ގެސްޓް ހައުސްތަކުން އެއަރޕޯޓަށް ދަތުރުތައް ކުރުމަށްޓަކައި ކޮންމެ ތަނަކަށް ޕޯޓަލް މެދުވެރިކޮށް އެއް ވެހިކަލަށް ހުއްދަ ލިބިގެންދާނެކަމަށާއި 23:00 ން ފެށިގެން ފަތިހު 04:30 އާ ދެމެދު ބޭރުގައި އުޅުމަކީ މަނާކަމެއްކަމަށާއި 18:00 ން ފެށިގެން ހެނދުނު 06:00 ށް އެއްގަމު އުޅަނދު ދުއްވުމަކީ މަނާކަމެއްކަމަށް ވިދާޅުވިއެވެ. އަދި ޕަބްލިކް ޓްރާންސްޕޯޓްތަކުގެ ތެރެއިން މާލެ ހުޅުމާލެ ބަސް ދަތުރުގެ ފަހު ގަޑިއަކީ 22:30 ކަމަށާއި، ހުޅުމާލެ ވިލިމާލެ އަދި ތިލަފުށި ފެރީގެ އެންމެ ފަހު ގަޑިއަކީ ވެސް 22:30 ކަމަށް ސަމީރު ވިދާޅުވިއެވެ.
ހަމައެއާއެކު ފެނާއި ގޭހުގެ ޚިދުމަތް ފޯރުކޮށްދޭ ފަރާތްތަކަށް އެއްވެސް ޕަރމިޓެއްނެތި ކޮންމެ ތަނަކަށް ދެ އުޅަނދަކަށް ހުއްދަ ދީފައިވާކަމަށާއި ކޮންމެ ޓެކްސީ ސެންޓަރަކަށް އަދި ޕިކަޕް ސެންޓަރުތަކުގެ ތެރެއިން ކޮންމެ ތަނަކަށް 10 ހުއްދަ ދީފައިވާނެކަމަށާއި ދުއްވުން މަނާ ގަޑިތަކުގައި އެ ހުއްދައިގެ ދަށުން ދަތުރުކުރެވޭނެކަމަށް ސަމީރު ވިދާޅުވިއެވެ. އަދި ޓެކްސީތައް އެޗްޕީއޭގެ ގައިޑްލައިނާ އެއްގޮތަށް ބެހެއްޓުމަށް އެދޭކަމަށާއި ގައިޑްލައިންތަކާ ޚިލާފަށް ހުންނަ އުޅަނދުތަކުގެ ހުއްދަ ބާތިލްކުރަމުންދާނެކަމަށް ވެސް ސަމީރު ވިދާޅުވިއެވެ.
މީގެއިތުރުން ފެރީތަކާއި ބަސްތަކުގައި ވެސް އެޗްޕީއޭގެ ގައިޑްލައިނާ އެއްގޮތްވާގޮތުގެ މަތިން އިންތިޒާމްތައް ހަމަޖައްސައި އެކަންކަމަށް އަމަލުކުރެއްވުމަށް އެދޭކަމަށާއި ޕޮލިސް ޕަރމިޓް ޕޯޓަލްގެ ހޮޓްލައިނެއް މިހާރު ގާއިމްކުރެވިފައިވާކަމަށާއި 1665 ނަންބަރާ ގުޅުވުމުން އިތުރު މައުލޫމާތު ލިބިގެންދާނެކަމަށެވެ. އަދި އެންގުންތަކާ ޚިލާފުވާނަމަ ޖޫރިމަނާ ކުރަމުންދާނެކަމަށާއި ހުރިހާ ފަރާތްތަކުން ވެސް ގަޑިތަކަށް އިހުތިރާމްކުރައްވައި، ވިޔާފާރިތައް ގަޑިއަށް ބަންދުކުރުމަށާއި ފަރުދީ ޒިންމާ އަދާކުރުމަށް ފުލުހުން ވަނީ އިލްތިމާސް ކޮށްފައެވެ.
