އެމްޑީޕީގެ ސެކެޓްރީ ޖެނެރަލްއަކަށް ޝާޒްލީ ޝަފީޤް ހަމަޖައްސައިފި
އައު ސެކެޓްރީ ޖެެނެރަލް ހަމަޖައްސާފައިވަނީ އެމްޑީޕީގެ 172ވަނަ ޤައުމީ މަޖިލީހުގެ ބައްދަލުވުމުގައި
އެމްޑީޕީގެ 172ވަނަ ޤައުމީ މަޖިލީހުގެ ބައްދަލުވުމުގެ ތެރެއިން
އެމްޑީޕީ ސެކެޓްރީ ޖެނެރަލްއަކަށް ޝާޒްލީ ޝަފީޤް ހަމަޖައްސައިފިއެވެ.
ޝާޒްލީ އެމްޑީޕީ ސެކެޓްރީ ޖެނެރަލްއަކަށް ހަމަޖެއްސިކަން ހާމަކޮށްފައިވަނީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ 172ވަނަ ޤައުމީ މަޖިލީހުގެ ބައްދަލުވުމުގައެވެ. އެމްޑީޕީގެ ސެކެޓްރީ ޖެނެރަލްއަކަށް ހަމަޖައްސަވާފައިވަނީ، އެމްޑީޕީގެ ޤައުމީ މަޖިލީހުގެ ބައްދަލުވުމުގައި ބައިވެރިވި 99 މެމްބަރުންގެ ތެރެއިން 90 ވޯޓާއެކުއެވެ. މި ބައްދަލުވުމުގައި އެމްޑީޕީގެ އަމީންއާއްމުގެ މަޤާމަށްވެސް ބޭފުޅަކު ވަނީ އައްޔަންކުރައްވާފައެވެ.
މއ. ފެރިނާ، ޝާޒްލީ ޝަފީޤް އެމްޑީޕީގެ ސެކެޓްރީ ޖެނެރަލްއަކަށް އައްޔަންކޮށްފައިވަނީ މި މަޤާމަށް ކުރިމަތިލުމަށް 16 މެމްބަރުން 2020 އިއުލާންކުރުމަށްފަހުއެވެ. މި މުއްދަތުގައި މަޤާމަށް ކުރިމަތިލައްވާފައިވަނީ ޝާޒްލީ ޝަފީޤް އެކަންޏެވެ. އެމްޑީޕީގެ ސިޔާސީ ގިނަ ހަރަކާތްތަކެއް ހިންގުމުގައި އިސްސަފުގައި ހަރަކާތްތެރިވި ޝާޒްލީ ވަނީ 2012 އޮގަސްޓުން ފެށިގެން 2014 ނޮވެމްބަރާއި ހަމައަށްވެސް އެ ޕާޓީގެ ސެކެޓްރީ ޖެނެރަލްގެ މަޤާމު ފުރުއްވާފައެވެ.
އައު ސެކެޓްރީ ޖެނެރަލް ހަމަޖެއްސެވިކަން ހާމަކުރައްވާ އެމްޑީޕީގެ ޗެއަރޕާސަން ހަސަން ލަތީފް ވަނީ މީގެ ކުރިން އެމަޤާމު ފުރުއްވި ފަރާތުން ލޯކަލް ކައުންސިލް އިންތީޚާބުގެ މާލޭގެ މޭޔަރުކަމަށް ކުރިމަތިލުމަށް ނިންމުމާއި، ޑެޕިއުޓީ ސެކެޓްރީ ޖެނެރަލްވެސް މި އިންތިޚާބުގައި ކުރިމަތިލައްވާތީ ޕާޓީ ހިންގުމުގައި އަދި ވަކިން ޚާއްސަކޮށް އިންތިޚާބަށް ތައްޔާރުވުމުގައި އުނދަގޫތައް ހުރިކަމަށް ވިދާޅުވެފައެވެ. އެހެންނަމަވެސް، ޝާޒްލީ އައު ސެކެޓްރީ ޖެނެރަލްއަކަށް ހަމަޖެއްސުމުން މި ދަތިތައް ފަސޭހަވެގެންދާނެކަމަށް އެމްޑީޕީގެ ޗެއަރޕާސަން ވިދާޅުވިއެވެ.
އެމްޑީޕީ އޮފީހުގައި ޒޫމް މެދުވެރިކޮށް ކުރިއަށްގެންދާ މި ބައްދަލުވުމުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙާއި، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވަނީ ބައިވެރިވެޑައިގެންފައެވެ. މި ބައްދަލުވުމުގައި އެމްޑީޕީގެ އޮފީހުން ވަނީ އެމްޑީޕީ ޕާލިމެންޓްރީ ގްރޫޕުން ކުރަމުންދާ މަސައްކަތްތަކާއި، ކުރިއަށް އޮތް ލޯކަލް ކައުންސިލްގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އެންމެ ފަހުގެ މަޢުލޫމާތު ހިއްސާކޮށްފައެވެ.
ކުރިއަށް އޮތް ލޯކަލް ކައުންސިލް އިންތިޚާބަށް އެމްޑީޕީން ތައްޔާރުވަމުންދާއިރު، އެ ޕާޓީން ވަނީ ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ އުސޫލުތަކާ އެއްގޮތަށް ކެމްޕެއިން ޙަރަކާތްތައް ކުރިއަށް ގެންދާނެ ގޮތް ދައްކުވައިދޭނެކަމުގެ ޔަޤީންކަން ދީފައެވެ. އެގޮތުން "ރަށްވެހިފަތިސް" ކެމްޕެއިން ލޯންޗުކޮށް، ވަރޗުއަލްކޮށް އެ ޕާޓީން ގެންދަނީ ކެމްޕެއިން ޙަރަކާތްތައް ހިންގަމުންނެވެ.
ދިވެހިރާއްޖެއިން ކޯވިޑް-19 ފެނިފައިވާތީ ބައްޔަށް މަގުފަހިވާ ބާވަތުގެ ކެންޕޭނުގެ އެއްވެސް ޙަރަކާތެއް ނުހިންގުމަށާއި، ސޯޝަލް މީޑިއާ އަދި މުއާޞަލާތީ ވަޞީލަތްތައް މެދުވެރިކޮށް ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕޭނު ޙަރަކާތްތައް ކުރިއަށްގެންދިއުމަށް އެމްޑީޕީން މީގެ ކުރިންވެސް އޮތީ ނިންމާފައެވެ.
އެމްޑީޕީގެ ސެކެޓްރީ ޖެނެރަލްއަށް ޝާޒްލީ ހަމަޖައްސަވާފައިވާއިރު، އެޕާޓީން ދާދިފަހުން ވަނީ އެ ޕާޓީގެ ތަރުޖަމާނަކަށް މުހައްމަދު ސައިފް ފާތިހު ހަމަޖައްސާފައެވެ.
