މާސްކް ދަތްދޮޅީގައި އަޅާ މީހުން ގިނަވުމުން ފުލުހުންގެ ކަންބޮޑުވުން!
ފިޔަވަޅުތައް ތަންފީޒު ކުރަމުންދާއިރު ފާހަގަ ކުރެވޭ ބައެއް ކަންކަން ހިއްސާ ކުރެއްވި
ހޮނިހިރު ދުވަހުގެރޭ އިދިކޮޅު ކޯލިޝަނުން ކުރިއަށް ގެންދިޔަ މުޒާހަރާގައި ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ މާސްކް ދަތްދޮޅީގައި އަޅުއްވައިގެން ފުލުހުންނާ ޒުވާބު ކުރައްވަނީ
ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ގައިޑްލައިންތަކާ ޚިލާފަށް މާސްކް އަޅާ މީހުން ގިނަކަން ފާހަގަކޮށް ފުލުހުން އެކަމުގެ ކަންބޮޑުވުން ފާޅުކޮށްފިއެވެ.
ހޮނިހިރު ދުވަހުގެރޭ ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން ވާހަކަ ދައްކަވަމުން ސުޕްރިންޓެންޑެންޓް އޮފް ޕޮލިސް ހުސައިން ސަމީރު ވަނީ އެޗްޕީއޭގެ ފިޔަވަޅުތައް ތަންފީޒު ކުރަމުންދާއިރު ފާހަގަ ކުރެވޭ ބައެއް ކަންކަން ހިއްސާ ކުރައްވާފައެވެ. އެގޮތުން ގިނަ މީހުން މާސްކް އެޅިނަމަވެސް، އެޗްޕީއޭގެ ގައިޑްލައިންތަކާ އެއްގޮތަށް މާސްކް ނާޅާ މީހުން ފާހަގަވާކަމަށް އޭނާ ވިދާޅުވިއެވެ.
ސަމީރު ވިދާޅުވީ، މާސްކް އަޅަންވާނީ ނޭފަތާއި އަނގަ އެއްކޮށް ނިވައިވާ ވަރަށް ކަމަށް ގައިޑްލައިންގައި ބަޔާންކޮށްފައި އޮތް ނަމަވެސް، ދަތް ދޮޅީގައި މާސްކް އަޅައިގެން އުޅޭ މީހުންނާއި، ކަރުގައިި މާސްކް އެލުވައިގެން ތިބޭ މީހުން ވެސް މަދެއް ނޫން ކަމަށެވެ. އަދި އެއީ މާސްކް އެޅުން ކަަމަށް ފުލުހުން ވެސް ބަލައިނުގަންނާނެ ކަން އޭނާ ފާހަގަ ކުރެއްވިއެވެ.
އޭގެ އިތުރުން، އެޗްޕީއޭގެ ގައިޑްލައިންތަކާ ޚިލާފުވާނަމަ ޖޫރިމަނާ ކުރެވޭނެކަމަށް އެޗްޕީއޭއިން ކަނޑައަޅާފައިވާ އުސޫލު ތަންފީޒު ކުރަމުން ގެންދާނެ ކަމަށް ވެސް ސަމީރު ވިދާޅުވިއެވެ. އެގޮތުން އާންމު ފަރުދެއްނަމަ 1،000 ރުފިޔާއިން ފެށިގެން 10،000 ރުފިޔާއާ ހަމައަށް ޖޫރިމަނާ ކުރެވޭއިރު، ޤާނޫނީ ޝަޚުސެއްނަމަ 5،000 ރުފިޔާއިން ފެށިގެން 100،000 ރުފިޔާއާ ހަމައަށް ޖޫރިމަނާ ކުރެވޭނެ ކަމަށް އެޗްޕީއޭއިން މައުލޫމާތު ދެއެވެ.
ކޮވިޑް-19 އާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކާ ޚިލާފުވެއްޖެނަމަ ކުރާ ޖޫރިމަނާ ބޮޑުކުރިއިރު، މީގެ ކުރިން އެންގުމާ ޚިލާފުވެއްޖެނަމަ ޖޫރިމަނާ ކުރަމުން އައީ 1،000 ރުފިޔާއިންނެވެ. އެހެން ނަމަވެސް، އެޗްޕީއޭގެ އެންގުންތަކާ ޚިލާފަށް ފާއިތުވި ދުވަސްތަކުގައި ސިޔާސީ ޕާޓީތަކުން ވެސް އެއްވުންތައް ބާއްވާފައިވާއިރު، މާސްކް އެޅުމާއި، އިޖުތިމާޢީ ގައިދުރުކަމެއް ނެތުމުގެ ސަބަބުން ގިނަ ބަޔަކު އެކަމަށް ފާޑުކިޔާފައިވެއެވެ.
