އަލީ ވަހީދުގެ ޕާސްޕޯޓް ދޫކުރީ ރަނގަޅަކަށް ނޫން، އަމުރުގެ މައްސަލަ ކަމާބެހޭ އިދާރާތަކަށް ހުށަހަޅާނަން: ޕީޖީ އޮފީސް
އަލީ ވަހީދު ޖާމިނު ކުރުވީ ޔޫތް އެންޑް ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްއަދު އަލީ (އަޑުބަރޭ)
އަލީ ވަހީދު: އޭނާގެ ޕާސްޕޯޓު ދޫކުރުމާއެކު ވަގުތުން ވަނީ ރާއްޖެއިން ފުރާފައި
ކުރީގެ ޓޫރިޒަމް މިނިސްޓަރ އަލީ ވަހީދުގެ ޕާސްޕޯޓް ދޫކުރި މައްސަލާގައި، އެ އަމުރު ނެރުމުގައި، އާންމުކޮށް މިބާވަތުގެ އަމުރު ނެރުއްވުުގައި އަމަލުކުރާ އުސޫލުތަކާ ޚިލާފަށް އަމަލުކޮށްފައިވާ މައްސަލަ، ކަމާބެހޭ މުއައްސަސާތަކުގެ ސަމާލުކަމަށް ގެނައުމުގެ މަސައްކަތް ކުރަމުންދާކަމަށް ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން ބުނެފިއެވެ.
ކްރިމިނަލް ކޯޓުން އަލީ ވަހީދުގެ ޕާސްޕޯޓް ދޫކުރި މައްސަލާގައި ޕީޖީގެ އޮފީހުން ބުރާސްފަތި ދުވަހު ނެރުނު ނޫސްބަޔާނެއްގައި ބުނެފައިވަނީ، މި މަހުގެ 9 ވަނަ ދުވަހު ކްރިމިނަލް ކޯޓުގައި ބޭއްވުނު އަޑުއެހުމުގެ އަލީ ވަހީދުގެ ޕާސްޕޯޓް ދޫކުރަން ނިންމާފައިވަނީ ރަނގަޅަށް ނޫންކަމަށެވެ. އަދި އެ އަޑުއެހުން ނިންމުނީ ހަވީރު ހަތަރެއްގެ ފަހުންކަމަށާއި އެ ނިންމުން އިސްތިއުނާފު ކުރުމާމެދު ގޮތެއް ނިންމުމުގެ ކުރިން އަލީ ވަހީދު ފުރައިގެން ގޮސްފައިވާކަމުގެ މައުލޫމާތު ލިބިފައިވާ ކަމަށެވެ.
މީގެއިތުރުން ޕީޖީ އޮފީހުން ބުނީ، ކޯޓު އަމުރުގައި އޮތް 4 މަސްދުވަހުގެ ތެރޭގައި އަލީ ވަހީދު އެނބުރި އައިސްފައިނުވާނަމަ، އޭނާގެ މައްޗަށާއި، އޭނާ ޖާމިނު ކޮށްފައިވާ މީހާގެ މައްޗަށް ގާނޫނުގައިވާ ގޮތުގެ މަތިން ފިޔަވަޅުއެޅުމުގެ މަސައްކަތް، އެކަމަށް ހަމަޖެހިފައިވާ އުސޫލްތަކުގެ ތެރެއިން ކުރަމުން ގެންދާނެކަމަށެވެ.
އަލީ ވަހީދު ޖާމިނު ކުރުވީ، އޭނާގެ ގާތް އެކުވެރިއެއްކަމަށްވާ، ޔޫތް އެންޑް ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްއަދު އަލީ (އަޑުބަރޭ)އެވެ.
ޕީޖީ އޮފީހުން ބުނީ، އަލީ ވަހީދުގެ ޕާސްޕޯޓު ދޫކުރުމަށް ކްރިމިނަލް ކޯޓުން ނިންމި ލިޔުމާއި، ޖާމިނުކުރުވި ލިޔުން ހޯދުމަށް ކުރި މަސައްކަތުން އަދި މިހާތަނަށް ކޯޓުން ދައުލަތާ އެލިޔުންތައް ހަވާލުކޮށްފައިނުވާކަމަށެވެ.
ޕީޖީ އޮފީހުގެ ބަޔާނުގައި، އަލީ ވަހީދުގެ މައްސަލާގައި، ކްރިމިނަލް ކޯޓުގެ އަޑުއެހުންތަކުގައި ކަން ހިނގާފައިވާގޮތުގެ ތަފްސީލް ހިމެނެއެވެ. އެގޮތުން، މި މަހުގެ 9 ވަނަ ދުވަހު ބޭއްވި އަޑުއެހުމަށް ޚަބީރެއްގެ ގޮތުގައި ކަށީގެ ހާއްސަ ޑޮކްޓަރު ޑރ. ޝާން ޔޫސުފް ހާޒިރު ކުރެވުނުކަމަށާއި، އޭނާ ވިދާޅުވެފައިވަނީ، މެޑިކަލް ލިޔުންތަކުގައި ސީރިއަސް މައިބަދައިގެ ޑިސްކް މައްސަލައަކާ ގުޅިގެން ސާރޖަރީއެއް ހެދުމަށް އަލީ ވަހީދަށް ޑޮކްޓަރު ލަފާދީފައިވާކަމަށާއި، "ޢަލީ ވަޙީދުގެ ހުރި ކޮމްޕްލިކޭޝަންތަކުގެ ސަބަބުން ރާއްޖެއިން އެ ސަރޖަރީ ހެދެން އޮތްނަމަވެސް، މިތަނުގައި އެކަށީގެންވާ އިކުއިޕްމަންޓް ވެސް ނެތުމާއެކު ދިވެހިރާއްޖޭގައި ސަރޖަރީ ހަދަން ރެކޮމެންޑް ނުކުރާކަމަށާއި، ދިވެހިރާއްޖޭގައި މިސަރޖަރީ ހަދައިގެން ފޭޓަލް ވެސް ވެފައިވާ ކަމަށާއި، އެގޮތުން ވަރަށް ފަހުން ވެސް މީހެއްގެ ފުރާނައަށް ގެއްލުންވެފައިވާ" ޑރ. ޝާން ވިދާޅުވެފައިވާ ކަމަށެވެ.
ޑޮކްޓަރުގެ ބަޔާނާބެހޭގޮތުން ދައުލަތުން ދެކެނީ ކޮން ގޮތަކަށްތޯ ޝަރީޢަތުން ސުވާލުކުރެއްވުމުން، މީހެއްގެ ބޭސްފަރުވާއަށް ދައުލަތުން ހުރަސް ނާޅާނެ ކަމަށާއި، ބޭސް ފަރުވާއަށް ރާއްޖެއިން ބޭރަށްދިއުމަށް ހުއްދަދިނުމަށް އިޢުތިރާޒް ނުކުރާކަމަށާއި، ނަމަވެސް އެކަން ކުރުމަށް ދައުލަތުން އެދެނީ ޕާސްޕޯޓު ދޫކުރުމުގެ ބަދަލުގައި ޕާސްޕޯޓު ހިފަހައްޓާފައި އޮތް އޮތުން އެގޮތުގައި ދަމަހައްޓައި، މީހަކު ޖާމިނުކުރުވުމާއެކު ވަކި މުއްދަތަކަށް ބޭސްފަރުވާކުރުމަށް ދިވެހިރާއްޖެއިން ބޭރަށް ދިއުމަށް ހުއްދަކުރާ ޓްރެވަލް ޑޮކިއުމަންޓެއް ދޫކޮށްގެން ކަމަށް ދެންނެވި ކަމަށްވެސް ޕީޖީ އޮފީހުގެ ބަޔާނުގައި ބުނެފައިވެއެވެ.
މީގެއިތުރުން ޕީޖީ އޮފީހުގެ ބަޔާނުގައި ބުނެފައިވަނީ، ޢަލީ ވަހީދު ދެއްކި ވާހަކަތަކުގެ ޖަވާބުގައި ދައުލަތުން ބުނެފައިވާނީ، ޢަލީ ވަހީދުގެ ބޭސްފަރުވާއަށް ބޭނުންވަނީ ޕާސްޕޯޓު ނޫންކަމަށެވެ. ޖިނާއީ ދަޢުވާއެއް އުފުލިފައިވާ މީހެއްގެ ޙައްޤުތައް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއިން ވެސް ގައިދުކުރެވިފައިވާކަމަށާއި، ޢަދުލް އިންޞާފު ޤާއިމުވުމުގެ ޙައްޤަކީ ހަމައެކަނި ދަޢުވާލިބޭ މީހާގެ ޙައްޤެއް ނޫންކަމަށާއި، އެއީ ދަޢުވާލިބޭ މީހާގެ އިތުރުން މައްސަލައިގައި އަނިޔާލިބުނު މީހުންނާއި، މުޅި މުޖުތަމަޢުގެ ޙައްޤެއް ކަމަށާއި، އެހެންކަމުން ކޯޓުން ނިންމާ ނިންމުންތައް ބިނާވާންޖެހޭނީ ހަމައެކަނި ދަޢުވާލިބޭ މީހާގެ މަޞްލަޙަތު ބުރަވާ ގޮތަކަށް ނޫންކަމަށާއި، މިދެންނެވުނު އެންމެހާ ޙައްޤުތައް ބެލެންސްކުރަންވާނެ ގޮތަކަށް ކަމަށެވެ. އަދި ޢަލީ ވަޙީދަކީ މީގެ ކުރިންވެސް ތަޙުޤީޤަށާއި ޝަރީއަތަށް ހުރަސްއެޅޭނެހެން ފުރައިގެން ދިޔުމަށް ފަހު އެނބުރި ނައިސް ހުރި މީހެއްކަމާއި، ޕާސްޕޯޓު ދޫކޮށްފިނަމަ ދިވެހިރާއްޖެއިން ބޭރުގައި ދިގު މުއްދަތަކަށް މަޑުކޮށް ހެކި ނައްތާލާއި، މައްސަލައިގެ ޝަރީޢަތް އެކަށީގެންވާ ގޮތެއްގައި ކުރިއަށް ގެންދިއުމުގެ ފުރުޞަތު އޮތްހާ ހިނދަކު އެނބުރި ނައުމުގެ ފުރުޞަތު އިންތިހާއަށް އޮތްކަމަށް ޕީޖީ އޮފީހުގެ ބަޔާނުގައި ބުނެފައިވެއެވެ.
