އީރާނަށް ލުއިދޭނީ މަޑުމަޑުން، މަޝްވަރާގެ ތަފްސީލީ މަރުޙަލާއަކަށް ފަހު - އެމެރިކާ

އީރާނަށް ލުއިދޭނީ މަޑުމަޑުންކަމަށާއި، މަޝްވަރާގެ ތަފްސީލީ މަރުޙަލާއަކަށް ފަހުކަމަށް އެމެރިކާއިން ބުނެފިއެވެ. ވައިޓް ހައުސްގެ އިތުބާރު ހުރި މަސްދަރަކުން އާންމުކޮށްފައިވާ ލިޔެކިޔުންތަކެއްގައިވާ ގޮތުން އެމެރިކާއިން އީރާންގެ ނިއުކްލިއަރ ޑީލަށް އެނބުރި އައުމުގައި އަމަލުކުރާނެގޮތް ވަނީ ތަފްސީލުކޮށްދީފައެވެ. މި ލިޔެކިޔުމުގައި ވާގޮތުން އެމެރިކާއިން އީރާނަށް އަޅާފައިވާ ދަތިކުރުމުގެ ފިޔަވަޅުތައް ލުއިކުރާނީ މަޑުމަޑުން ނުވަތަ "ބޭބީ ސްޓެޕްސް"އިންކަމަށް ބުނެފައިވެއެވެ. އަދި މިކަން ކުރުމުގައި ދެ ފަރާތުގެ ދެމެދު ދިގުލައިގެންދާނެ ފަދަ މަޝްވަރާގެ ތަފްސީލީ މަރުޙަލާއެއް ކުރިއަށްގެންދާނެކަމަށް މި ލިޔެކިޔުންތައް ބުނެއެވެ.

އީރާނަށް ލުއިދޭނީ މަޑުމަޑުން، މަޝްވަރާގެ ތަފްސީލީ މަރުޙަލާއަކަށް ފަހުކަމަށް ހާމަވެފައިވާއިރު، އީރާނުގެ ނިއުކްލިއާ އެއްބަސްވުމާ އަލުން ގުޅޭނީ، އެގައުމުން ނިއުކްލިއާ އުފައްދާ މިންވަރު ދަށްކުރުމުން ކަމަށް އެމެރިކާގެ ރައީސް ޖޯ ބައިޑެން ވަނީ ދާދި ފަހުން ވިދާޅުވެފައެވެ. ބައިޑެން ވިދާޅުވީ އީރާނުން އަންނަނީ ނުރައްކާތެރި މިންވަރަކަށް ޔުރޭނިއަމް އުފައްދަމުން ކަމަށާއި، އެކަމުގެ ބިރު މުޅި ދުނިޔެއަށް އެބައޮތް ކަމަށެވެ. އެހެންކަމުން އީރާނުގެ ނިއުކްލިއާ އެއްބަސްވުމާ އެމެރިކާއިން އަލުން ގުޅޭނީ، އީރާނުން ނިއުކްލިއާ އުފައްދާ މިންވަރު ދަށްކުރުމުން ކަމަށް ބައިޑަން ވިދާޅުވިއެވެ. ބައިޑަން އިތުރަށް ވިދާޅުވީ ނިއުކްލިއާ އެއްބަސްވުމާ އެންމެ ފުރަތަމަ ޚިލާފުވީ އީރާނުން ކަމަށާއި، އެގޮތުން އީރާނުން ވަނީ އެއްބަސްވުމުގައިވާ މިންވަރަށްވުރެ އިތުރަށް ނިއުކްލިއާ އުފައްދައިފައި ކަމަށެވެ.

އީރާނުން ވަނީ އެގައުމުގެ ނިއުކްލިއާ އެއްބަސްވުމުގައި އެމެރިކާ އަލުން ބައިވެރިވުމަށް ބާރުއެޅުމަށް ޔޫރަޕިއަން ޔޫނިއަންގެ ކިބައިން އެދިފައެވެ. އީރާނުގެ ނިއުކްލިޔާ އެއްބަސްވުމުން އެމެރިކާއިން ވަކިވެ، އީރާނާ ދެކޮޅަށް ހަރުކަށި ފިޔަވަޅުތަކެއް އަޅާފައިވާއިރު، މި ހައްގުތައް އަނބުރާ ހޯދުމަށް އެދި އީރާނުން ވަނީ މީގެ ކުރިންވެސް ޔޫރަޕްގެ ބޮޑު ތިން ބާރު ކަމަށްވާ ޖަރުމަނާއި، ފްރާންސް އަދި އިނގިރޭސިވިލާތުގެ ކިބައިން އެދިފައެވެ. އެމެރިކާގެ ރައީސް ޑޮނަލްޑް ޓްރަމްޕް ކޮމާންޑަރަކަށް ހުރެ، އީރާނާ ދެކޮޅަށް ފެށި އިޤްތިޞާދީ ހަނގުރާމަ ނާކާމިޔާބުވެ، ޓްރަމްޕްގެ ސިޔާސީ ހަރަކާތް ވެސް ނާކާމިޔާބުވެފައިވާ ކަމަށް އީރާނުގެ ރައީސް ހަސަން ރޫހާނީ ވަނީ ވިދާޅުވެފައެވެ.

އީރާނުގެ ނިއުކްލިޔާ އެއްބަސްވުމަކީ އީރާނުގެ ނިއުކްލިޔާ މައްސަލަ ހައްލުކުރުމަށްޓަކައި އެމެރިކާ، އިނގިރޭސިވިލާތް، ފަރަންސޭސިވިލާތް، ޖަރުމަނު، ޗައިނާ، ރަޝިޔާ މި 6 ގައުމާއެކު 2015 ވަނަ އަހަރު އީރާނުން ސޮއިކުރި އެއްބަސްވުމެކެވެ. މިއެއްބަސްވުމަށް އަމަލުކުރަން ފެށުމާއެކު އެމެރިކާވަނީ އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލާފައެވެ. އެހެންނަމަވެސް 2016 ވަނަ އަހަރު އެމެރިކާގެ ކުރީގެ ރައީސް ޑޮނާލްޑް ޓްރަމްޕް ވަނީ އެ އެއްބަސްވުމާ ޚިލާފަށް އީރާނާ ދެކޮޅަށް ހަރުކަށި ފިޔަވަޅުތަކެއް އަޅާފައެވެ.