ސްޕެއިން ގައި ލޮކްޑައުން އަށް މަޑުމަޑުން ދޫ ދޭން ފަށައިފި

ސްޕެއިންގައި ހޯމަ ދުވަހުން ފެށިގެން ބައެއް ބާވަތުގެ މަސައްކަތްތައް ކުރިއަށް ގެންދިއުމަށް ސަރުކާރުން ހުއްދަ ދީފިއެވެ.

އެހެން ނަމަވެސް ސްޕެއިންގެ ސަރުކާރުން ބުނެފައިވަނީ ލޮކްޑައުން އަށް އަދި ނިމުމެއް ނާންނަ ކަމަށެވެ.

ހުއްދަ ދިން މަސައްކަތް ތަކުގެ ތެރޭގައި ކޮންސްޓްރަކްޝަން މަސައްކަތްތަކާއި މެނުފެކްޗަރިން މަސައްކަތްތައް ހިމެނެއެވެ. ހޮޓާތަކާއި، ކެފޭ ތަކާއި، ފިހާރަ ތަކާއި އާއްމުން އެއްވެ އުޅޭ ތަންތަން އަދިވެސް ހުޅުވާކަށް ސަރުކާރުން ހުއްދަ އެއް ނުދެއެވެ. މިފަދަ ތަންތަން އޭޕްރީލް 26 ގެ ނިޔަލަށް ބަންދު ކޮށްފައި ބެހެއްޓުމަށް ސަރުކާރުން ކުރިން ނިންމާފައިވާ ނިންމުމަށް ބަދަލެއް ގެނެސްފައެއް ނުވެއެވެ.

ކޮވިޑް-19 ޖެހިގެން މަރުވާ މީހުންގެ އަދަދު ސްޕެއިން ގައި އަންނަނީ ދަށްވަމުންނެވެ.

ސްޕެއިންގެ ސިއްހަތާ ބެހޭ މިނިސްޓްރީން ހޯމަ ދުވަހު ހާމަ ކުރި ގޮތުގައި އެގައުމުގައި ކޮވިޑް-19 ޖެހިފައިވާ މީހުންގެ އަދަދަކީ 169,496 އެވެ. އެއީ އޭގެ ކުރީ ދުވަހަށް ވުރެ ބަލި ޖެހުނު މީހުން އިތުރު އަދަދެކެވެ.

މާޗް މަހުގެ މެދުތެރެއިން ފެށިގެން މިހާތަނަށް ސްޕެއިންގައި 900,000 މީހުންގެ ވަޒީފާ ގެއްލިފައިވާ ކަމަށް ރޮއިޓާސް އިން ބުނެފައިވެއެވެ.