އީރާނަށް ދަތިކުރުމުގެ އިތުރު އާ ފިޔަވަޅުތަކެއް އަޅުއްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވައުދުވެވަޑައިގެންފިއެވެ.
ރައީސް ޓްރަމްޕް ހޮނިހިރު ދުވަހު މިހެން ވިދާޅުވެފައި މިވަނީ ގަލްފް ސަރަހައްދުގައި މީހަކާ ނުލައި އުދުހުނު އެމެރިކާގެ ޑްރޯންއެއް އީރާނުގެ ރިވޮލިއުޝަނަރީ ގާޑުން ބުރާސްފަތި ދުވަހު ވައްޓާލުމުން ދެ ގައުމުގެ ނުތަނަވަސްކަން އިތުރަށް ބޮޑުވެފައި ވަނިކޮށެވެ.
އީރާނަށް އިންޒާރު ދެއްވައި ޓްރަމްޕް ވިދާޅުވީ އަސްކަރީ ފިޔަވަޅު ވެސް އަދިވެސް އޮތީ މޭޒުމަތީގައި ކަމަށެވެ.
ވޮޝިންގޓަނުން ބުނާ ގޮތުގައި އެ އުޅަނދު ވައްޓާލާފައި ވަނީ ބައިނަލްއަގްވާމީ ވައިގެ ސަރަހައްދުގައި އުޅެމުން ދަނިކޮށެވެ. ނަމަވެސް ތެހެރާނުން ބުނީ ޑްރޯން ވައްޓާލީ އެ ގައުމުގެ ވައިގެ ސަރަހައްދަށް ވަނުމުން ކަމަށެވެ.
ޓްރަމްޕް ވިދާޅުވީ އީރާނަށް ރައްދު ހަމަލާ ދިނުމަށް އެމެރިކާއިން ރޭވި ކަމަށާއި ނަމަވެސް އެކަން ހުއްޓަވާލައްވަން އެންގެވީ 150 އެއްހާ މީހުން މަރުވެދާނެތީ ކަމަށެވެ.
އެމެރިކާގެ ރައީސުން ޗުއްޓީ ހޭދަކުރެއްވުމަށް ޚާއްސަކޮށްފައިވާ ކޭމްޕް ޑޭވިޑަށް ފުރާ ވަޑައިގަންނަވަމުން ޓްރަމްޕް ވިދާޅުވީ އެމެރިކާގެ ސަރުކާރުން ގަސްތުކޮށްފައި އޮތީ ތެހެރާނަށް އިގްތިސާދީ ދަތިކުރުމުގެ ފިޔަވަޅުތައް ވަރުގަދަ ކުރުމަށް ކަމަށެވެ.
"އަޅުގަނޑުމެން އީރާނަށް އިތުރު ފިޔަވަޅު މި އަޅަނީ." ރިޕޯޓަރުންނަށް ޓްރަމްޕް ވިދާޅުވިއެވެ.
" ބައެއް ފަހަރަށް އަޅުގަނޑުމެން މިދަނީ މަޑުމަޑުން، އެކަމަކު އަނެއް ބައި ފަހަރު މިދަނީ ކުއްލިއަކަށް"
ރައީސް ޓްރަމްޕްވަ ނީ 30 މީހުންނާ އެކު ދަތުރުކުރި އެމެރިކާގެ ޖާސޫސީ މަތިންދާ ބޯޓެއް ވައްޓާނުލުމަށް އީރާނުގެ ރިވޮލިއުޝަނަރީ ގާޑު ކައުންސިލުން ނިންމި ނިންމުން ބަލައިގަންނަ ކަމަށް ވެސް ވިދާޅުވެފައެވެ.
