ސްޕޯޓްސް އާބިޓްރޭޝަން ޕެނަލުގެ ގަވާއިދުތައް ވީއެންމެ އަވަހަކަށް ހަދަން އަންގައިފި
10 ފެބުރުއަރީ 2021 | ބުދަ 12:12އެފްއޭއެމާ ދެކޮޅަށް އާޒިމް ހުށަހެޅުއްވި މައްސަލަ ވަނީ ދިރާސާކޮށް ނިންމާފައި
މެދު ހެންވޭރު ދާއިރާގެ މަޖިލިސް މެންބަރު އަދި އެމްޑީޕީގެ ޕާލަމަންޓްރީ ގްރޫޕްގެ ލީޑަރު އަލީ އާޒިމް
ކުޅިވަރުގެ ޤާނޫނުގެ ދަށުން އުފައްދަންޖެހޭ ސްޕޯޓްސް އާބިޓްރޭޝަން ޕެނަލް އުފެއްދުމަށް އެކުލަވާލަންޖެހޭ ގަވާއިދުތަކާއި އުސޫލުތައް ވީއެންމެ އަވަހަކަށް ހެދުމުގެ މަސައްކަތްކުރަން ރައްޔިތުންގެ މަޖިލީހުން އަންގައިފިއެވެ.
މި ގޮތަށް މަޖިލީހުން އެންގީ ކުޅިވަރާ ބެހޭ ވުޒާރާއިން ދިވެހިރާއްޖޭގެ ކުޅިވަރުގެ ޤާނޫނާއި އެއްގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާ ދޭތެރޭގައި ފިޔަވަޅު އަޅާފައި ނުވާތީ، އެފްއޭއެމާ ދޭތެރޭގައި ޤާނޫނުގައިވާ ގޮތަށް ފިޔަވަޅު އަޅައިދިނުމަށް އެދި ރައްޔިތުންގެ މަޖިލީހަށް މެދު ހެންވޭރު ދާއިރާގެ މެންބަރު އަދި އެމްޑީޕީގެ ޕާލަމަންޓްރީ ގްރޫޕްގެ ލީޑަރު އަލީ އާޒިމް މިދިޔަ އަހަރުގެ ޖޫން މަހުގެ 30 ވަނަ ދުވަހު ހުށަހެޅުއްވި މައްސަލަ ދިރާސާކުރުމަށްފަހުއެވެ.
އެފްއޭއެމުގެ ކުރީގެ ރައީސް އަލީ އާޒިމް މި މައްސަލަ ހުށަހަޅުއްވީ ރާއްޖޭގައި ކުޅިވަރު ދާއިރާގައި ހަރަކާތްތެރިވާ ކުލަބު ޖަމުޢިއްޔާތަކާއި، އެސޯސިއޭޝަން އަދި ފެޑެރޭޝަންތައް ރެގިއުލޭޓްކޮށް ފާރަވެރިވުމަށާއި، ކުޅިވަރާއި ބެހޭ ޤާނޫނުގެ ދަށުން ގާއިމުކުރެވިފައިވާ ގަވާއިދުތަކާއި، އުސޫލުތަކާއި، ސިޔާސަތުތައް ތަންފީޒުކުރުމުގެ މަސްއޫލިއްޔަތު ޤާނޫނީ ގޮތުން މަތިކޮށްފައިވާ ފަރާތްތަކުން، އެ ފަރާތްތަކުގެ ޤާނޫނީ މަސްއޫލިއްޔަތު ފުރިހަމަ ގޮތުގައި އަދާކުރަމުން ނުގެންދާތީ، މިހާރަށްވުރެ ބޮޑަށް ދައުލަތުން އެ ފަރާތްތަކަށް ސަމާލުކަން ދިނުމަށް އެދިއެވެ.
އަދި ދައުލަތުގެ ފެންވަރުގައި ރާއްޖޭގައި ވާދަވެރިކޮށް ކުޅޭ އެންމެހާ ކުޅިވަރުތައް ބައިނަލްއަގުވާމީ، ގައުމީ އަދި ރަށު ފެންވަރުގައި ކުރިއެރުވުމަށް ހިންގޭ ހަރަކާތްތައް އެއްވެސް ތަފާތު ކުރުމެއްނެތި ހުރިހާ މީހުންނަށް ބައިވެރިވެވޭ ކުޅިވަރު ހަރަކާތްތަކެއްކަން ކަށަވަރު ކޮށްދިނުމަށް މިހާރަށްވުރެ ހަރުދަނާ މަސައްކަތްތަކެއް ކުރުމަށްވެސް އާޒިމް ވަނީ އެދިވަޑައިގެންފައެވެ.
އެއާއެކު މަޖިލީހުގެ އިޖުތިމާޢީ ކޮމިޓީން މި މައްސަލަ ދިރާސާކުރިއިރު، އެ ކޮމިޓީން މީގެ ކުރިން ވަނީ މި މައްސަލައިގައި ކުޅިވަރާ ބެހޭ ވަޒީރު އަޙްމަދު މަޙްލޫފާއި، އެފްއޭއެމުގެ ރައީސް ބައްސާމް އަދީލް ޖަލީލުވެސް ކޮމިޓީއަށް ހާޒިރުކޮށް މަޝްވަރާކޮށްފައެވެ.
އެއަށްފަހު ބުދަ ދުވަހު ކޮމިޓީން މަޖިލީހުގެ ތަޅުމަށް ހުށަހެޅި ރިޕޯޓުގައި ބުނެފައިވަނީ ކުޅިވަރުގެ މައިދާނުގައި އުފެދޭ މައްސަލަތަކާއި ޚިޔާލުތަފާތުވުންތައް ކުޑަކުރުމަށްޓަކައި، ކުޅިވަރުގެ ޤާނޫނުގެ ދަށުން އުފައްދަންޖެހޭ ސްޕޯޓްސް އާބިޓްރޭޝަން ޕެނަލް އުފެއްދުމަށް މަތިކޮށްފައިވާ ފަރާތްތަކުން އެކަން ޤާނޫނުގައިވާ ގޮތުގެ މަތިން ކުރިއަށް ގެންދެވުމަށާއި، އެކަމާ ގުޅުންހުރި ގަވާއިދުތަކާއި އުސޫލުތައް ވީއެންމެ އަވަހަށް ހެދުމުގެ މަސައްކަތްކުރަން އަންގާ ކަމަށެވެ.
އަދި އަތޮޅާއި ރަށު ފެންވަރުގައި ކުޅޭ ކުލަބުތަކަށްވެސް ހަމަހަމަ ފުރުސަތުތަކެއް ހޯދައިދިނުމަށް ބާރުއަޅައި، ކުޅިވަރުގެ ރޫޙު ނުގެއްލޭނެފަދަ ގޮތަކަށް ކަންކަން އިންތިޒާމުކޮށް ރޭވުމަށްވެސް މި ރިޕޯޓުގައި ވަނީ ހިމަނާފައެވެ.
ބުދަ ދުވަހުގެ ޖަލްސާގައި އިޖުތިމާޢީ ކޮމިޓީން އެކުލަވާލި ރިޕޯޓު ތަޅުމަށް ހުށަހެޅިއިރު، މި ރިޕޯޓު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 34 މެންބަރުންގެ އިއްތިފާގުންނެވެ.
