ޕާމް ބީޗް ސްޕޯޓްސް ކްލަބް ފައިނަލަށް ދަތުރު ކޮށްފި

ޕާމް ބީޗް ރިސޯޓް އެންޑް ސްޕާއިން އިންތިޒާމު ކޮށްގެން ކުރިއަށް ގެންދާ ޕާމް ބީޗް ސޮކާ ކަޕްގެ ފައިނަލުގެ ފުރަތަމަ ޖާގަ، ޕާމް ބީޗް ސްޕޯޓްސް ކްލަބުން ހޯދައިފިއެވެ.

ޕާމް ބީޗް ސްޕޯޓްސް ކުލަބުން ފައިނަލުގެ ފުރަތަމަ ޖާގަ ކަށަވަރު ކުރީ. ސެމީގެ ފުރަތަމަ މެޗުގައި އައިޑިއަލް މޫވްމެންޓްގެ މައްޗަށް 5-4 އިން ކުރި ހޯދައިގެންނެވެ.

ވާދަވެރި ކުޅުމެއް ދެޓީމުގެ ފަރާތުން ވެސް ފެނިގެންދިޔަ މި މެޗުގައި ޕާމް ބީޗް ސްޕޯޓްސް ކުލަބަށް ލަނޑުތައް ކާމިޔާބުކޮށްދިނީ އަބްދުލް ރަހީމް އަބޫބަކުރާއި، އިބްރާހިމް ވަހީދާއި، ގުރައިޝް އަބްދުލް ރައްޒާގް އެވެ. އަބްދުލް ރަހީމް އަބޫބަކުރު ދެ ލަނޑު ކާމިޔާބު ކޮށްދިންއިރު، އެޓީމުގެ އެއް ލަނޑަކީ ބައިކޮޅަށް ވަތް ލަނޑެކެވެ.

އައިޑިއަލް މޫވްމެންޓްސް އަށް ލަނޑުތައް ކާމިޔާބުކޮށްދިނީ ހުސައިން ޝަރީފް އާއި، އަހްމަދު މުބާހް އެވެ. އަހުމަދު މުބާހް ވަނީ 3 ލަނޑު ކާމިޔާބުކޮށް ހެޓްރިކް ހަދާފައެވެ.

މުބާރާތުގައި މާދަމާ ކުޅޭނީ ސެމީގެ 2 ވަނަ މެޗެވެ. ސެމީގެ ދެވަނަ މެޗުގައި ބައްދަލު ކުރާނީ ކޮކޫން ފުޓްބޯލް ޓީމާއި، ސްޕޯޓިން ވެކެންޒާއެވެ.

ދެ ގުރޫޕަކަށް ބަހާލައިގެން ކުރިއަށް ގެންދާ މި މުބާރާތުގައި ޖުމްލަ 7 ޓީމު ވާދަކުރެއެވެ. އެގޮތުން ގްރޫޕް "އޭ" ގައި ހިމެނެނީ ޕާމް ބީޗް ސޮކާ ކްލަބް އާއި، ހިންނަވަރު އެފްސީ އާއި، ސްޕޯޓިން ވެކެންޒާގެ އިތުރުން ކޭ ޔުނައިޓެޑެވެ. ގްރޫޕް "ބީ" ގައި ހިމެނެނީ ކޮކޫން ފޫޓްބޯލް ޓީމާއި، ކުރެއްދޫ އެފްސީ އާއި، އައިޑިއަލް މޫވްމެންޓްސް އެވެ.

ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހެޅިފައިވާ މި މުބާރާތުގައި ފެއާ ޕްލޭ ޓީމާއި، ޑްރީމް ޓީމާއި، އެންމެ ގިނަ ލަނޑު ޖަހާ ކުޅުންތެރިޔާ އާއި، މުޅި މުބާރާތުގެ އެންމެ މޮޅު ކުޅުންތެރިޔާވެސް ހޮވުމަށް ވަނީ ހަމަޖެހިފައެވެ.