ކްރިކެޓް ބޯޑް އޮފް މޯލްޑިވްސް އިން އިންތިޒާމްކޮށްގެން ކުރިއަށްގެންދާ 35 ވަނަ ލިމިޓެޑް އޯވާރ ކްރިކެޓް މުބާރާތުގެ ދެވަނަ ޑިވިޝަންގައި މާލޭ ސްޕޯޓްސް ކްލަބާއި ސީބީއެލް ބައްދަލުކުރި މެޗު ސީބީއެލް އިން ކާމިޔާބުކޮށްފިއެވެ.

މާފަންނު ސްޓޭޑިއަމްގެ ކްރިކެޓް ކޯޓުގައި ހޮނިހިރު ދުވަހު ކުޅުނު މެޗު ސީބީއެލް އިން ކާމިޔާބުކުރީ ތިން ވިކެޓުންނެވެ.

މި މެޗުގެ ގުރު ދިމާވުމުން މާލޭ ސްޕޯޓްސް ގަސްދުކުރީ ކުޅުމަށެވެ. އެގޮތުން އެޓީމުން ވަނީ ކުޅެން އަރާ 40 އޯވަރުގެ ތެރޭގައި 7 ކުޅުންތެރިން ނުބައިވެގެން 179 ލަނޑު ހަދާފައެވެ.

އެޓީމުން އެންމެ ރަނގަޅަށް ކުޅުނީ 50 ބޯޅައިން 42 ލަނޑު ހެދި ޔޫސުފް އަޒިޔާން އާއި 52 ބޯޅައިން ނުބައިނުވެ 42 ލަނޑު ހެދި އިސްހާގު މުޒައްމިލް އެވެ.

ސީބީއެލް އިން އެންމެ ރަނގަޅަށް އުކީ 8 އޯވަރު 23 ލަނޑަށް 2 ވިކެޓް ނެގި މުހައްމަދު އަކްރަމް އެވެ.

ޖަވާބުގައި ސީބީއެލް އިން ވަނީ ކުޅެން އަރާ 37 ވަނަ އޯވަރުގައި 7 ކުޅުންތެރިން ނުބައިވެގެން 182 ލަނޑު ހަދާފައެވެ. އެގޮތުން އެޓީމުގެ މަހުމޫދު ރިޔާޒް 73 ލަނޑު ހެދިއިރު އަހުމަދު ފިރާޒް ވަނީ 35 ލަނޑު ހަދާފައެވެ.

މެޗުގައި މާލޭ ސްޕޯޓްސް އިން އެންމެ ރަނގަޅަށް އުކީ 7 އޯވަރު 32 ލަނޑަށް 3 ވިކެޓް ނެގި މުހައްމަދު މަފާޒު އެވެ.

މުބާރާތުގައި މިހާތަނަށް ހަތަރު މެޗު ކުޅެ ނިމުނުއިރު، ކޮމެޓް ވަނީ ދެ މެޗުން މޮޅުވެ 6 ޕޮއިންޓް ހޯދާފައެވެ. އަދި ސީބީއެލް ވެސް ވަނީ ދެ މެޗު ކުޅެ 6 ޕޮއިންޓް ހޯދާފައެވެ. މީގެ އިތުރުން މާލޭ ސްޕޯޓްސް އާއި ދިވެހި ސިފައިންގެ ކްލަބު އަދި ވެސްޓް ސްޕޯޓްސް އަށް ޕޮއިންޓެއް ލިބިފައެއް ނުވެއެވެ.

މި މުބާރާތުގައި ދެން އެންމެ އަވަހަށް މެޗެއް ކުޅުމަށް ހަމަޖެހިފައި ވަނީ އަންނަ މެއި މަހުގެ 5 ވަނަ ދުވަހުއެވެ. އެ މެޗުގައި ބައްދަލުކުރާނީ ދިވެހި ސިފައިންގެ ކްލަބާއި ވެސްޓް ސްޕޯޓްސް ކްލަބެވެ.