އެމްއެސް ހެލްޕިންގް ހޭންޑްސް ސްޕޯރޓްސް އެކަޑަމީ އާއި ސީބީއެލް ސްޕޯޓްސް ފައިނަލަށް

ކްރިކްޓް ބޯޑް އޮފް މޯލްޑިވްސް އިން އިންތިޒާމުކޮށްގެން ކުރިއަށް ގެންދާ އެލިޔާ 19 އަހަރުން ދަށުގެ ޕްރެސިޑެންޓް ކަޕްގެ ފައިނަލަށް އެމްއެސް ހެލްޕިންގް ހޭންޑްސް ސްޕޯރޓްސް އެކަޑަމީ އާއި ސީބީއެލް ސްޕޯޓްސް ދަތުރުކޮށްފިއެވެ.

މި މުބާރާތުގެ ފައިނަލަށް މިދެޓީމް ދަތުރުކުރީ ލީގު އުސޫލުން ކުޅުމަށްފަހު އެންމެ ގިނަ ޕޮއިންޓް ލިބިފައިވާތީއެވެ. މުބާރާތުގައި ލީގު އުސޫލުން ކުޅުނު އެންމެ ފަހު މެޗުގައި ބުރާސްފަތި ދުވަހު ބައްދަލުކޮށްފައިވަނީ ސީބީއެލް ސްޕޯޓްސް އާއި މާލެ ސްޕޯޓްސްއެވެ. މި މެޗު 6 ވިކެޓުން ކާމިޔާބުކުރީ ސީބީއެލް ސްޕޯޓްސްއެވެ.

މި މެޗުގައި ޓޮސް ލިބިގެން މާލެ ސްޕޯޓްސް އިން ނިންމީ ކުޅޭށެވެ. އެގޮތުން އެޓީމުން ވަނީ ކުޅެންއަރާ 37 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން 121 ލަނޑު ހަދާފައެވެ. އެޓީމުން އެންމެ ރަނގަޅަށް ކުޅުނީ މެޗުގައި އެންމެ ގިނަ ލަނޑުހެދި ކުޅުންތެރިޔާގެ މަގާމު ހޯދި މާލެ ސްޕޯޓްސްގެ ސަކިންދަރެވެ. އޭނާވަނީ 71 ލަނޑު ހަދާފައެވެ.

ޖަވާބުގައި ސީބީއެލް ސްޕޯޓްސް އިން ކުޅެން އަރާ އެޓީމުން ވަނީ 19 އޯވަރުގެ ތެރޭގައި 122 ލަނޑު ހަދާ މެޗު ކާމިޔާބުކޮށްފައެވެ. ސީބީއެލް ޓީމުން އެންމެ ގިނަ ލަނޑުހެދީ 50 ބޯޅައިން 57 ލަނޑުހެދި ހުސެއިން މަފާޒެވެ. މެޗުގައި އޭނާ ވަނީ 2 ވިކެޓުވެސް ނަގާފައެވެ. މީގެ އިތުރުން މެޗުގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައިވަނީ މަފާޒެވެ. މިއަދުގެ މެޗުގެ އެންމެ މޮޅު އުކުންތެރިއަކަށް ހޮވިފައިވަނީ ޔޫސުފް އަޒިއާން ފަރުހަތު ޖަލީލެވެ. އޭނާ ވަނީ މެޗުގައި 4 ވިކެޓުނަގައި ހެޓްރިކެއްވެސް ހަދާފައެވެ.

އެމްއެސް ހެލްޕިންގް ހޭންޑްސް ސްޕޯރޓްސް އެކަޑަމީ އާއި ސީބީއެލް ސްޕޯޓްސް ބައްދަލުކުރާ މުބާރާތުގެ ފައިނަލް މެޗް ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހު ހެންދުނު 09:00 ގައި ކުޅިވަރު އެކުވެނީގެ އެއް ނަމްބަރު ކުރިކެޓް ދަނޑުގައެވެ. ފައިނަލް މެޗަށްފަހު މުބާރާތުގެ އިނާމް ދިނުމުގެ ރަސްމިއްޔާތުވެސް ހަމަ އެދުވަހު ކުރިއަށްދާނެ ކަމަށް ކްރިކެޓް ބޯޑް އޮފް މޯލްޑިވްސް އިން މައުލޫމާތުދެއެވެ.