ގއ. ވިލިނގިލި ކޮވިޑް ފެސިލިޓީގައި ކޮވިޑް-19ށް ފަރުވާ ހޯދަމުންދިޔަ މީހަކު ނިޔާވެއްޖެއެވެ.

ގއ. ވިލިނގިލި ހޮސްޕިޓަލްގެ މެނޭޖަރ ޝަރީފް އަހުމަދު ރާއްޖެޓީވީ އަށް މައުލޫމާތު ދެއްވި ގޮތުގައި އަންގާރަ ދުވަހު ނިޔާވެފައި ވަނީ އުމުރުން 77 އަހަރުގެ ދިވެހި ފިރިހެނެކެވެ. އެއީ ގއ. ދެއްވަދޫ، އުތުރުގެ، ތުއްތު އިބްރާހިމް އެވެ. މިއީ ރާއްޖެއިން ކޮވިޑް-19 ގައި ނިޔާވި 56 މީހާއެވެ.

ޝަރީފް ވިދާޅުވީ ކޮވިޑް-19 އަށް ޕޮޒިޓިވްވެގެން ދެއްވަދޫ ހޮސްޕިޓަލްގައި ތުއްތު އިބްރާހީމަށް ފަރުވާދެމުން ދަނިކޮށް، ހާލު ދެރަވުމުގެ ސަބަބުން ޖެނުއަރީ 13 ވަަނަ ދުވަހު ވިލިގިނލި ކޮވިޑް ފެސިލިޓީއަށް ގެނަސް ފަރުވާދެމުން ދިޔަ ކަމަށެވެ. އަދި އަމިއްލަ އަށް ނޭވާލުމަށް އުނދަގޫވުމާއިއެކު 26 ޖެނުއަރީގައި ވެންޓިލޭޓަރަށް ލައި ފަރުވާދެމުން ދިޔަ ކަމަށް އޭނާ ވިދާޅުވިއެވެ.

ޝަރީފް ވިދާޅުވީ، ނިޔާވި މީހާއަކީ މީގެ 15 އަހަރު ކުރިން ސްޓްރޯކެއް ޖެހި އެނދުމަތިވެފައިވާ މީހެއް ކަމަށެވެ.

ރާއްޖެއިން ޖުމްލަ 16،909 މީހުން ކޮވިޑް-19 އަށް ޕޮޒިޓިވްވެފައިވާ އިރު، ބަލިޖެހުނު 14،772 މީހުން ވަނީ ބަލިން ރަނގަޅުވެފައެވެ.