އިސްލާމްދީނުގެ އަސްލަކާ ޚިލާފު ވާހަކައެއް މަޖިލީހުގައި ނުދެއްކޭނެ، އެފަދަ ވާހަކައެއް ނުދައްކާ: ރައީސް ނަޝީދު
ބަޔާނުގައި ބުނެފައިވަނީ ދީނުގެ ހުކުމްތައް ބަޔާންކުރުމަކީ ދީނުގެ އިލްމު އުގެނިގެން ތިބި ދީނީ ނަސޭހަތްދިނުމާއި ވައުޟު ބުނުމުގެ ހުއްދަ ލިބިފައިވާ އިލްމުވެރިންގެ ޒިންމާއެއްކަމަށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
އިސްލާމްދީނުގެ އަސްލަކާ ޚިލާފު އެއްވެސް ވާހަކައެއް ރައްޔިތުންގެ މަޖިލީހުގައި ނުދެއްކޭނެކަމަށާއި އެފަދަ ވާހަކައެއް މަޖިލީހުގައި ނުދައްކާކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
މާލޭގައި ޒުވާނުންނަށް ފަސޭހަކަމާއެކު މިޔުޒިކު އަޑުއަހާލައި، އެކުވެރިންނާ ބައްދަލުކޮށް ހާސްކަމުން ބޭރުގައި އުފާވެރި މާހައުލެއްގައި ހީނ ސަމާސާކޮށް މަޖާކޮށްލައި އެއްވެ ތިބެވޭނެ ފަދަ މަރުކަޒެއް ގާއިމުކޮށްދިނުމަށް އެދި ހެންވޭރު ހުޅަނގު ދާއިރާގެ މެމްބަރ ހަސަން ލަތީފު ވަނީ ހޯމަ ދުވަހުގެ ޖަލްސާއަށް ގަރާރެއް ހުށަހަޅުއްވާފައެވެ. އެގަރާރުގެ ބަހުސް ހޯމަ ދުވަހުގެ ޖަލްސާގައި ކުރައްވާފައިވާއިރު މިޔުޒިކާއި ގުޅޭގޮތުން މެމްބަރުން ދެއްކެވި ވާހަކަފުޅުތަކާއި ގުޅިގެން ރާއްޖޭގެ ބައެއް ދީނީ އިލްމުވެރިންނާއި ބައެއް އާންމުންގެ ނުރުހުން ވަނީ ބައެއް މެމްބަރުންނަށް އަމާޒުވެފައެވެ.
އަންގާރަ ދުވަހުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ގަރާރުގެ ބަހުސް ފެށުމާ ގުޅިގެން މިނިސްޓްރީ އޮފް އިސްލާމިކް އެފެއަރޒުން ބަޔާނެއް ނެރުއްވާފައިވާ ކަމަށެވެ. މިބަޔާނުގައި ބުނަނީ ދީނުގެ ހުކުމްތައް ބަޔާންކުރުމަކީ ދީނުގެ އިލްމު އުގެނިގެން ތިބި ދީނީ ނަސޭހަތްދިނުމާއި ވައުޟު ބުނުމުގެ ހުއްދަ ލިބިފައިވާ އިލްމުވެރިންގެ ޒިންމާއެއްކަން ފާހަގަކޮށްދެއްވާފައިވާ ކަމަށް ރައީސް ނަޝީދު ވިދާޅުވިއެވެ.
މިގަރާރުގެ ބަހުސް އަންގާރަ ދުވަހުގެ ޖަލްސާގައި އަންނަނީވެސް ކުރަމުންނެވެ.
