މަޖިލީހުގައި މަޝްވަރާގެ އުސޫލެއް ނެތް، މަސީހު މަގާމުން ދުރުކުރަންޖެހޭ:ޑރ. މަޖީދު
ގިނަ ގާނޫނުތަކަށް ގެނެސްފައިވަނީ އިސްލާހެއް ނޫން
ޑރ. އަބްދުލްމަޖީދު އަބްދުލްބާރީ: އިދިކޮޅު އިއްތިހާދުން މ.ކުނޫޒުގައި ބޭއްވި ޖަލްސާގައި ވާހަކަ ދައްކަވަނީ
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދު މަގާމުން ވަކިކުރުމަށް ރާއްޖޭގެ މަޝްހޫރު ދީނީ އިލްމުވެރިޔާ އަދި ކުރީގެ އިސްލާމިކް މިނިސްޓަރު ޑރ. އަބްދުލްމަޖީދު އަބްދުލްބާރީ ގޮވާލައްވައިފި އެވެ.
ޑރ. މަޖީދު އެގޮތަށް ގޮވާލައްވާފައި ވަނީ އިދިކޮޅު އިއްތިހާދުން, ޖުމްހޫރީ ޕާޓީގެ މައި ޖަގަހަ، މ. ކުނޫޒުގައި ހޮނިހިރު ދުވަހުގެ ރޭ ބޭއްވި ހާއްސަ ޖަލްސާއެއްގަ ވާހަކަ ދައްކަވަމުން ނެވެ.
ޑރ. މަޖީދު ވިދާޅުވީ ރާއްޖޭގެ ކުރީގެ ދެ ރައީސުން ކަމަށްވާ ކުރީގެ ރައީސް މައުމޫން އަބްދުލްގައްޔޫމާއި ކުރީގެ ރައީސް މުހައްމަދު ނަޝީދުގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބްރާހީމް އަދި ރާއްޖޭގެ ސިޔާސީ ގިނަ ލީޑަރުން އެކުވެ، އުފައްދާފައިވާ އިއްތިހާދުން މިހާރު ކުރަމުންދާ މައްސަކަތްތަކަށް ތާއީދު ކުރައްވާ ކަމަށެވެ. އަދި ރައްޔިތުންގެ މަޖިލީހުގެ ރައީސް މަސީހުގެ އިތުބާރު ނެތްކަމުގެ ވޯޓް ނަގަންޖެހޭ ކަމަށް ގަބޫލު ކުރައްވާ ކަމަށާއި މަސީހު މަގާމުން ދުރުކޮށް، ގައުމު ހަމަމަގަށް އަޅުވަންޖެހޭ ކަމަށްވެސް މަޖީދު ވިދާޅުވި އެވެ.
ރައްޔިތުންގެ މަޖިލީހުގެ ރައީސްކަމުގެ މަގާމުގައި މަސީހު އިންނަވައި ގާނޫނުއަސާސާ އާއި ގާނޫނުތަކަށް ބޮޑެތި ބަދަލުތައް ގެނެސްފައިވާ ކަމަށާއި އެބަދަލުތައް ނެގެސްފައިވަނީ އިސްލާމުދީނުގައި ބާރުއަޅާފައިވާ އަދި މަޖިލީހުގެ ޝިއާރު ކަމަށްވާ މަޝްވަރާގެ ރިވެތި އުސޫލުން ނޫން ޑރ. މަޖީދު ވިދާޅުވި އެވެ.
ސުޕްރީމް ކޯޓުގެ ކުރީގެ އުއްތަމަ ފަނޑިޔާރު އަހުމަދު ފާއިޒު ހުސައިން އާއި ފަނޑިޔާރު މުއަތަސިމް އަދުނާނު ފަނޑިޔާރު ކަމުން ވަކިކުރުމާއި ކުރީގެ އޮޑިޓަރ ޖެނެރަލް ނިޔާޒު އިބްރާހީމް މަގާމުން ވަކިކުރުމާއި ގާނޫނުއަސާސީއަށް ގެނެސްފައިވާ ބަދަލުތަތަކަކީ 24 ގަޑިއިރުގެ ތެރޭގައި ގާނޫނުތަކަށް ގެނެސްފައިވާ، ކުއްލި އަދި މަޝްވަރާ ކުރުމެއް ނެތި މަޖިލީހުން ނިންމާފައިވާ ނިންމުންތަކެއް ކަމަށް ފާހަގަ ކުރައްވަމުން މަޖީދު ވިދާޅުވީ އެއީ ގާނޫނުތަކަށް ގެނެސްފައިވާ އިސްލާހެއް ކަމަށް ބުނި ނަމަވެސް އެއީ އިސްލާހެއް ނޫން ކަމަށެވެ.
ގާނޫނަށް އިސްލާހަކަށް އިސްލާހު ގެނައުމޭ ބުނެވޭނީ، އެ އިސްލާހަކުން ހެޔޮ ބަދަލެއް ފެންނަ ނަމަކަމަށާއި އެހެންކަމުން އެގާނޫނުތަކަށް ގެނެސްފައިވަނީ އިސްލާހެއް ކަމަށް ގަބޫލެއް ނުކުރެވޭ ކަމަށާއި އެއީ ސިޔާސީ ގޮތުން ބަޔަކު މަންފާއެއް ހޯދުމަށް ގާނޫނަށް ގެނެސްފައިވާ ބަދަލެއް ކަމަށް ވެސް މަޖީދު ވިދާޅުވި އެވެ.
