އެޗްއާރުސީއެމްއަށް ބޭފުޅަކު އައްޔަނުކުރުމަށް ނަން ދިރާސާކުރުމަށް ކޮމިޓީއަށް
9 ފެބުރުއަރީ 2021 | އަންގާރަ 05:35ރައީސް ފޮނުއްވާފައިވަނީ ށ ކޮމަންޑޫ އޭރީޒް އައިޝަތު ލީޒާގެ ނަން
އެޗްއާރުސީއެމްގެ ލޯގޯ
ހިޔުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)އަށް މެމްބަރަކު އައްޔަނުކުރުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ ނަންފުޅު ދިރާސާކުރުމަށް ހިއުމަން ރައިޓްސް އެންޑް ޖެންޑަރ ކޮމިޓީއަށް ފޮނުއްވައިފިއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވަނީ އެޗްއާރުސީއެމްއަށް މެމްބަރަކު އައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ ސިޓީފުޅު އަމީން އާންމު ފާތުމަތު ނިއުޝާ މަޖިލީހުގެ ޖަލްސާގައި އިއްވަވާފައެވެ. ރައީސް މިކަމާ ގުޅިގެން ފޮނުއްވާފައިވާ ސިޓީފުޅުގައި ވަނީ މި ދިޔަ އަހަރުގެ ސެޕްޓެމްބަރ މަހުގެ 12 ވަނަ ދުވަހު އެޗްއާރުސީއެމްގެ މެމްބަރެއްގެ މަގާމުގެ މުއްދަތު ހަމަވެފައިވާތީ އެމަގާމަށް ކުރިމަތިލުމަށް ހުޅުވާލި ފުރުސަތުގައި އެކަމަށް އެދި ހުށަހެޅި ފަރާތްތަކުގެ ތެރެއިން ރައީސްއަށް ފެނިވަޑައިގަންނަވާ ނަންފުޅެއް ފޮނުއްވާކަމަށެވެ.
އެގޮތުން ރައީސް ފޮނުއްވާފައިވަނީ ށ ކޮމަންޑޫ އޭރީޒް އައިޝަތު ލީޒާގެ ނަމެވެ. އެނަމާއެކު މިކަމަށް ކުރިމަތިލި އިތުރު ފަރާތްތަކުގެ ނަންތައް ވެސް ފޮނުއްވާފައިވާކަމަށް ރައީސްގެ ސިޓީފުޅުގައިވެއެވެ.
އެޗްއާރުސީއެމްގައި މިހާރު ތިއްބަވަނީ އާމިނަތު ޝަފާޢަތު ޢަބްދުއްރައްޒާޤާއި, މުއުމިނާ ވަޙީދުގެ އިތުރުން ޑރ. އަޙްމަދު އަދުހަމް ޢަބްދުﷲ އަދި މަރިޔަމް މުނާ އެވެ. އެޗްއާރުސީއެމްގައި 5 މެމްބަރުން ތިއްބަވަންޖެހެއެވެ.
