އިސްލާމީ ދައުލަތްތަކުގެ ޒަމާނުގެ މިޔުޒިކްތަކުން އެ ދައުލަތްތަކަށް އެއިރުގެ މީހުން އިތުރަށް ހިތްކިޔާ ގޮތްވެސްވި - އީވާ
އުމަވީ ދައުލަތާއި އައްބާސީ ދައުލަތަކީ އިސްލާމީ މިޔުޒިކްގެ ރަންޒަމާން ކަމަށް އީވާ ވިދާޅުވި
އީވާ އަބްދުﷲ/ ގަލޮޅު އުތުރު ދާއިރާގެ މެމްބަރ
މިޔުޒިކަކީ ދުނިޔެ އުޖާލާކުރާއިރު އިންގިލާބުވެސް ކުރާ އެއްޗެއްކަމަށާއި މިޔުޒިކް ކަންފަތުގައި ޖެހުމުން އެއަޑުއަހާ މީހާ އާއި ދުނިޔެ އެއްކޮށް ބަދަލުކޮށްލާ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރ އީވާ އަބްދުﷲ ވިދާޅުވެއްޖެއެވެ.
މާލޭގައި ޒުވާނުންނަށް ފަސޭހަކަމާއެކު މިޔުޒިކު އަޑުއަހާލާއި، އެކުވެރިންނާ ބައްދަލުކޮށް ހާސްކަމުން ބޭރުގައި އުފާވެރި މާހައުލެއްގައި ހީނ ސަމާސާކޮށް މަޖާކޮށްލައި އެއްވެ ތިބެވޭނެ ފަދަ މަރުކަޒެއް ގާއިމުކޮށްދިނުމަށް އެދި ހެންވޭރު ހުޅަނގު ދާއިރާގެ މެމްބަރ ހަސަން ލަތީފު ވަނީ ހޯމަ ދުވަހުގެ ޖަލްސާއަށް ގަރާރު ހުށަހަޅުއްވާފައެވެ. މިގަރާރަށް ބަހުސްކުރުމަށް ހުޅުވާލި ފުރުސަތުގައި ވާހަކަދައްކަވަމުން އީވާ ވަނީ ދުނިޔެ ދެކެފައިވާ ބޮޑެތި ބަދަލުތައް ގެނައުމުގައި މިޔުޒިކް ކުޅެފައިވާ ރޯލާއި ދިވެހި މިޔުޒިކް ކުޅޭ ފަރާތްތަކަށް ފުރުސަތު ދޭންޖެހޭކަމަށް ވިދާޅުވެ ވާހަކަދައްކަވާފައެވެ.
އެގޮތުން އީވާ ވިދާޅުވީ ގައުމެއްގެ ރޫހު ބިނާވެގެންދަނީ އެތައް ކަމެއްގެ މައްޗަށްކަމަށާއި ގައުމެއްގެ ސަގާފަތާއި އާދަކާދަޔާ އެއީ ގައުމެއްގެ ރޫހު ގެނެސްދޭ ކަންކަން ކަމަށެވެ. އަދި ސަގަފާތާއި އާދަކާދައިގެ ތެރޭގައި މިޔުޒިކާއި ލަވަޔާއި ޅެމާއި ވާހަކައާއި ތަމްސީލާ ހިމެނޭއިރު މިއެއްޗިއްސާ ނުލާ ގައުމެއްގެ ސަގާފަތެއް އަދި ގައުމެއްގެ ތަރިކައެއް އަދި ގައުމެއްގެ ރޫހެއްވެސް ނޯންނާނެކަމަށެވެ. 1500 ބީސީން ފެށިގެން އިންސާނުން މިޔުޒިކް ގެންގުޅޭ ކަމަށާއި ފުރަތަމަ މިޔުޒިކެއްގެ ގޮތުގައި ގެންގުޅުނީ އިންސާނާގެ އަޑުކަމަށް އީވާ ވިދާޅުވިއެވެ.
އޭރުއްސުރެ މިޔުޒިކް ބޭނުންކުރަމުންދާއިރު އުމަވީ ދައުލަތާއި އައްބާސީ ދައުލަތަކީ އިސްލާމީ މިޔުޒިކްގެ ރަންޒަމާން ކަމަށް އީވާ ވިދާޅުވިއެވެ.
އީވާ ވިދާޅުވީ ދުނިޔޭގައި މީގެކުރިން ހިނގާފައިވާ ކަންކަމާމެދު ހިތްހަމަނުޖެހިގެން އެކަންކަން އެންމެ ބޮޑަށް ހާމަކުރަމުންދިޔައީ މިޔުޒިކްގެ ޒަރީއާއިން ކަމަށެވެ. އެގޮތުން 1960 އަދި 1970ގެ އަހަރުތަކުގައި އެމެރިކާ އާއި އިނގިރޭސިވިލާތުގައި ޕަންކް ރޮކުން އޭރުގެ ޒުވާނުންގެ ހިތްހަމަނުޖެހުން ސަރުކާރުތަކަށާއި އޭރު ދުނިޔޭގައި ހިނގަމުންދިޔަ ކަންކަމަށް ދޭހަކޮށް ދެމުން ގެންދިޔަކަމަށެވެ.
އަދި ދެކުނު އެފްރިކާގެ ނަސްލީ އިމްތިޔާޒާދެކޮޅަށް މަސައްކަތްކުރުމަށް ހިތްވަރުދިނީ މިޔުޒިކްގެ ޒަރީއާއިން ކަމަށް އީވާ ވިދާޅުވިއެވެ.
އީވާ ވިދާޅުވީ ރާއްޖެއަށް ބަލާއިރު 7 ފެބްރުއަރީގައި ވެރިކަން ވެއްޓި ޖެހިގެން އައި ފެބްރުއަރީ 8 ވަނަ ދުވަހަކީ ހިތްވަރާއެކު ތެދުވި ދުވަސްކަމަށެވެ. އެދުވަހު ހިތްވަރާއެކު ނިކުތީ ޝިއުޒް ނިކުމެ ޗިސްޗިސްކޮށްލިޔަސް، މަފިސްފިސްކޮށްލިޔަސް ނެތޭ ވެވޭކަމަށް ބާޣީއަކަށް ލަވަޔަކުން ބުނުމުން ކަމަށެވެ.
އީވާ ވިދާޅުވީ 2020 ވަނަ އަހަރު ދުނިޔެއަށް ދިމާވި ޕެންޑަމިކްގައިވެސް ސްޕެއިން، އިޓަލީ ފަދަ ތަންތަނުން މީހުން ބެލްކަންޏަށް ނިކުމެ ލަވަކިޔުމުން ހިތްވަރު ލިބިގެންދިޔަ ކަމަށެވެ.
އީވާ ވިދާޅުވީ ދިވެހި ޒުވާނުންނަށް އަދި މިޔުޒިކް ކުޅޭ މީހުންނަށް އެހިތްވަރާއި އެޖާގަ ދޭންޖެހޭ ކަމަށެވެ.
އީވާ ވިދާޅުވީ ކުރިން މާލޭގެ މަގުމަތީން އިވުނު ލަވަތަކުން އޭރުގެ މީހުންގެ ދިރިއުޅުން އުޖާލާވި ގޮތަށް އެފުރުސަތު މިއަދުގެ ޖީލަށްވެސް ލިބިގެންދާންޖެހޭ ކަމަށެވެ.
