އިސްލާމީ ރިސާލަތު ފަތުރާ، ދީނަށް ލޯބިކުރާ ބަޔަކުކަމުގައިވުމަށް ރައީސް އިލްތިމާސް ކުރައްވައިފި

އިސްލާމީ މަތިވެރި ހިދާޔަތުގައި ދެމިތިބެ، އިސްލާމީ ރިސާލަތު ފަތުރާ، އަދި އެ ދީނަށް ލޯބިކުރާ ބަޔަކުކަމުގައިވުމަށް ރައީސުލް ޖުމްހޫރިއްޔާ އަބްދުﷲ ޔާމިން އަބްދުލް ގައްޔޫމް އިލްތިމާސް ކުރައްވައިފި އެވެ.

ކީރިތި ރަސޫލާގެ އީދު މީލާދީއާ ގުޅިގެން ރައީސް އަބްދުﷲ ޔާމިން ފޮނުއްވެވި ހިތާބުގައި މި ދުވަހާ ގުޅިގެން ދުނިޔޭގެ ކަންކޮޅުތަކުގައި ދިރިއުޅޭ މުސްލިމުންނަށް އެމަނިކުފާނު ވަނީ ދުވަހުގެ ތަހްނިޔާ ފޮނުއްވާފަ އެވެ.

މާތްވެގެންވާ އިސްލާމްދީނަކީ، އެންމެފުރިހަމަ ދީން ކަމަށާއި އެއީ ހުރިހާ ޒަމާންތަކަށާއި ހުރިހާ ތަނަކަށް އެކަށީގެންވާ ގޮތުގައި ﷲ ފޮނުއްވި މާތް ހިދާޔަތެއްކަން ފާހަގަ ކުރައްވާފައިވާ އެމަނިކުފާނު ވިދާޅުވީ "އަޅުގަނޑުމެން ކުރިއަރައިދާނީ، އިސްލާމީ ރިވެތި އުޞޫލުތަކުގައި ހިފަހައްޓައިގެން، އެ މާތް ނަބިއްޔާ ދެއްކެވި މާތް ހިދާޔަތުގައި ދެމިތިބެގެން ކަމާމެދަކު ޝައްކެއްނެތް " ކަމަށެވެ.

އަދި އެހެންމެ މާތްﷲގެ ރިސާލަތު މީސްތަކުންގެ ތެރޭގައި ފެތުރުއްވުމުގައި ކީރިތި ރަސޫލާ صلّى اللّــه عليه وسلّم އަށް ކިތަންމެ ދަތިތަކަކާއި އުނދަގޫތަކެއް ތަޙަންމުލު ކުރައްވަން ޖެހިވަޑައިގެންނެވިނަމަވެސް، އެކަލޭގެފާނު އެ ދެއްކެވި ހިތްވަރުފުޅުގަދަކަމާއި ކެތްތެރިކަމުގެ ނަމޫނާއިން ދަސްކޮށްދެއްވީ ޢިބްރަތްތެރި ފިލާވަޅުތަކެއް ކަމަށް ވިދާޅުވެފައިވެ އެވެ.

"އޭގެ ނަތީޖާއަކަށްވީ، އިސްލާމީ އުންމަތަކީ މުޅިދުނިޔޭގެ އެންމެން ޤަދަރުކުރާ، އިޙުތިރާމުކުރާ، ޢިލްމީގޮތުންނާއި، ހުރިހާގޮތަކުން ވެސް ދުނިޔޭގެ އެންމެ ޝަރަފުވެރި، އެންމެމާތް އުންމަތް ކަމުގައިވުމެވެ." އެމަނިކުފާނުގެ ހިތާބުގައި ފާހަގަ ކުރައްވާފައިވެ އެވެ.

މީގެ އިތުރުން އެމަނިކުފާނު ވިދާޅުވީ ކީރިތި ރަސޫލާގެ ޢީދުމީލާދުގެ ޛިކުރާ އާކޮށް، އާލާކުރުމުގެ އެންމެބޮޑު ބޭނުމަކަށް ވާންޖެހެނީ ވެސް، އެކަލޭގެފާނުގެ ޙަޔާތްޕުޅުން ޢިބުރަތް ލިބިގަތުމާއެކު އެ މަތިވެރި ގޮތްތަކާއި އުޞޫލުތައް ދަސްކޮށް، އެކަލޭގެފާނު ދެއްކެވި މާތް ހިދާޔަތުގައި ދެމިތިބުން ކަމަށެވެ.

"އަޅުގަނޑުމެން ކުރިއަރައިދާނީ، އިސްލާމީ ރިވެތި އުޞޫލުތަކުގައި ހިފަހައްޓައިގެން، އެ މާތް ނަބިއްޔާ ދެއްކެވި މާތް ހިދާޔަތުގައި ދެމިތިބެގެން ކަމާމެދަކު ޝައްކެއްނެތެވެ.،" ރައީސް ވިދާޅުވި އެވެ.

ކީރިތި ރަސޫލާގެ އީދު މީލާދުގެ ގޮތުގައި ފާހަގަ ކުރަނީ ރަބީލްއައްވަލްމަހުގެ 12 ވަނަ ދުވަހެވެ. އެއީ އެކަލޭގެފާނު ދުނިޔޭގެ އަލިކަން ދެކެވަޑައިގެންނެވި ދުވަހެވެ.