ރޯދަ ހަދީޔާއެއްގެ ގޮތުގައި ސައުދީ އެމްބަސީން އިސްލާމީ މަރުކަޒުގައި ރޯދަ ވީއްލުން
މަގުޞަދަކީ ދެ ޤައުމުގެ ގުޅުން ބަދަހި ކުރުން
އިސްލާމީ މަރުކަޒު
ރާއްޖެއަށް ހަދިޔާކުރާ ރޯދަ ހަދިޔާއެއްގެ ގޮތުގައި މި ރަމަޟާން މަސް ނިމެންދެން ކޮންމެ ދުވަހަކުވެސް އިސްލާމީ މަރުކަޒުގައި ރޯދަ ވީއްލޭނެ އިންތިޒާމް ހަމަޖައްސައިދޭން، ރާއްޖޭގައި ހުންނަ ސައުދީ އަރަބިއާގެ އެމްބަސީން ނިންމައިފިއެވެ.
ސައުދީ އެމްބަސީގެ ރޯދަ ވީއްލުންތައް ބުރާސްފަތި ދުވަހު އިސްލާމީ މަރުކަޒުގައި ފަށާފައިވާއިރު، އެނގިފައިވާ ގޮތުގައި މިއީ ދެ ޤައުމުގެ ގާތް ގުޅުމުގެ ރަމްޒެއްގެ ގޮތުން، ސައޫދީ އަރަބިއްޔާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ބަދުރު އަލްޚައިރުގެ އިސް ނެންގެވުމާ އެކު ފައްޓާފައިވާ ކަމެކެވެ.
ސައުދީ އެމްބަސީން ބުނެފައިވާ ގޮތުގައި މިއީ ދިވެހިރާއްޖެއާއި މެދު ސައުދީން ގެންގުޅޭ ގާތްކަން އިތުރަށް ބަދަހި ކުރުމުގެ ނިޔަތުގައި ފަށާފައިވާ ކަމެކެވެ.
އިސްލާމީ މަރުކަޒުގައި ރޯދަ ވީއްލުން ހަމަޖެއްސުމުގެ އިތުރުން، މި ރަމަޟާން މަހާއި ދިމާކޮށް، ސައުދީ އެމްބަސީން ވަނީ ރާއްޖޭގެ ބައެއް ރަށްތަކުގެ މިސްކިތްތަކުގައި ކަދުރުވެސް ބަހާފައެވެ. އަދި ރަމަޟާން މަސް ފެށިގެން އައި އިރު ސައުދީ ސަރުކާރުން ވަނީ އެހެން އަހަރުތަކެކޭވެސް އެއްފަދައިން، ދިވެހި ރައްޔިތުންނަށް ބެހުމަށް 50 ޓަނުގެ ކަދުރު ދިވެހި ސަރުކާރާއި ހަވާލުކޮށްފައެވެ.
ސައުދީ ސަރުކާރާއި ދިވެހި ސަރުކާރާއި ދެމެދު އެކި ދާއިރާތަކުން ގުޅުން ބަދަހިވަމުންދާއިރު، ފަހަކަށް އައިސް ސައުދީ ސަރުކާރުގެ ނުފޫޒު ދިވެހި ސަރުކާރުގެ މައްޗަށް ވަރަށް ބޮޑު ވެފައިވާކަން ފާހަގަކުރެވެއެވެ.
