އިލެކްޝަންސް ކޮމިޝަން (އީސީ)ން ހުސްވެފައިވާ މަގާމަށް މެމްބަރަކު ޢައްޔަނުކުރުމަށް ހުޅުވާލި ފުރުޞަތުގައި ކުރިމަތިލީ މީހުންގެ ތެރެއިން ޑރ. މުހައްމަދު ޒާހިރު ހިމެނޭގޮތަށް 16 ނަމެއް ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ފޮނުވައިފިއެވެ.

ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވަނީ އީ.ސީ.އަށް މެމްބަރަކު ޢައްޔަނުކުރެއްވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ ސިޓީފުޅު އަމީން އާންމު ފާތުމަތު ނިއުޝާ އިއްވަވާދެއްވަވާފައެވެ. ރައީސުލްޖުމްހޫރިއްޔާގެ ސިޓީފުޅުގައި ވަނީ އީސީއަށް އައްޔަނުކުރުމަށްޓަކައި ހުޅުވާލި ފުރުޞަތުގައި އެކަމަށް ހުށަހެޅުއްވި ބޭފުޅުންގެ ތެރެއިން ރައީސް އިސްކަންދެއްވާ ބޭފުޅެއްގެ ގޮތުގައި ގ. މާލޭހިޔާ 8-13 ޑރ މުހައްމަދު ޒާހިރުގެ ނަންފުޅު ފޮނުވާކަމަށެވެ.

އަދި މިފުރުޞަތުގައި އެމަގާމަށް އެދި ހުށަހެޅި އިތުރު ފަރާތްތަކުގެ ނަންތައް ވެސް ފޮނުވާކަމަށް ރައީސް ވިދާޅުވިއެވެ. އީސީގެ މެމްބަރަކު ކަމަށް ދެން ކުރިމަތިލާފައިވަނީ 16 ފަރާތެކެވެ.

އީ.ސީ.އަށް މެމްބަރަކު މި ޢައްޔަނުކުރަނީ އީ.ސީ.ގެ ނައިބު ރައީސް ކަމުގެ މަގާމުގައި ހުންނެވި އަހުމަދު އަކްރަމް އެމަގާމުން މިިދިޔަ އަހަރުގެ ނޮވެމްބަރ މަހުގެ 19 ވަނަ ދުވަހު އިސްތިޢުފާ ދެއްވުމާއި ގުޅިގެންނެވެ. އަކްރަމް އިސްތިޢުފާދެއްވީ މަގާމުން ވަކިކުރުމަށް މިނިވަން މުއައްސަސާތަކުގެ ކޮމިޓީން ފާސްކޮށް އެމައްސަލަ ތަޅުމަށް ފޮނުވާފައިވަނިކޮށެވެ.

އަކްރަމް ވަކިކުރަން މަޖިލީހުގެ ތަޅުމަށް ފޮނުވަން ނިންމީ ސުލޫކީ މައްސަލައެއްގެ ސަބަބުން ކަމަށް އެކޮމިޓީގެ މުގައްރިރު ރޮޒައިނާ އާދަމް ވަނީ ވިދާޅުވެފައެވެ. އެގޮތުން މުވައްޒަފުންނާ ވާހަކަ ދެއްކުމުގައި ކޮމިޝަންގެ މެންބަރުން ހިފަހައްޓަން ޖެހޭ އަހުލާޤީ މިންގަނޑު ހިފަހައްޓާފައިނުވާކަމަށް ކޮމިޓީގެ މެންބަރުންނަށް ގަބޫލުކުރެވޭ ކަމަށް ރޮޒައިނާ ވަނީ ވިދާޅުވެފައެވެ.

އަކްރަމްގެ އިސްތިޢުފާގެ ސިޓީ ގައި ވިދާޅުވެފައިވަނީ މިނިވަން މުވައްސަސާތަކާ ބެހޭ ކޮމިޓީގެ އިތުބާރެއްނެތި މެންބަރުކަމުގައި ދެމިހުންނެވުމަކީ އެންމެ ރަނގަޅުގޮތެއް ކަމަށް ދެކެވަޑައިނުގަންނަވާ ކަމަށެވެ.

ރައީސުލްޖުމްހޫރިއްޔާއަށް އެޑްރެސް ކުރައްވާ ފޮނުއްވި ސިޓީގައި އަކްރަމް ވިދާޅުވީ އޭނާއާ ބެހޭގޮތުން ހުށަހެޅިފައިވާ މައްސަލައަކީ ކަނޑައެޅިގެން ހަޤީގަތާއި ޚިލާފު ވާހަކަތަކެއްގެ މައްޗަށް ބިނާކޮށް ހުށަހަޅާފައިވާ މައްސަލައެއް ކަމަށެވެ. އަދި އެފަދަ އެއްވެސް ކަމެއް ހިނގާފައި ނުވާނެ ކަމުގެ ފުރިހަމަ ޔަޤީންކަން އަރުވާކަމަށާއި، އެކަން ހިނގާފައިވާގޮތުގެ ތަފްސީލީ މަޢުލޫމާތު ކޮމިޓީއާ ޙިއްޞާކޮށްފައިވާނެ ކަމަށް އަކްރަމް ވިދާޅުވިއެވެ.

އިލެކްޝަން ކޮމިޝަންގެ މެމްބަރުކަމަށް އަކްރަމް ދެވަނަ ދައުރަކަށް ޢައްޔަން ކޮށްފައިވަނީ މިދިޔަ އަހަރުގެ މާރޗް މަހުގައެވެ.