ރައީސް ވަޙީދުވެސް ކޮވިޝީލްޑް ވެކްސިން ޖައްސަވައިފި، އެދިވަޑައިގަތީ އެންމެންވެސް ވެކްސިން ޖެއްސެވުމަށް!
7 ފެބުރުއަރީ 2021 | އާދީއްތަ 17:47ހުރިހާ ރައްޔިތުން ވެކްސިން ޖެއްސެވުމަށް އިލްތިމާސް ކުރެއްވި
ޑރ ވަޙީދާއި އަނބިކަނބަލުން ވެކްސިން ޖެއްސެވުމަށްފަހު، ޓްވިޓަރގައި ހިއްސާ ކުރެއްވި ފޮޓޯ
ކުރީގެ ރައީސް ޑރ މުޙައްމަދު ވަޙީދު ޙަސަން މަނިކުވެސް ކޮވިޝީލްޑް ވެކްސިން ޖައްސަވައިފިއެވެ.
އެކަން ހާމަކުރައްވައި އާދިއްތަ ދުވަހު ޑރ ވަޙީދު ކުރެއްވި ޓްވީޓެއްގައި ވިދާޅުވީ، އެމަނިކުފާނާއި އަނބިކަނބަލުންވެސް ކޮވިޑް ވެކްސިން ޖައްސަވާފައިވާ ކަމަށެވެ. އަދި ކޮވިޑް-19އަކީ މުޅި ދުނިޔެއަށް ކުރިމަތިވެފައިވާ އާލަމީ ވަބާއަކަށްވާއިރު، ހުރިހާ ރައްޔިތުންގެ ދިރިއުޅުމަށްވެސް މި ވެކްސިންގެ ސަބަބުން އަސަރު ކޮށްފައިވާ ކަމަށް ޑރ ވަޙީދު ވިދާޅުވިއެވެ. އަދި މިހާރުވެސް މި ވައިރަސްގެ ސަބަބުން އެތަކެއް ފުރާނައެއް ގޮސްފައިވާކަން ޑރ ވަޙީދު ފާހަގަ ކުރެއްވިއެވެ.
ޑރ ވަޙީދު ވަނީ މި ބަލިމަޑުކަމުން ސަލާމަތްވުމަށް ހުރިހާ ރައްޔިތުންވެސް ވެކްސިން ޖެއްސެވުމަށް އިލްތިމާސް ކުރައްވާފައެވެ. ޑރ ވަޙީދުގެ މި ޓްވީޓުގައި އިންޑިއާގެ ސަފީރު ސަންޖޭ ސުދީރުވެސް ޓެގް ކުރައްވާފައިވެއެވެ.
ރައީސް ވަޙީދު ކޮވިޝީލްޑް ވެކްސިން ޖައްސަވާފައިވާއިރު، އިދިކޮޅު ކޯލިޝަނުން ގެންދަނީ މި ވެކްސިނަކީ އިންޑިއާގެ ސިރަމް އިންސްޓިޓިއުޓުން އުފައްދާފައިވާ ވެކްސިނަކަށްވުމާއެކު، ވެކްސިން ޖެހުމަށް ދެކޮޅު ހަދަމުންނެވެ. އެގޮތުން މި ވެކްސިނަކީ އެންމެ ރައްކާތެރި ވެކްސިނެއް ނޫންކަމަށްވެސް ބައެއް ފަރާތްތަކުން ތުހުމަތު ކުރަމުންދިޔަ ނަމަވެސް، އެކަމުގެ އެކަށީގެންވާ ހެއްކެއް އެ ފަރާތްތަކަށް ދެއްކެވިފައެއް ނުވެއެވެ. އަދި ވެކްސިނާ ގުޅޭގޮތުން ސީދާ ދޮގު މައުލޫމާތުވެސް އިދިކޮޅު ކޯލިޝަނަށް ނިސްބަތްވާ ބައެއް ފަރާތްތަކުން ގެންދަނީ މީސްމީޑިއާގައި ފަތުރަމުންނެވެ.
އެސްޓްރަޒެނެކާގެ ފޯރމިއުލާއަށް ސިރަމް އިންސްޓިޓިއުޓުން އުފައްދާފައިމިވާ ވެކްސިނަކީ އާންމު ރެފްރިޖްރޭޝަން ފިނިހޫނުމިނުގައިވެސް ބޭނުން ކުރެވޭ ވެކްސިނެކެވެ. އެގޮތުން 1 ފެބްރުއަރީގައި ރާއްޖޭގައި ރަސްމީކޮށް ވެކްސިނޭޝަން ޕްރޮގްރާމް ފަށާފައިވާއިރު، ދައުލަތުގެ 3 ބާރުގެ އިސްވެރިންވެސް ވަނީ މި ވެކްސިން ޖައްސަވާފައެވެ.
