ރައީސް ވަހީދުގެ ބައްޕާފުޅު އަވަހާރަވެއްޖެ
7 ފެބުރުއަރީ 2021 | އާދީއްތަ 06:25އަވަހާރަވީ މުސްކުޅިފުޅުކަމުގެ އާލާސްކަންފުޅުގައި
ރައީސް ވަހީދުގެ ބައްޕާފުޅު ހަސަން އިބްރާހިމް މަނިކު
ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ބައްޕާފުޅު ހަސަން އިބްރާހިމް މަނިކު އަވަހާރަވެއްޖެއެވެ.
ރާއްޖެއެމްވީއަށް ކަށަވަރުވެފައިވާގޮތުގައި އުމުރުފުޅުން 92 އަހަރުގައި ހަސަން އިބްރާހިމް މަނިކު އަވަހާރަވީ މުސްކުޅިފުޅުކަމުގެ އާލާސްކަންފުޅުގައެވެ. އަދި އެމަނިކުފާނު ނޭވާލުމުގައި ދަތިތަކެއް ހުރުމާ ގުޅިގެން އައިޖީއެމްއެޗުގައި ފަރުވާ ހޯއްދަވަމުން ގެންދަވާތާ ދެ ދުވަސްވެފައިވާ ކަމަށް ވެސް މަޢުލޫމާތު ލިބިފައިވެއެވެ. އެމަނިކުފާނު ފަސްދާނުލުމަށް ހަމަޖައްސާފައި ވަނީ މިއަދު އަސުރު ނަމާދަށް ފަހު އާސަހަރާގައެވެ.
ހަސަން އިބްރާހިމް މަނިކު މަޝްހޫރުވެފައިވަނީ ހަނދުވަރު ހަސަން މަނިކުގެ ނަމުންނެވެ. އުފަންވެވަޑައިގަތީ ރ. އިނގުރައިދޫގައެވެ. ފަހުން ނިސްބަތްވެވަޑައިގަތީ މައްޗަންގޮޅީ ސިލްވަރސީން ގެއަށެވެ. ރައީސް ނާސިރުގެ ދައުރުން ފެށިގެން ސަރުކާރުގެ އެކި އިދާރާތަކުގައި ފަންސާސް އަހަރަށްވުރެ ދިގު މުއްދަތެއްގައި ޚިދުމަތް ކުރެއްވިއެވެ.
މަރުހޫމް ހަސަން މަނިކަކީ އިނގިރޭސިވިލާތުގެ ލަންޑަނުގައި ހުންނަ ދިވެހިރާއްޖޭގެ އެމްބަސީގައި ޑެޕިއުޓީ ހައިކޮމިޝަނަރ ގެ މަޤާމުގައި ހުންނެވި ނައުޝާދު ވަހީދުގެ ވެސް ބައްޕާފުޅެވެ. އަދި ރާއްޖޭގެ މީޑިއާގައި ގިނަ ދުވަހު ޚިދުމަތްކުރެއްވި އަލީ ވަހީދާއި މުނިފޫހިފިލުވުމުގެ ދާއިރާގެ ފަންނާނެއްކަމަށްވާ އަޖުވަދު ވަހީދުގެ ވެސް ބައްޕާފުޅެވެ. މިހުރިހާ ބޭފުޅުންގެ މަންމާފުޅަކީ ގދ.ތިނަދޫއަށް ނިސްބަތްވެވަޑައިގަންނަވާ އައިޝަތު މޫސާއެވެ. އެކަމަނާވެސް މީގެ އަހަރުތަކެއް ކުރިން ވަނީ އަވަހާރަވެފައެވެ.
