މާލޭގައި ދުއްވާ ހުރިހާ އުޅަނދަކަށް 24 ގަޑިއިރު މުދާ އުފުލުމުގެ ހުއްދަދީފީ
ބަދަލުގެނެގެނެސްފައިވަނީ 3 ފެބުރުވަރީ 2021ން ފެށިގެން
މާލޭގެ ބާޒާރުމަތީ ފިހާރައަކަށް ޕިކަޕަކުން މުދާ ބާލަނީ
މާލެ ސަރަޙައްދުގައި، މުދާ އުފުލާ ހުރިހާ ގިންތިއެއްގެ އުޅަނދެއްގައި ވެސް 24 ގަޑިއިރު މުދާ އުފުލުމަށް މޯލްޑިވްސް ޓްރާންސްޕޯޓް އޮތޯރިޓީން ހުއްދަދީފިއެވެ.
މޯލްޑިވްސް ޓްރާންސްޕޯޓް އޮތޯރިޓީން ނެރުނު އިޢުލާނެއްގައި ވަނީ އެ އޮތޯރިޓީން 9 ޖަނަވަރީ 2021 ގައި އިޢުލާނުކުރި، މާލެއާއި ހުޅުމާލޭގައި މުދާ އުފުލޭ ގަޑިތަކަށް މިހާރު ބަދަލުގެނެސްފައިވާކަމަށެވެ. އެގޮތުން 3 ފެބުރުވަރީ 2021 އިން ފެށިގެން ގްރޭޓަރ މާލެ ސަރަޙައްދުގައި، މުދާ އުފުލާ ހުރިހާ ގިންތިއެއްގެ އުޅަނދުގައި 24 ގަޑިއިރު މުދާ އުފުލުމަށް ވަނީ ހުއްދަ ދީފައެވެ. ނަމަވެސް ސްކޫލު ގަޑިތަކުގައި ސްކޫލު ސަރަޙައްދުގައި އެއްގަމު އުޅަނދުގައި މުދާ އުފުލުމަކީ އަދިވެސް މަނާކަމެއްކަމަށް ޓްރާންސްޕޯޓް އޮތޯރިޓީއިން ވަނީ ބުނެފައެވެ.
9 ޖަނަވަރީ 2021ގައި މޯލްޑިވްސް ޓްރާންސްޕޯޓް އޮތޯރިޓީއިން ކުރި އިޢުލާނުގެ ދަށުން ސްކޫލްތަކުގެ ސެޝަންތައް ފެށޭ ގަޑިއާއި ނިމޭގަޑީގައި ސްކޫލު ހިމެނޭ ސަރަޙައްދުގައި މުދާ އުފުލާ އުޅަނދެއްގައި މުދާ އުފުލުން މަނާކޮށްފައިވާއިރު، ޓްރާންސްޕޯޓް އޮތޯރިޓީން ވަނީ ބުރިޖުމަތިން މުދާ އުފުލުމުގައާއި ކޮންސްޓްރަކްޝަނަށް ބޭނުންވާ ތަކެތި ގަނޑުކޮށް އުފުލުމުގަ އާއި މާލޭގައި ވިޔަފާރި މުދާ އުފުލުމުގެ ގަޑިތަކަށް ބަދަލު ގެނެސްފައެވެ.
ޓްރާންސްޕޯޓު އޮތޯރިޓީން އޭރު ވަނީ މާލެ އާއި ހުޅުމާލެއަށް ގަނޑުކޮށްގެންދާ ލަކުޑި، ދަގަނޑު، ހިލަ، ހިލަވެލި، ބިއްލޫރި، ސިމެންތި އަދި ޢިމާރާތްކުރުމަށް ބޭނުންކުރާ ގައު ފަދަތަކެތި ހަވީރު 6:00 ން ހެނދުނު 6:00 ށް ހުރިހާ ގިންތިއެއްގެ އުޅަނދެއްގައި އުފުލޭނެ ކަމަށް ބުނެފައެވެ. އަދި މާލެ އާއި ހުޅުމާލޭގައި ދުއްވާ 350 ކިލޯއިން ފެށިގެން ދަށުގެ ޕިކަޕު 24 ގަޑިއިރު މާލެތެރޭގައި ޑެލިވަރީކުރުމާއި ހުރިހާ ބާވަތެއްގެ މުދާ އުފުލުމުގައި ހަރަކާތްތެރިވެވޭނެކަމަށް ޓްރާންސްޕޯޓު އޮތޯރިޓީން އޭރު ވަނީ ހުއްދަދީފައެވެ.
ޓްރާންސްޕޯޓު އޮތޯރިޓީން 9 ޖަނަވަރީ 2021ގައި އާއްމުކޮށްފައިވާ އުސޫލުގައިވާ ގޮތުން ހެނދުނު 9:00 ން ހެނދުނު 11:30 ށް އަދި މެންދުރު 01:30 ން ހެނދުނު 6:00 ށް ހުރިހާ ގިންތިއެއްގެ އުޅަނދުގައި ފެނާއި ގޭސް ފިޔަވާ އެހެނިހެން މުދާ އުފުލޭނެއެވެ. އަދި ހެނދުނު 11:30ން މެންދުރު 01:30ށް 350 ކިލޯއިން ފެށިގެން މަތީގެ އެއްވެސް އުޅަނދުގައި މުދާ އުފުލުން ޓްރާންސްޕޯޓު އޮތޯރިޓީން ވަނީ މަނާކޮށްފައެވެ. މީގެއިތުރުން ހަވީރު 6:00ން ހެނދުނު 6:00ށް ހުރިހާ ގިންތިއެއްގެ އުޅަނދުގައި ފެން އަދި ގޭސް އުފުލޭނެ ކަމަށްވެސް ޓްރާންސްޕޯޓް މިނިސްޓްރީން މަޢުލޫމާތުދެއެވެ.
ހުޅުމާލެއަށް މުދާ ގެންދިއުމަށް، 2 ޓަނުން ދަށުގެ އުޅަނދަށް 24 ގަޑިއިރު ބުރިޖުމަތިން ދަތުރުކުރެވޭއިރު، މިފަދަ އުޅަނދު ދަތުރުކުރަންވާނީ ހަމައެކަނި ބޮޑުތަކުރުފާނު މަގުންކަމަށް ވެސް ޓްރާންސްޕޯޓް އޮތޯރިޓީން ބުނެއެވެ. އަދި 2 ޓަނުން މަތީގެ އުޅަނދު ބުރިޖުމަތިން ހަވީރު 6:00 އިން ހެނދުނު 6:00 އަށް މުދާ އުފުލޭގޮތަށް ޓްރާންސްޕޯޓުން ވަނީ ހަމަޖައްސާފައެވެ. ކޮންސްޓްރަކްޝަނަށް ބޭނުންވާ ތަކެތި ގަނޑުކޮށް އުފުލޭނެ ގަޑިތަކެއްވެސް ޓްރާންސްޕޯޓު އޮތޯރިޓީން އޭރު ވަނީ ކަނޑައަޅާފައެވެ. އެގޮތުން މާލެ އާއި ހުޅުމާލެއަށް ގަނޑުކޮށް އުފުލާ ލަކުޑި، ދަގަނޑު، ހިލަ، ހިލަވެލި، ބިއްލޫރި، ސިމެންތި އަދި ޢިމާރާތްކުރުމަށް ބޭނުންކުރާ ގާ ފަދަތަކެތި ހަވީރު 6:00ން ހެނދުނު 6:00ށް ހުރިހާ ގިންތިއެއްގެ އުޅަނދުގައި އުފުލޭގޮތަށް ވެސް ވަނީ ހަމަޖައްސާފައެވެ.
