ރިޔާސީ ބަޔާން 2021: ޚާރިޖީ ދާއިރާއިން ރާއްޖޭގެ އެންމެ އިސް ސިޔާސަތަކީ، ރާއްޖޭގެ ސަލާމަތާއި ރައްކާތެރިކަން ކަށަވަރުކުރުން
ކޮންމެ ކަމެއްގައިވެސް ރާއްޖޭގެ އެންމެ މަތީ މަޞްލަޙަތު ޙިމާޔަތްކުރައްވާނެ ކަމަށް ރައީސް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ޖަލްސާއަށް ރިޔާސީ ބަޔާން އިއްވަވާދެއްވަނީ
ޚާރިޖީ ދާއިރާއިން ރާއްޖޭގެ އެންމެ އިސް ސިޔާސަތަކީ، ދިވެހިރާއްޖެއާއި ދިވެހީންގެ ސަލާމަތާއި ރައްކާތެރިކަން ކަށަވަރުކުރުމާއެކު، ކޮންމެ ކަމެއްގައި ވެސް ރާއްޖޭގެ އެންމެ މަތީ މަޞްލަޙަތު ޙިމާޔަތްކުރުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު ވިދާޅުވެއްޖެއެވެ.
މިއަހަރަށް ރައްޔިތުންގެ މަޖިލިސް ހުޅުވުމާއި، ރިޔާސީ ބަޔާން އިއްވެވުމަށް ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ރައީސް ޞާލިޙު ވިދާޅުވީ، އިންސާނީ ޙައްޤުތައް ޙިމާޔަތްކޮށް، ޑިމޮކްރަސީގެ ހަމަތައް ނަގަހައްޓައި، ތިމާވެއްޓަށް އަންނަ ބަދަލުތަކުން ރާއްޖެ ރައްކާތެރިކުރުމަކީ ވެސް ރާއްޖޭގެ ޚާރިޖީ ގުޅުންތައް އޭގެ މައްޗަށް ބިނާވެފައިވާ ވަރަށް މުހިންމު އަސާސެއް ކަމަށެވެ.
ރައީސް ޞާލިޙު ވިދާޅުވީ، ޚާރިޖީ ދާއިރާއިން މިވަގުތު އެންމެ ބޮޑު އިސްކަމެއް ދެނީ، އެކި ޤައުމުތަކާއި ރާއްޖެއާ ދެމެދު ހީނަރުވެފައި އޮތް ގުޅުންތައް އަލުން އިޢާދަކޮށް ބަދަހިކޮށް އާލާކުރުމަށް ކަމަށެވެ. އަދި ކޮވިޑް-19ގެ ދަތިކަމުގައި ވެސް، ރަޙްމަތްތެރި ޤައުމުތަކުންނާއި ބައިނަލްއަޤްވާމީ ޖަމާޢަތްތަކުން ފޯރުކޮށްދިން ދީލަތި އެހީތެރިކަމަކީ ޚާރިޖީ ގުޅުން މިހާރު ބަދަހިވެފައިވާ މިންވަރު ދައްކުވައިދޭ އަލިގަދަ ހެއްކެއް ކަމަށް ރައީސް ވިދާޅުވިއެވެ.
ރާއްޖޭގެ ޚާރިޖީ ގުޅުންތައް އިތުރަށް ވަރުގަދަކުރުމުގެ ގޮތުން، އިތުރު ޤައުމުތަކަށް "ނޮން-ރެސިޑެންޓް" ސަފީރުން ކަނޑައެޅުމަށް މަސައްކަތްކުރައްވަމުން އަންނަކަމަށާއި، މިގޮތުން ފުރަތަމަ ފަހަރަށް ފަލަސްޠީނަށް "ނޮން - ރެސިޑެންޓް" ސަފީރެއް މި އަހަރުގެ ތެރޭގައި ޢައްޔަންކުރުމަށް ޤަޞްދުކުރައްވާކަމަށް ވެސް ރައީސް ޞާލިޙުގެ މިއަހަރުގެ ބަޔާނުގައި ވިދާޅުވެފައިވެއެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ރާއްޖެއާއި ބައިނަލް އަޤްވާމީ ދުނިޔެއާ އޮތް ގުޅުންތައް ކެނޑި، ހީނަރުވެގެންދިޔައެވެ. އަދި ވަކި ދެތިން ގައުމަކާ ގުޅުން ބަދަހިކުރުމަށް ކުރެއްވި މަސައްކަތުގެ ތެރެއިން، ބައެއް ގައުމުތަކާ ގުޅުންކަނޑާފައިވާއިރު، ރާއްޖެއަށް ބޮޑެތި އެހީތަކެއް ވެދެއްވަމުންގެންދެވި ކޮމަންވެލްތުން ވެސް ރާއްޖެވަކިވެފައިވެއެވެ.
ނަމަވެސް ރައީސް ޞާލިހު ސަރުކާރާ ހަވާލުވެވަޑައިގެން، ޚާރިޖީ ދާއިރާއިން ފުރަތަމަ ކުރެއްވި ކަންކަމުގެ ތެރޭގައި ބައިނަލްއަޤަވާމީ ދުނިޔެއާ ކެނޑިފައިވާ ގުޅުންތައް އަލުން ޢިޔާދަކުރުމަށް މަސައްކަތް ކުރައްވައި، މިހާރުވަނީ ގުޅުންތައް ގާއިމުކުރައްވާފައެވެ. އަދި ބައިނަލް އަޤްވާމީ ދޭދޭ ޤައުމުތަކާއި ޖަމްޢިއްޔާ ޖަމާޢަތްތަކާ އޮތް ގުޅުންތައް ހަރުދަނާކުރުމުގެ މަސައްކަތް ވެސް ވަރަށް ފުޅާދާއިރާއެއްގައި މިސަރުކާރުން ކުރަމުންދެއެވެ.
