ރިޔާސީ އިންތިހާބާއި ގުޅޭގޮތުން މަޝްވަރާކުރުމަށް އުމަރު ނަސީރު އިނގެރޭސިވިލާތަށް
އުމަރު ނަސީރު އިނގެރޭސިވިލާތަށް ވަޑައިގަންނަވަނީ ޑރ. ޖަމީލާ ބައްދަލުކުރެއްވުމަށް
ސަރުކަރުން ބޭއްވި ނޫސްވެރިންގެ ބައްދަލުވުމެއްގައި ކުރީގެ ހޯމް މިނިސްޓަރ އުމަރު ނަސީރު، އޭނާ ވަނީ ރިޔާސީ އިންތިހާބުގައި ވާދަކުރައްވާނެކަމަށް ވިދާޅުވެފަ
ކުރިއަށް އޮތް ރިޔާސީ އިންތިހާބާއި ގުޅޭގޮތުން ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދާއި މަޝްވަރާކުރެއްވުމެއް، ކުރީގެ ހޯމް މިނިސްޓަރު އުމަރު ނަސީރު އިނގެރޭސިވިލަތަށް ވަޑައިގަންނަވާނެ ކަމަށް އޭނާ ވިދާޅުވެއްޖެ އެވެ.
އުމަރު ނަސީރު ކުރައްވާފައިވާ ޓުވީޓެއްގައި ވިދާޅުވެފައިވަނީ އަންނަ ހަފްތާގައި އޭނާ ލަންޑަނަށް ވަޑައިގަންނަވާނެ ކަމަށެވެ. އަދި އިދިކޮޅު އިއްތިހާދުގެ ލީޑަރު ޑރ. މުހައްމަދު ޖަމީލް އަހުމަދާއި މަޝްވަރާކުރައްވާނެ ކަމަށާއި، މަޝްވަރާކުރައްވާނީ ކުރިއަށް އޮތް ރިޔާސީ އިްނތިހާބާއި ގުޅޭގޮތުން ކަމަށެވެ. ނަމަވެސް މަޝްވަރާކުރައްވަނީ ރިޔާސީ އިންތިހާބުގެ ކޮންކަމަކައި ގުޅޭގޮތުން ކަމެއް އުމަރު ނަސީރު ވިދާޅުވެފައެއް ނުވެއެވެ.
ރައީސް އަބްދުﷲ ޔާމީންގެ ސަރުކާރު ދިފާއުކޮށް، އިދިކޮޅު ފަރާތްތައް ހައްޔަރުކޮށް ޖަލަށްލިއިރު، ހޯމް މިނިސްޓަރު ކަމުގެ މަޤާމުގައި ހުންނެވި އުމަރު ނަސީރު ވަނީ މަޤާމުން އިސްތިއުފާދެއްވުމަށްފަހު ރިޔާސީ އިންތިހާބުގައި ވާދަކުރައްވާނެކަމަށް އިއުލާންކުރައްވާފަ އެވެ. އަދި އެއާއެކު ރައީސް އަބްދުﷲ ޔާމީންގެ ސަރުކާރަށް ފާޑު ވިދާޅުވުމުގެ މަސައްކަތް އުމަރު ނަސީރު ފައްޓަވާފައިވެއެވެ. އޭނާ ވިދާޅުވީ ރިޔާސީ އިންތިހާބުގައި ވާދަކުރައްވާނީ ޕީޕީއެމްގެ ޓިކެޓުގައި ކަމަށެވެ.
އުމަރު ނަސީރު ހޯމް މިނިސްޓަރުކަމުގެ މަޤާމުގައި ހުންނެވިއިރު، ހިޔާލުފާޅުކުރުމުގެ މިނިވަންކަމަށް ހުރަސްއެޅުމަށް ފުލުހުން ގިނަ މަސައްކަތްތަކެއް ކޮށްފައިވެއެވެ. އެގޮތުން މުޒާހަރާތައް ރޫޅާލާއި، ފުލުހުން ބާރުގެ ބޭނުންކޮށްފައިވަނީވެސް އުމަރު ހޯމަ މިނިސްޓަރަކަށް ހުންނެވިއިރުގަ އެވެ. ހޯމް މިނިސްޓަރަކަށް ހުންނެވިއިރު، ކުރީގެ ރައީސް މުހައްމަދު ނަޝީދު ޖަލަށްލެވުނުގޮތަށް ތާއީދުކޮށް ވާހަކަދެއްކެވި އުމަރު ނަސީރު ވަނީ މަޤާމުން އިސްތިއުފާދެއްވުމަށްފަހު ރައީސް މުހައްމަދު ނަޝީދުގެ ޝަރީއަތް ކުރިއަށްގެންގޮސްފައިވަނީ ސުވާލު އުފެދޭގޮތަކަށް ކަމަށް ވިދާޅުވެފަ އެވެ.
