އައު މަގުތަކާއެކު މާލޭގެ މަގު ކޮނުމުގެ މައްސަލައަށް ދާއިމީ ހައްލެއް ލިބިގެންދާނެކަމަށް މާލެ ސްޓްރީޓް ސްކޭޕިންގެ މަސައްކަތް ކުރާ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ހާމަކޮށްފިއެވެ.

އާރް.ޑީ.ސީ.އިން މިހާރު ވަނީ މާލެ ސްޓްރީޓް ސްކޭޕިން ޕްރޮޖެކްޓްގެ މަސައްކަތް ބާރު ސްޕީޑެއްގައި ކުރަމުންނެވެ.

މި ޕްރޮޖެކްޓްގެ އެންމެ ފަހުގެ މަޢުލޫމާތު ހާމަކޮށް ރޯޑް ޑިވެލޮޕްމަންޓް ކޯޕަރޭޝަން، އާރް.ޑީ.ސީ.އިން ކުރި ޓުވީޓެއްގައި ވަނީ، މާލެ މަގު ހެދުމުގެ މަޝްރޫއުގެ ދަށުން ހަދާ ހުރިހާ މަގެއް ވެސް ހަދަނީ އެންމެ ޒަމާނީ ފެންވަރަށް ކަމަށް ބުނެފައެވެ. އަދި މަގުތައް ހަދާ ނިމޭއިރު އިތުރަށް މަގު ކޮންނާކަށް ނުޖެހޭނެކަމަށް އެކުންފުނިން ވަނީ ބުނެފައެވެ. އަދި މަގު ހިނގާ މީހުންނަށް ވެސް ހިނގަން އޮންނަ ޖާގަ ވެސް މިހާރު ބޮޑުކުރެވިފައިވާކަމަށް އާރް.ޑީ.ސީ.އިން ވަނީ ބުނެފައެވެ.

މާލޭގެ މަގުތައް މީގެ ކުރިންވެސް ވަނީ އެކި ފަހަރުމަތިން ތަރައްޤީކޮށްފައިވެއެވެ. އެހެންނަމަވެސް، ފެނާއި ނަރުދަމާ އާއި ޑީވޯޓަރިން އާއި އެހެނިހެން ޚިދުމަތްތަކަށް މަގު ކޮންނަން ޖެހުމުން، މަގު ކޮނެ މަގުތަކުގެ ރައްކާތެރިކަން ދެމެހެއްޓުމުގައި ގޮންޖެހުންތައް ދަނީ ކުރިމަތިވަމުންނެވެ. މި މައްސަލަ ހައްލުކުރުމަށް އަލަށް މާލޭގައި ހަދާ މަގުތައް ނިމޭއިރު ކަރަންޓާއި ފެނާއި ނަރުދަމާ އަދި ޑީވޯޓަރިން އާއި ތަފާތު އެހެނިހެން ޚިދުމަތްތަކަށް ބޭނުންކުރާ ކޭބަލްތައް، މަގު ނުކޮނެ ފަސޭހައިން ގުޅާލެވޭނެ ގޮތްގޮތަށް ފަރުމާކުރާނެކަމަށް އާރް.ޑީ.ސީ.އިން ހާމަކުރެއްވިއެވެ.

މާލެ ސްޓްރީޓް ސްކޭޕިންގް މަޝްރޫޢުގެ ދަށުން މިހާރު ވަނީ ޝަހީދު އަލީ ހިނގުމުގެ މަސައްކަތް ފަށާފައެވެ. މަގުހެދުމުގެ މަސައްކަތް ފުރަތަމަ ފަށާފައި ވަނީ މާފަންނު ކަނބާއައިސާރަނި ހިނގުމުންނެވެ. މި މަގުގެ ފުރަތަމަ ބައިގެ މަސައްކަތް ނިންމައި ބޭނުންކުރުމަށް އާއްމުކޮށް ހުޅުވައިލާފައި ވަނީ މިމަހުގެ 1 ވަނަ ދުވަހުއެވެ. އަދި މިހާރު ވަނީ އެ ސަރަޙައްދުގެ އިތުރު 2 މަގުގެ މަސައްކަތް ވެސް ފަށައި، މަސައްކަތުގެ ބޮޑު ބައެއް ނިމިފައެވެ. މާލޭ ސްޓްރީޓް ސްކޭޕިންގ ޕްރޮޖެކްޓްގެ މަސައްކަތް ހެންވޭރުގައި ފެށުމަށް ތައްޔާރުވަމުންދާކަމަށް ވެސް މާލެ ސިޓީކައުންސިލުން ވަނީ ހާމަކޮށްފައެވެ.

މާލެ ސިޓީ ކައުންސިލުން ބުނީ މި މަޝްރޫޢުގެ ދަށުން މާލޭގެ އެކި ސަރަޙައްދުތަކުން 18.08 ކިލޯ މީޓަރގެ މަގު ހެދޭނެ ކަމަށެވެ. އަދި މަޝްރޫޢުގެ ދަށުން މަގުތައް ހަދާއިރު 4 ވައްތަރެއްގެ މަގު ހިމެނޭނެ ކަމަށެވެ. އެއީ އާރޓީރިއަލް މަގުތަކާއި، ސިޓީ ރޯޑްސްއާއި، ސެކަންޑަރީ ރޯޑްސްގެ އިތުރުން ނެއިބަރ ހުޑްޕެޑެސްޓްރިއަން ރޯޑެވެ. ކައުންސިލުން ބުނީ ކަރަންޓާއި ފެނާ ނަރުދަމާއާއި ޑީވޯޓަރިންގ އާއި އަދި ތަފާތު އެހެނިހެން ޚިދުމަތްތަކަށް ބޭނުންކުރާ ކޭބަލްތައް، މަގު ނުކޮނެ ފަސޭހައިން ގުޅާލެވޭގޮތަށް ފަރުމާކުރެވިފައިވާނެ ކަމަށެވެ. މީގެ އިތުރުން، އިތުރަށް ލެވޭ ހޮޅިތަކުގެތެރޭގައި ފަޔަރ ހައިޑްރާންޓް ހޮޅި އާއި ގޭސް ހޮޅި ހިމެނޭނެ ކަމަށެވެ.

އާރް.ޑީ.ސީ.އާ ޙަވާލުކޮށްގެން ކުރަމުންދާ މި މަސައްކަތާ ގުޅޭގޮތުން މާލޭ ކައުންސިލުން ބުނީ މި މަޝްރޫޢުގެ އަންދާޒާ އަގަކީ 462 މިލިއަން ރުފިޔާ ކަމަށާއި، ފުރަތަމަ ސެގްމެންޓުގެ އަގުގެ ގޮތުގައި 50.96 މިލިއަން ރުފިޔާ ކަނޑައެޅިފައިވާ ކަމަށެވެ. މި މަސައްކަތުގެ ޕައިލެޓް ޕްރޮޖެކްޓްގެ ގޮތުގައި އެންމެ ފުރަތަމަ ފަށާނީ ވެސްޓް ޕާކް ސަރަޙައްދުން ކަމަށް ވެސް މާލޭ ސިޓީ ކައުންސިލުން ބުނެފައިވެއެވެ. އެގޮތުން އެސަރަޙައްދުން 7 މަގެއް ހެދޭނެ ކަމަށާއި، އެ މަގުތަކުގެ ދިގުމިނުގައި 1.94 ކިލޯ މީޓަރ ހުންނާނެ ކަމަށެވެ.

މާލޭ ސިޓީ ކައުންސިލުން ބުނީ މި މަޝްރޫޢުގެ މަޤްޞަދުތަކުގެ ތެރޭގައި މާލޭގެ މަގުތަކަކީ ހުރިހާ އުމުރުފުރައެއްގެ މީހުންނަށް ފަސޭހަކަމާއެކު ބޭނުންކުރެވޭ މަގުތަކަކަށް ހެދުމާއި، ހުރިހާ އުމުރުފުރާއެއްގެ މީހުނަށް ވެސް ރައްކާތެރި މަގުތަކަށް ހެދުން ހިމެނޭ ކަމަށެވެ. އަދި ފަސޭހަކަމާއެކު އެއްތަނުން އަނެއްތަނަށް ޒަރޫރީ ބޭނުންތަކަށް ދަތުރުފަތުރުކުރެވޭނެ މަގެއް ހޯދައިދިނުމުގެ އިތުރުން މަގުތަކުގައި ފެންބޮޑުވުން ހުއްޓުވައި، އަބަދު ކޮނެފައި އޮންނަ އޮތުމަށް ނިމުމެއް ގެނައުން ކަމަށް ވެސް ސިޓީ ކައުންސިލުން ބުންޏެވެ.

މީގެއިތުރުން ހުރިހާ މަގެއްގައި ވެސް ދެފަރާތުގައި ހިމެނޭ ގޭގެއިން މީހުން ވަދެ ނުކުމެ ނުކުމެ ހެދުމުގައި ފަސޭހަވާނޭ ގޮތަށް ޕޭވްމަންޓެއްޤާއިމުވެފައި އޮތުމުގެ އިތުރުން ޕަބްލިކް ޓްރާންސްޕޯޓް ނިޒާމެއް ޤާއިމްކޮށް ސައިކަލާއި ޓެކްސީއަށް ބަރޯސާވުން ކުޑަކޮށް، މަގުތަކުގެ ތޮއްޖެހުން ހުއްޓުވުން ވެސް މި މަޝްރޫޢުގެ މަޤްޞަދުތަކުގެ ތެރޭގައި ހިމެނެއެވެ. އަދި މަގުތަކުގައި ޕާކިންގގެ ފުރިހަމަ ނިޒާމެއް ގާއިމުކުރުމަށް ޕާކިންގ ބިލްޑިންގްތައް ގާއިމުކޮށްދިނުމާއި މުދާ ބޭލުމާއި އެރުވުމަށް އަދި މަގުތައް ބޭނުންކުރުމުގެ ފުރިހަމަ އުސޫލެއް އެކަށައަޅައި ތަންފީޒުކުރުން ވެސް ހިމެނެއެވެ.