އެހެން ވެކްސިނެއް ޖަހާތާ 14 ދުވަސްނުވަނީސް ކޮވިޑް ވެކްސިން ނުޖެހޭނެ
ރަށްތަކަށް ބޭނުންވާ ވެކްސިން މިހާރު ވަނީ ފޮނުވާފައި
އެޗްއީއޯސީގެ ތަރުޖަމާނު ޑރ. ފާތިމަތު ނަޒްލާ ރަފީޤް
އެހެން ވެކްސިނެއް ޖަހާތާ 14 ދުވަސްނުވަނީސް ކޮވިޑް ވެކްސިން ނުޖެހޭނެކަމަށް ހެލްތް އިމަޖެންސީ އޮޕަރޭޝަން ސެންޓަރ، އެޗްއީއޯސީން ހާމަކޮށްފިއެވެ.
ރާއްޖޭގައި ވެކްސިން ޖެހުމަށް ތައްޔާރުވެފައިވާއިރު، އެންމެ ފުރަތަމަ ވެކްސިން ޖެހުމަށް ނިންމާފައިވަނީ ކުރީ ސަފުގައި މަސައްކަތް ކުރާ ޞިއްޙީ ޚިދުމަތްތެރިންނަށް އިސްކަން ދީގެންނެވެ.
ހެލްްތް އިމަޖެންސީ އޮޕަރޭޝަން ސެންޓަރ، އެޗްއީއޯސީގެ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު ޑރ. ފާތިމަތު ނަޒްލާ ރަފީޤް ވިދާޅުވީ ކޮވިޑްގެ ވެކްސިން ޖެހުމަށް ސަރުކާރު ތައްޔާރުވެފައިވާކަމަށެވެ. އެހެންނަމަވެސް، މިވަގުތު ލިބިފައިވާ ވެކްސިންއަކީ ހުރިހާ ފަރާތްތަކަށް ރައްކާތެރި ވެކްސިނެއްކަން ކަށަވަރުވެފައި ނެތުމުން މިކަންކަމަށް ރައްޔިތުން ސަމާލުވާންޖެހޭނެކަމަށް ޑރ. ނަޒްލާ ވިދާޅުވިއެވެ. އެގޮތުން މިހާރު ލިބިފައިވާ ވެކްސިން 18 އަހަރުން ދަށުގެ ފަރާތްތަކާއި، މާބަނޑު އަންހެނުންނާއި ލޭ ދިޔާކުރާ ބޭސް ބޭނުންކުރާ ފަރާތްތަކަށް ނުޖެހޭނެކަމަށް ޑރ. ނަޒްލާ ވިދާޅުވިއެވެ. ލޭ ދިޔާ ކުރާ ބޭސްބޭނުންކުރާ މީހުންނަށް ވެކްސިން ނުޖެހެނީ ވެކްސިން ޖެހުމަށް އިންޖެކްޓްކުރުމުން އެމީހުންގެ ގައިން ގިނަ އަދަދަކަށް ލޭ އައުމުގެ ފުރުސަތު އޮތުމުންކަމަށް ޑރ. ނަޒްލާ ވިދާޅުވިއެވެ. މީގެ އިތުރުން އިންފްލުއެންޒާ ވެކްސިންފަދަ އިތުރު އެއްވެސް އެހެން ވެކްސިނެއް ޖަހާތާ 14 ދުވަސްނުވަނީސް ކޮވިޑް ވެކްސިން ނުޖެހޭނެކަމަށް އެޗްއީއޯސީގެ ތަރުޖަމާން ވިދާޅުވިއެވެ.
މާދަމާ ވެކްސިން ދޭން ފަށާއިރު މި ރަށްތަކަށް ބޭނުންވާ ވެކްސިން މިހާރު ވަނީ ފޮނުވާފައެވެ. ރާއްޖޭގެ ހުރިހާ ހިސާބުތަކެއްގައިވެސް ކުރިއަށް އޮތް ދުވަސްތަކުގެ ތެރޭގައި ވެކްސިން ދޭން ފަށާނެ ކަމަށާއި މާލެ ސަރަހައްދުން ވެކްސިން ދިނުމަށް ހަމަޖެހިފައިވަނީ އައިޖީއެމްއެޗް އާއި ހުޅުމާލެ ހޮސްޕިޓަލާއި، ވިލިމާލެ ހޮސްޕިޓަލާއި އޭޑީކޭ ހޮސްޕިޓަލާއި ޓްރީޓޮޕް ހޮސްޕިޓަލުންކަމަށް އެޗްޕީއޭއިން ވަނީ ބުނެފައެވެ. އައްޑޫ ސިޓީން ވެކްސިން ދޭނީ އައްޑޫ އިކުއެޓޯރިއަލް ހޮސްޕިޓަލުންނެވެ. ކުޅުދުއްފުށިން މިވެކްސިން ދޭނީ ކުޅުދުއްފުށީ ރީޖަނަލް ހޮސްޕިޓަލުންކަމަށްވެސް އެޗްޕީއޭއިން މަޢުލޫމާތުދެއެވެ.
