މާލޭގެ ދެ ސަރަޙައްދެއްގައި މާރާމާރީތަކެއް ހިންގައި، މީހަކަށް ތޫނު އެއްޗަކުން ޙަމަލާދީ ޒަޚަމް ކޮށްލައިފިއެވެ.
ފުލުހުންގެ މީޑިއާ އޮފިޝަލު ވިދާޅުވީ، އަސަރީ ހިނގުމުގައި މީހަކަށް ތޫނު އެއްޗަކުން ޙަމަލާ ދީފައިވާކަމުގެ މައުލޫމާތު އާދިއްތަ ދުވަހުގެރޭ 21:15އެހާކަންހާއިރު ފުލުހުންނަށް ހުށައެޅިފައިވާ ކަމަށެވެ.
މި މާރާމާރީގައި އަނިޔާވެފައިވަނީ 36 އަހަރުގެ ފިރިހެނަކަށްކަމަށް ފުލުހުން މައުލޫމާތު ދެއެވެ. އޭނާއަށް ފަރުވާ ދިނުމަށް އެވަގުތު ގެންގޮސްފައިވަނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ކަމަށް ފުލުހުންގެ މީޑިއާ އޮފިޝަލު ވިދާޅުވިއެވެ.
މި މައްސަލަ ފުލުހުން ދަނީ އިތުރަށް ތަޙުޤީޤު ކުރަމުންނެވެ.
އޭގެ އިތުރުން، އާދިއްތަ ދުވަހުގެރޭ 19:35 އެހާކަންހާއިރު ކިންގ ސަލްމާން މިސްކިތް ކައިރީގައި އޮންނަ ދަނޑު ކައިރީގައި މާރާމާރީއެއް ހިންގިކަމުގެ މައުލޫމާތުވެސް ލިބިފައިވާކަމަށް ފުލުހުން ފާހަގަ ކޮށްފައިވެއެވެ. އެ މައްސަލަވެސް ފުލުހުން ދަނީ އިތުރަށް ތަހުޤީޤު ކުރަމުންނެވެ.
