މިހާތަނަށް ރާއްޖެއަށް އެންމެ ގިނަ ދަތުރުކޮށްފައި ވަނީ އެމިރޭޓްސްއިން

މިއަހަރު ފެށުނު ފަހުން ރާއްޖެއަށް އެންމެ ގިނަ އަދަދަކަށް ދަތުރު ކޮށްފައި ވަނީ އެމިރޭޓްސް އެއަރލައިނުން ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

މިހާތަނަށް ކޮވިޑް-19 ގެ ހާލަތާއި ގުޅިގެން ރާއްޖޭގެ ބޯޑަރުތައް ބަންދު ކުރުމަށް ފަހު އަލުން ހުޅުވާލި ފަހުން، އެމިރޭޓްސް އެއަރލައިނުން ރާއްޖެއަށް 200 ދަތުރުކޮށްފައި ވާއިރު، އެއެއަރަލައިނުން ވަނީ 16,438 މީހުން އުފުލާފައެވެ.

ދެވަނައަށް އެންމެ ގިނަ މީހުން އައި ގަތަރު އެއަރވޭސްއިން މިހާތަނަށް 10,432 މީހަކު ވަނީ ރާއްޖެ އައިސްފައެވެ. އަދި ޖުމްލަ 178 ދަތުރު ވަނީ ކޮށްފައެވެ.

ކޮވިޑް-19 ގެ ހާލަތާއި ގުޅިގެން ރާއްޖޭގެ ބޯޑަރުތައް ބަންދު ކުރުމަށް ފަހު އަލުން ހުޅުވާލި ފަހުން، ރާއްޖެއަށް ދަތުރުތައް ފަށާފައިވާ ބޮޑެތި ގިނަ އެއަރލައިންތަކަކުން ރާއްޖެއަށް ކުރާ ދަތުރުތައް މިހާރު އިތުރުކޮށްފައިވާ އިރު، ރާއްޖެއަށް ދަތުރުކުރާ ޕްރައިވެޓް ޖެޓްތަކުގެ އަދަދުވެސް ވަނީ ވަރަށް ބޮޑަށް އިތުރުވެފައެވެ.

ޓޫރިޒަމް މިނިސްޓްރީގެ އެންމެ ފަހުގެ މައުލޫމާތުތައް ދައްކާގޮތުން އިންޓަނޭޝަނަލް 27 އެއަރލައިނަކުން ދަނީ މިހާރު ރާއްޖެއަށް ދަތުރުކުރަމުންނެވެ.