ރާޅާ އަޅާ މީހުންގެ ހެދުން އީޖާދު ކުރި ޖެކް އޯނީލް މަރުވެއްޖެ
3 ޖޫން 2017 | ހޮނިހިރު 17:05އޭނާ މަރުވީ އުމުރުން 94 އަހަރުގައި
ޖެކް އޯނީލް - ވެޓް ސޫޓްގެ ސަބަބުން ގިނަ ވަގުތުން ރާޅާއަޅާ މީހުންނަށް މޫދުގައި އުޅުމަށް މަގު ފަހިވި
ރާޅާ އަޅާ މީހުންގެ ހެދުން އީޖާދު ކުރި ޖެކް އޯނީލް މަރުވެއްޖެއެވެ.
ރާޅާ އަޅާ މީހުންގެ ހެދުން އުފެއްދި ޖެކް އޯނީލް މަރުވެއްޖެއެވެ. ސަރފިންގެ ދުނިޔޭގައި މަޝްހޫރު ޖެކް އޯނީލް މަރުވީ އުމުރުން 94 ގައި މިދިޔަ ހުކުރު ދުވަހު އެމެރިކާގެ ސެންޓާ ކްރޫޒްގެ އައްސޭރި ފަށުގައި ހުންނަ އޭނާގެ ގޭގައި ކަމަށް އާއިލާއިން ނެރުނު ބަޔާނެއްގައި ބުނެފައިވެއެވެ.
ސަރފިން އަށް އުފެދުނު ޝައުވެރި ކަމުގެ ތެރޭން ގިނަ އިރު މޫދުގައި އުޅެވޭ ގޮތައް ބޭނުން ކުރެވޭނެ ހަށިގަނޑަށް ކަމުދާ މެޓީރިއަލެއް ހޯދުމަށް އެތައް މަސައްކަތެއް ކުރުމަށްފަހު ނިއޮޕްރީން ބޭނުން ކޮށްގެން އޭނާ އީޖާދު ކުރި ވެޓް ސޫޓް ވެގެން ދިޔައީ ދުނިޔެއަށް އުފަންވި ފުރަތަމަ ވެޓް ސޫޓް ކަމުގައެވެ. ނިއޮޕްރީން މެޓީރިއަލް ވެޓްސޫޓްގައި ބޭނުން ކުރަން ފެށުމުގެ ކުރިންވެސް މިބާވަތުގެ މެޓީރިއަލް އެމެރިކާގެ މިލިޓަރީގައި ދިޔައީ ބޭނުން ކުރަމުންނެވެ.
ރާޅާ އަޅާ މީހުންގެ ހެދުން އީޖާދު ކުރި ޖެކް އޯނީލް މަރުވި އިރު އޭނާގެ ވެޓް ސޫޓް ބްރޭންޑަކީ ދުނިޔޭގެ އެންމެ ބޮޑު ބްރޭންޑެވެ. މި ބްރޭންޑްގެ އުފެއްދުންތައް ދުނިޔޭގެ ހުރިހާ ކަންކޮޅު ތަކަކަށް ވަނީ ފެތުރިފައެވެ.
ރާޅާ އެޅުމުގެ ތެރޭގައި ކުރިމަތިވި އެކްސިޑެންޓެއްގައި ޖެކް އޯނީލްގެ އެއް ލޯ ނެތުނެވެ.
ރާޅާ އަޅާ މީހުންގެ މެދުގައި އިހްތިރާމް ލިބިފައިވާ ޖެކް އޯނީލް ވަނީ ކަނޑުފަޅުގެ ވެށީގެ ރައްކާތެރި ކަމަށްވެސް މުހިންމު މަސައްކަތްތަކެއް ކޮށްފައެވެ. "އޮނީލް ސީ އޮޑީސީ" ގެ ނަމުގައި ކަނޑުފަޅުގެ ވެށީގެ ހޭލުންތެރިކަން އިތުރު ކުރުމަށް ކިޔަވާ އުމުރު ފުރާގެ ކުދިންނަށް ޚާއްސަ ކޮށްގެން ޖެކް އޯނީލް ވަނީ ޕްރޮގްރާމެއް ހިންގާފައެވެ. 1996 ގައި ފެށި މި ހަރަކާތުގެ ދަށުން އޭނާވަނީ އެއްލައްކަ އަށްވުރެ ގިނަ ކުދިންނަށް ތިމާވެށީގެ ހޭލުންތެރިކަން އިތުރުކުރުމަށް ޕްރޮގްރާމްތައް ހިންގާފައެވެ.
