އާޖެންޓީނާގެ ހުއާން މާޓިން ޑެލް ޕޮޓްރޯ ބަލިކޮށް، ސްވިސް އިންޑޯސް ޓެނިސް މުބާރާތުގެ ޗެމްޕިއަންކަން ސްވިޓްޒަލެންޑްގެ ރޮޖަރ ފެޑެރާ ހޯދައިފި އެވެ.

ސްވިޓްޒަލެންޑްގެ ބާސެލްގައި ކުރިއަށްދިޔަ މިމުބާރާތުގެ ޗެމްޕިއަންކަން ފެޑެރާ ހޯދީ، ފައިނަލްގައި ޑެލް ޕޮޓްރޯގެ މައްޗަށް 6-7 (5-7)، 6-4 އަދި 6-3 ން ކުރި ހޯދައިގެންނެވެ. މިމޮޅާއެކު ދުނިޔޭގެ ރޭންކިންގެ ދެވަނާގައިވާ ފެޑެރާ ވަނީ 1460 ޕޮއިންޓް ހޯދައިގެން، ދުނިޔޭގެ ރޭންކިންގެ އެއްވަނާގައިވާ ނަޑާލް އާއި ދެމެދު އޮތް ފަރަގު ކުޑަކޮށްފައެވެ.

މިއީ 36 އަހަރުގެ ފެޑެރާ ކާމިޔާބުކުރި ސްވިސް އިންޑޯސްގެ އަށްވަނަ މުބާރާތެވެ. އަދި މިއަހަރު އޭނާ ކާމިޔާބުކުރި ހަތްވަނަ ތަށްޓެވެ. ފެޑެރާ ވަނީ މިއަހަރުގެ އޮސްޓްރޭލިއަން އޯޕަން އަދި ވިމްބަލްޑަން ޗެމްޕިއަންޝިޕް ވެސް ކާމިޔާބުކޮށްފައެވެ.

މިމުބާރާތުގެ ކާމިޔާބުކުރިނަމަ، ޑެލް ޕޮޓްރޯ އަށް ލަންޑަންގައި ބާއްވާ އޭޓީޕީ ފައިނަލްގެ ކޮލިފައިންގެ ފަހު ޖާގަ ކަށަވަރުވާނެ އެވެ. އެހެންނަމަވެސް، މުބާރާތް ކާމިޔާބު ނުކުރެވުމާއެކު، އޭޓީޕީ ފައިނަލުން ޖާގަ ހޯދުމަށް އަންނަ ހަފްތާގައި ފްރާންސްގެ ޕެރިހުގައި ބާއްވާ ޕެރިސް މާސްޓަރސްގެ ސެމީ ފައިނަލާއި ހަމަޔަށް ޑެލް ޕޮޓްރޯ ދަތުރު ކުރަން ޖެހޭނެ އެވެ.

މިކާމިޔާބީއާއެކު ފެޑެރާގެ ކެރިއަރުގައި ކާމިޔާބުކުރި މުބާރާތްތަކުގެ އަދަދު ވަނީ 95 އަށް އަރާފައެވެ. މިހާތަނަށް ކެރިއަރުގައި އެންމެ ގިނަ މުބާރާތް ކާމިޔާބުކުރުމުގެ ރެކޯޑް އޮތް އެމެރިކާގެ ކުރީގެ ޓެނިސް ތަރި ޖިމީ ކޮނޯސްގެ ރެކޯޑާއި ހަމަކުރަން ފެޑެރާ ބޭނުންވަނީ 11 މުބާރާތެވެ. ކޮނޯސް ވަނީ އޭނާގެ ކެރިއަރުގައި 109 މުބާރާތެއް ކާމިޔާބުކޮށްފައެވެ.