އަނިޔާގެ ސަބަބުން ނަޑާލް އަށް ސްވިސް އިންޑޯސް މުބާރާތް ގެއްލިއްޖެ

އަނިޔާގެ ސަބަބުން އަންނަ ހަފްތާގައި ބާއްވާ ސްވިސް އިންޑޯސް ބާސެލް ޓެނިސް މުބާރާތް، ދުނިޔޭގެ އެއްވަނަ ޓެނިސް ކުޅުންތެރިޔާ ރަފައެލް ނަޑާލް އަށް ގެއްލިއްޖެ އެވެ.

ސްޕެއިންގެ 31 އަހަރުގެ ނަޑާލްގެ ޑޮކްޓަރުން ވަނީ، އޭނާގެ ކަކުލަށް އަނިޔާވެފައިވާ ކަން ކަށަވަރުކޮށްދީފައެވެ. މީގެ އިތުރުން ޑޮކްޓަރުން ވަނީ، އަރާމް ކުރުމަށް ނަޑާލް އަށް ލަފާދީފައެވެ.

ނަޑާލް އަށް އަނިޔާވެފައިވަނީ މިދިޔަ ހަފްތާގައި ނިމިގެންދިޔަ ޝަންހާއީ މާސްޓަރސް ޓެނިސް މުބާރާތުގެ ތެރޭގައެވެ. އެގޮތުން، އާދީއްތަ ދުވަހު ކުޅުނު ޝަންހާއީ މާސްޓަރސް ޓެނިސް މުބާރާތުގެ ފައިނަލްގައި ނަޑާލް ކުޅުނީ އަނިޔާގައި ހުރެގެން ކަމަށް އޭނާގެ ޑޮކްޓަރާ ހަވާލާދީ މީޑިއާ ރިޕޯޓްތައް ބުނެއެވެ.

އާދީއްތަ ދުވަހު ކުޅުނު ޝަންހާއީ މާސްޓަރސް ޓެނިސް މުބާރާތުގެ ފައިނަލްގައި ނަޑާލް ވަނީ ކުރީގެ ދުނިޔޭގެ އެއްވަނަ ޓެނިސް ކުޅުންތެރިޔާ، ސްވިޓްޒަލެންޑްގެ ރޮޖަރ ފެޑެރާ އަތުން ބަލިވެފައެވެ.

ނަޑާލް އަށް މިމުބާރާތް ގެއްލުމަކީ، މުބާރާތް ބާއްވާ ބާސެލް އަށް އުފަން އަދި މިހާރު ދުނިޔޭގެ ދެވަނަ މަގާމުގައި އޮތް ފެޑެރާ އަށް އަލުން ދުނިޔޭގެ އެއްވަނަ އަށް އެރުމަށް ލިބުނު ރަނގަޅު ފުރުޞަތެކެވެ.

މިދިޔަ އޯގަސްޓް މަހު ނެރުނު ރޭންކިންގައި ދުނޔޭގެ އެއްވަނަ މަގާމަށް ނަޑާލް އަރާފައި ވަނީ، 2014 ވަނަ އަހަރުގެ ފަހުން ފުރަތަމަ ފަހަރަށެވެ. އެމުއްދަތުގެ ތެރޭގައި ކަކުލަށާއި، އަތުގެ ކުޑަހުޅަށް ލިބުނު އަނިޔާތަކާ ގުޅިގެން ގިނަ ދުވަސްތަކެއް ވަންދެން ކުޅުމާއި ދުރުގައި ނަޑާލް ހުންނަން ޖެހުނެވެ.

ނަޑާލް ވަނީ މިސީޒަނުގައި 75 މެޗު ކުޅެ، 6 މުބާރާތެއް ކާމިޔާބު ކޮށްފައެވެ.