ފާއިތުވެދިޔަ 15 އަހަރު ތެރޭގައި ރާއްޖެ އެންމެ ބޮޑު ތަފާތަކުން ބަލިވި މެޗަށް ތައްޔާރުވުމަށް ވަގުތު ހޯދަން މަސައްކަތްކުރި ކަމަށާއި، އެކަމަށް އެފްއޭއެމް ރައީސް ބައްސާމް އަދީލް ޖަލީލު އަޅާނުލެއްވި ކަމަށް ގައުމީ ޓީމުގެ ކޯޗު ޑަރެން ސްޓެވާޓް ބުނެފިއެވެ.

މޯލްޑިވްސް ފުޓްބޯލް އަށް ދިން އިންޓަވިއުއެއްގައި ސްޓެވާޓް ބުނީ ރަށުން ބޭރުގައި ފަލަސްތީން އަތުން 1-8 ގެ ލަދުވެތި ނަތީޖާއަކުން ރާއްޖެ ބަލިވި މެޗަށް ތައްޔާރުވުމަށް އެކަށީގެންވާ ވަގުތު ހޯދުމަށް މަސައްކަތްކުރި ކަމަށާއި، އެހެން ނަމަވެސް މެޗާމެދު ހާސްނުވާ ކަމަށް ބައްސާމް ވިދާޅުވިކަމަށެވެ.

"ފަލަސްތީން މެޗަށް ވަގުތު ހޯދުމަށް ބައްސާމް އަރިހުގައި ސުވާލުކުރިން. އަހަރެން އަދި ގައުމީ ޓީމު ކޮމެޓީގެ ޗެއާމަން އަށް ޖަވާބެއް ގޮތުގައި ބައްސާމް ބުނީ ފަލަސްތީން މެޗާމެދު ހާސްނުވާ ކަމަށް" މޯލްޑިވްސް ސޮކާ އަށް ދިން އިންޓަވިއުއެއްގައި ސްޓެވާޓް ބުނިއެވެ.

ސްޓެވާޓް ބުނީ ފަލަސްތީން މެޗަށް އެގައުމަށް ރާއްޖެ ދަތުރުކުރީ 34 ގަޑިއިރުން ކަމަށާއި، އިޒްރޭލް އެއާޕޯޓުގައިވެސް ހަމައެކަނި 8 ގަޑިއިރުވަންދެން މަޑުކުރަން ޖެހުނު ކަމަށެވެ. ފަލަސްތީން އަށް ދެވުނު ދުވަހު މެންދުރު ފަރިތަކުރުންވެސް އޮތްކަން ފާހަގަކުރަމުން ސްޓެވާޓް ބުނީ އެ ދުވަހު ހަވީރު ހަތަރެއް ޖެހިއިރު 45 މިނެޓުގެ ތަމްރީންތަކެއް ކުރިޔަށް ގެންދިޔަކަމަށާއި، އެއަށްފަހު އޭގެ އަނެއް ދުވަހު ރާއްޖެ ނިކުތީ މެޗަށް ކަމަށް ވެސް އޭނާ ވަނީ ބުނެފައެވެ.

ސްޓެވާޓް ބުނީ އޭޝިއަން ކަޕް ކޮލިފައިންގައި ރާއްޖެއާ ވާދަކުރި ޓީމުތަކުގެ ތެރެއިން ފަލަސްތީން އަދި އޮމާން އަކީ ވަރުގަދަ ދެ ޓީމު ކަމަށާއި، އެ ދެޓީމު މެޗުތަކަށް ވަރަށް ރަނގަޅަށް ތައްޔާރުވި ކަމަށެވެ.

އެހެން ނަމަވެސް ސްޓެވާޓް ބުނީ ރާއްޖެއަށް މެޗުތަކަށް ރަނގަޅަށް ތައްޔާރުވާން ފުރުސަތު ނުލިބޭ ކަމަށާއި، އެކަމާ ގުޅިގެން އެއްވެސް ބަޔަކަށް އިނގިލި ދިއްކުރަން ބޭނުންނުވާ ކަމަށެވެ. އެގޮތުން އޭޝިއަން ކަޕަށް ރާއްޖެ ކޮލިފައިނުވުމުގެ ޒިންމާވެސް ފުރިހަމައަށް ނަގާކަމަށް އޭނާ ވަނީ ބުނެފައެވެ.

އޭޝިއަންކަޕަށް ކޮލިފައިނުވި ސަބަބު އެފްއޭއެމްގެ އެކްސްކޯ އިން އޭނާ ކައިރިން ނާހާކަން ފާހަގަކުރަމުން ސްޓެވާޓް ބުނީ ގައުމީ ކޯޗެއްގެ ގޮތުގައި އަހަރެއްހާ ދުވަހު މަސައްކަތްކުރި އިރު އެއްވެސް އެއްޗެއް އެކްސްކޯއިން އަހާފައި ނުވާކަމަށެވެ. އޭނާ ބުނީ ގައުމީ ޓީމު ކޮމެޓީން ފުރުސަތު ލިބޭ ކަމަށާއި، އެ ކޮމެޓީގައި ހިނގާދިޔައީ ކިތައް މިނެޓުކަން ބަލާލުމަށް އެދޭކަމަށެވެ.

ގައުމީ ޓީމު ކުޅުންތެރިންނަށް ތައުރީފް ކުރަމުން ސްޓެވާޓް ބުނީ އެ ކުޅުންތެރިންނަކީ އޭނާގެ 20 އަހަރުގެ ކޯޗިން ކެރިޔަރުގައި ދިމާވި އެންމެ ރަނގަޅު ކުޅުންތެރިން ކަމަށެވެ. އެ ކުޅުންތެރިން ދިވެހި ދިދައަށް ކުރެވެން އޮތް ހުރިހާ މަސައްކަތެއް ކޮއްދިންކަމަށް ވެސް އޭނާ ވަނީ ބުނެފައެވެ.

ގައުމީ ކޯޗުގެ އެއްބަސްވުން އަންނަ ފެބްރުއަރީ މަހު ހަމަވާއިރު، އެ އެއްބަސްވުން އާނުކުރަން އެފްއޭއެމް އިން ވަނީ ނިންމާފައެވެ.