ކޮރަޕްޝަންއާ ދެކޮޅު މަސައްކަތުން ކުރިއެރުން ލިބުނަސް، އަދި އެ މަސައްކަތް ނުނިމޭ: ރައީސް
28 ޖެނުއަރީ 2021 | ބުރާސްފަތި 07:31ސީ.ޕީ.އައި.ގައި ރާއްޖެ އަށް ލިބުނީ 43 ޕޮއިންޓު
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް
ކޮރަޕްޝަންއާ ދެކޮޅަށް ރާއްޖެއިން ކުރާ މަސައްކަތަށް ކުރިއެރުން ލިބި، ހެޔޮ ނަތީޖާތައް ފެނުނަސް އެ މަސައްކަތް ހުއްޓާނުލައްވާނެ ކަމަށާއި އެކަމުގެ ބޮޑުބައި އަދިވެސް އޮތީ ކުރިއަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
ދުނިޔޭގެ ގައުމުތަކުގައި ކޮރަޕްޝަން އޮތް ވަރު ހާމަކޮށްދޭން ޓްރާންސްޕޭރެންސީ އިންޓަނޭޝަނަލް އިން ނެރޭ "ކޮރަޕްޝަން ޕާސެޕްޝަން އިންޑެކްސް" (ސީ.ޕީ.އައި)ގައި ރާއްޖެއިން ވަނީ ބޮޑު ކުރިއެރުމެއް ހޯދާފައެވެެ. އެކަން ފާހަގަކޮށް ކުރެއްވި ޓުވީޓުގައި ރައީސް ވިދާޅުވީ ކޮރަޕްޝަނާ ދެކޮޅަށް ރާއްޖެއިން ކުރާ މަސައްކަތް އެކީ ނިމެން އަދި ގާތް ވެސް ނުވާ ކަމަށެވެ. ނަމަވެސް އެފަދަ ކަމަކާ ދެކޮޅަށް ކުރަމުން އަންނަ ބުރަ މަސައްކަތުގެ ހެޔޮ ނަތީޖާ ފެނުމަކީ ހިތްހަމަޖެހިވަޑައިގަންނަވާ ކަމެއް ކަމުގައި ރައީސް ވިދާޅުވިއެވެ.
ސީ.ޕީ.އައި. ގައި ވާގޮތުން ރާއްޖެއަށް ވަނީ 43 ޕޮއިންޓު ލިބިފައެވެ. އެއީ 2019 ވަނަ އަހަރާ ބަލާއިރު 14 ޕޮއިންޓުގެ ކުރިއެރުމެކެވެ. އަދި 180 ގައުމުގެ ތެރެއިން ރާއްޖެ އޮތީ 75 ވަނައިގައެވެ. އަދި އެއީ ގައުމުތަކުގެ ތަރުތީބުން 55 ދަރަޖައިގެ ކުރިއެރުމެކެވެ.
ސީ.ޕީ.އައި. ގައި ދެކުނު އޭޝިއާގެ ގައުމުތަކުގެ ތެރެއިން ދެވަނައަށް އެންމެ ކޮރަޕްޝަން މަދު ގައުމަކީ ރާއްޖެއެވެ. އެއްވަނައިގައި އޮތީ ބޫޓާންއެވެ. މި ލިސްޓުގެ އެންމެ ކުރީގައި އޮތީ ނިއު ޒިލެންޑާއި ޑެންމާކްއެވެ.
