ޔާމީންގެ މަރުގެ ތަހްގީގަށް އެއްވެސް ކުރިއެރުމެއް ލިބިފައި ނުވާތީ އާއިލާއިން ކަންބޮޑުވުން ފާޅުކޮށްފި
29 އެޕްރީލު 2017 | ހޮނިހިރު 15:55ގާތިލުން ދެނެގަނެވިފައިވާއިރު، މީހުން ނުހޯދޭ
ޔާމީން ރަޝީދު
ތޫނު އެއްޗަކުން ހަމަލާދީ މަރާލި، ސޯޝަލް މީޑިއާ އެކްޓިވިސްޓް ޔާމީން ރަޝީދުގެ ތަހްގީގަށް އެއްވެސް ކުރިއެރުމެއް ލިބިފައި ނުވާތީ އާއިލާއިން ކަންބޮޑުވުން ފާޅުކޮށްފި އެވެ.
ޔާމީންގެ ބައްޕަ، ހުސައިން ރަޝީދު ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ ޔާމިންގެ ޤަތުލަށް އެތައް ދުވަހެއް ފާއިތުވެ ދާއިރުވެސް، އަދި ގާތިލުން ދެނެގަނެވިފައިވާ ކަމަށް ފުލުހުން ހާމަކޮށްފައިވާއިރުވެސް، މައްސަލައިގައި ތުހުމަތުކުރެވޭ އެއްވެސް މީހަކު، ފުލުހުންގެ ބެލުމުގެދަށަށް ނުގެނެވި، ތަޙްޤީޤުގައި އެއްވެސް ކުރިއެރުމެއް ލިބިފައިނުވާ ކަމަށެވެ.
"އަޅުގަނޑުގެ ދަރިފުޅުގެ މަރުގެ މައްސަލައިގައި އިންސާފު ހޯދުމުގެ ކަމާބެހޭ ފަރާތްތަކުން، ޚާއްސަކޮށް ފުލުހުން އެކަށީގެންވާ އަވަސްމިނެއްގައި މަސައްކަތްކުރުމުގެ މުހިންމުކަން މިދަނޑިވަޅުގައި ހަނދުމަފުޅުކޮށް އަރުވަމެވެ،" ބަޔާނުގައިވެ އެވެ.
ބައިނަލްއަޤްވާމީ ތަޖުރިބާކާރުން، ޔާމީންގެ މަރުގެ ތަހްގީގުގައި ބައިވެރިކުރުމަށް މޯލްޑިވްސް ޕޮލިސް ސަރވިސްއާއި، ރައީސުލްޖުމްހޫރިއްޔާގެ އަރިހުގައި ތަކުރާރުކޮށް ދަންނަވާ ކަމަށް ވެސް ބަޔާނުގައި ބުނެފައިވެ އެވެ.
ލަންކާގައި ތިއްބަވާ ބައިނަލްއަޤްވާމީ ފަރާތްތަކަށް ޔާމީންގެ އާއިލާގެ ފަރާތުން ވަނީ މައުލޫމާތު ދީފަ އެވެ.
