ގައުމީ ފެރީ ވިއުގައިގެ ސަބަބުން ރައްޔިތުންނަށް އެތައް ގޮތަކުން ފައިދާވާނެ – ދަތުރުފަތުރާބެހޭ ވަޒީރު ނަހުލާ
17 ޖެނުއަރީ 2021 | އާދީއްތަ 06:50މި ހައި ސްޕީޑް ފެރީގެ ޚިދުމަތް ރޭވިފައިވަނީ ސިއްހީ ޚިދުމަތް ހޯދުމަށާއި، އަދި އެހެނިހެން ޚިދުމަތް ހޯދުމަށް ރަށްތަކަށް ދަތުރުކުރާ ފަރާތްތަކަށް ފަސޭހަވާނެ ގޮތްތަކަށް
ދަތުރުފަތުރާބެހޭ ވަޒީރު އާއިޝަތު ނަހުލާ
ގައުމީ ފެރީ ވިއުގައިގެ ސަބަބުން ރައްޔިތުންނަށް އެތައް ގޮތަކުން ފައިދާ ކުރާނެ ކަމަށް ދަތުރުފަތުރާބެހޭ ވަޒީރު އާއިޝަތު ނަހުލާ ވިދާޅުވެއްޖެއެވެ.
ގައުމީ ފެރީ ވިއުގައިގެ ޚިދުމަތް އިފްތިތާޙުކޮށް، މި މަޝްރޫޢު އެމްޓީސީސީއާ ހަވާލުކުރުމަށް ދިވެހިރާއްޖޭގެ އަޑުގެ ސެނެކޯ މާލަމުގައި ބޭއްވުނު ރަސްމިއްޔާތުގައި ވާހަކަ ދައްކަވަމުން ނަހުލާ ވިދާޅުވީ މިއީ މި ސަރުކާރުގެ އެންމެ މުހިންމު ވަޢުދުތަކުގެ ތެރޭގައި ހިމެނޭ ވަޢުދެއް ކަމަށާއި، މި މަޝްރޫޢަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވަރަށް އިސްކަން ދެއްވާ މަޝްރޫޢުއެއް ކަމަށެވެ. އަދި މި މަޝްރޫޢުއާއެކު، ފެންވަރު ރަނގަޅު ދަތުރުފަތުރުގެ ނިޒާމަކުން މުޅި ރާއްޖެ ގުޅާލުމަށް ސަރުކާރުންވި ވަޢުދު ފުދިގެންދާނެ ކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ މި ހައި ސްޕީޑް ފެރީގެ ޚިދުމަތް ރޭވިފައިވަނީ ސިއްހީ ޚިދުމަތް ހޯދުމަށާއި، އަދި އެހެނިހެން ޚިދުމަތް ހޯދުމަށް ރަށްތަކަށް ދަތުރުކުރާ ފަރާތްތަކަށް ފަސޭހަވާނެ ގޮތްތަކަށް ބެލުމަށްފަހު ކަމަށެވެ. އަދި މި މަޝްރޫޢު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާ ހަވާލުކުރީ ހުއްޓުމެއް ނެތި މި ޚިދުމަތް ދިނުމުގެ ބޭނުމުގައި ކަމަށް ނަހުލާ ވިދާޅުވިއެވެ.
އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކްއަކީ މުޅި ރާއްޖެއަށް އަމާޒުކޮށް ފަސިންޖަރުން އަދި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕޭޝަލް ޕްލޭން ގައި ހިމެނޭ 3 ޒޯންއާއި 6 ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯކްއިން 6 ރީޖަންގައި އެކުލެވޭ ހުރިހާ ރަށްތަކެއް ގުޅުވައިލެވޭއިރު، އެއް ރީޖަން އަނެއް ރީޖަންއާ ވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވައިލެވިގެންދާނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް،" "ނަން-ކޮމިއުޓް ލިންކް،" އަދި "ހައިވޭ ލިންކް" މެދުވެރިކޮށެވެ.
