ސ. މަރަދޫފޭދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އިބްރާހީމް ނަފީސް ހުސައިންގެ ސުލޫކީ މައްސަލައެއް ބަލަމުންދާކަމަށް ޖުޑީޝަލް ސަރވިސް ކޮމިޝަން (ޖޭއެސްސީ)ން ބުނެފިއެވެ.
ހޯމަ ދުވަހު ޖޭއެސްސީން ބުނީ، މަރަދޫފޭދޫ މެޖިސްޓްރޭޓް ކޯޓުގައި ކުރިއަށްދިޔަ ޤަޟިއްޔާއެއްގައި ދައުވާ ލިބުނު ފަރާތަށް ގާނޫނީ ވަކީލަކު އައްޔަންކުރުމުގެ ފުރުސަތު އެ ޤަޟިއްޔާގެ ބެއްލެވި އެ ކޯޓުގެ އިސްމެޖިސްޓްރޭޓް ނަފީސް ނުދެއްވި ކަމަށްބުނެ އެކޮމިޝަނަށް ހުށަހެޅިފައިވާ މައްސަލައެއް ބަލަމުންދާކަމަށެވެ.
ޖޭއެސްސީން ބުނީ، އެމައްސަލަ ބެލުމާމެދު ގޮތެއް ނިންމާ ކޮމެޓީން، އިސްމެޖިސްޓްރޭޓް ނަފީސްގެ ސުލޫކީ މައްސަލަ ތަހުގީގު ކުރުމަށް އެ ކޮމެޓީން ނިންމާފައިވާތީ، އެ މައްސަލަ ތަހުގީގުކުރުމަށް ތަހުގީގު ކޮމެޓީއެއް އެކުލަވާލާފައިވާ ކަމަށެެވެ.
ޖޭއެސްސީއަކީ ގާނޫނުއަސާސީގެ ދަށުން ފަނޑިޔާރުންގެ ސުލޫކީ މައްސަލަތައް ބެލުމާއި އަދި ޝަރުއީ ކޯޓުތަކުގެ ހިންގުން ހަރުދަނާ ކުރުމުގެ ގާނޫނީ ޒިންމާ އޮންނަ އެންމެ މުހިއްމު އެއް މުއައްސަސާއެވެ.
ފަނޑިޔާރުންގެ ސުލޫކީ މައްސަލަތައް ގިނަ އަދަދަކަށް ޖޭއެސްސީއަށް ހުށަހެޅި ބަލަމުންދާއިރު، ބޮޑެތި ގިނަ މައްސަލަތަކުގެ ތުހުމަތު ކުރެވުނު ބައެއް ފަނޑިޔާރުން ވަނީ ފަނޑިޔާރު ކަމުގެ މަގާމުން ވަކިކުރަން ރައްޔިތުންގެ މަޖިލީހަށް ހުށަހެޅުމަށް ޖޭއެސްސީން ނިންމުމާއެެކު ފަނޑިޔާރުކަމުގެ މަގާމުން އިސްތިއުފާ ދެއްވާފައެވެ.
