ޕީޕީއެމްގެ ސުލޫކީ ކޮމެޓީއަށް ހާޒިރުވާން ޗިޓް ލިބިއްޖެ، ކޮމެޓީއަށްދާނަން: އަމީތު

ޕީޕީއެމްގެ ސުލޫކީ ކޮމެޓީއަށް ހާޒިރުވުމަށް ޗިޓް ލިބިވަޑައިގެންފިކަމަށާއި، ކޮމެޓީއަށް ހާޒިރުވެ ޖަވާބުދާރީވެވަޑައިގަންނަވާނެކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވެއްޖެ އެވެ.

ޕީޕީއެމް ޕާލިމެންޓްރީ ގުރޫޕަށް ނިސްބަތްވެވަޑައިގަންނަވާ މަޑުއްވަރީ ދާއިރާގެ މެމްބަރު މުހައްމަދު އަމީތު ވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމަށް ވޯޓުދެއްވާނެކަމަށް ވިދާޅުވެފަ އެވެ. އަދި ރައްޔިތުންގެ މަޖިލީހުގެ ރައީސްގެ އިތުބާރުނެތްކަމަށް ވޯޓަށް އެހިވަގުތު، އަމީތުވެސް ވަނީ މަޖިލީހުގެ ޗެމްބަރު ދޫކުރައްވާ ގުޅިފައިވާ ސިޔާސީ ޕާޓީތަކުގެ މެމްބަރުންނާއެކު ބޭރަށް ނިކުމެވަޑައިގެންފަ އެވެ.

އެ މައްސަލާގައި ޕީޕީއެމް ޕާލިމެންޓްރީ ގުރޫޕުގެ ލީޑަރު އަހުމަދު ނިހާން ހުސެއިން މަނިކު ވިދާޅުވީ، އަމީތުވެސް ޕިޔަވަޅު އަޅައި، ޕާޓީން ބޭރުކޮށްލައްވާނެ ކަމަށެވެ. އަދި އެކަމުގެ މަސައްކަތް ޕާޓީގެ ތެރެއިން ފައްޓަވާނެ ކަމަށް ނިހާން ވިދާޅުވެފައިވެއެވެ.

ނިހާން އެފަދައިން ވިދާޅުފައިވަނިކޮށް، އަމީތު ކުރެއްވި ޓުވީޓެއްގައި ވިދާޅުވީ ޕީޕީއެމްގެ ރައީސް އަބްދުﷲ ޔާމީން ފެކްޝަންގެ ސުލުކީ ކޮމެޓީއަށް ހާޒިރުވުމުގެ ޗިޓް ލިބިވަޑައިގެންފައިވާ ކަމަށެވެ. ކޮމެޓީއަށް ހާޒިރުވެ ޖަވާބުދާރީވެވަޑައިގަންނަވާނެކަމަށް އަމީތު ވިދާޅުވި އެވެ. އޭނާ ވިދާޅުވީ، ހައްޤުގެ މަގުގައި ސާބިތުވެ ހުންނަވާނެ ކަމަށެވެ.

ފަހަރަކު މެމްބަރަކު ޕީޕީއެމް ޕާލިމެންޓްރީ ގުރޫޕުން ބޭރުވެ، 18 ވަނަ ރައްޔިތުންގެ މަޖިލީސް ފެށުނުއިރު، ޕީޕީއެމްގެ ޕާލިމެންޓްރީ ގުރޫޕަށް ލިބިފައިވާ ބިޔަ މެޖޯރިޓީ ވަނީ ވަރަށް ބޮޑަށް ކުޑަވެފަ އެވެ. އެގޮތުން ސަރުކާރަށް ތާއީދުކުރާ ހުރިހާ މެމްބަރުން ހަމަކޮށް، މަޖުބޫރީ ހާލަތްތަކާއެކުގައި އެއްކުރެވިފައިވަނީ އެންމެ 48 ވޯޓް އެވެ. އެއީ އެމްޑީއޭގެ މެމްބަރުންވެސް ހިމެނޭގޮތަށެވެ. މީގެކުރިން ސަރުކަރުން ބޮޑެތި ވޯޓުތަކުގައި 56 ވޯޓްވަރު ނަގަމުންގެންދޭއެވެ.