އިންސްޓަގްރާމްގައި ކުރި ޕޯސްޓެއްގެ މައްސަލައިގައި މެންޗެސްޓާ ޔުނައިޓެޑަށް ކުޅެމުން އަންނަ އުރުގުއޭގެ ފޯވާޑް އެޑިންސަން ކަވާނީ ތިން މެޗަށް ސަސްޕެންޑް ކުރަން ނިންމުމުން އުރުގުއޭގެ ކުޅުންތެރިންގެ ޔޫނިއަނުން އިނގިރޭސި އެފްއޭއަށް ފާޑުކިޔައިފިއެވެ.

އިނގިރޭސި ޕްރިމިއާ ލީގުގައި މިދިޔަ އަހަރުގެ ނޮވްމެބަރު މަހުގެ 29 ވަނަ ދުވަހު ސައުތެމްޓަން އަތުން ފަހަތުން އަރައި 3-2 ން ޔުނައިޓެޑް މޮޅުވީ ބަދަލު ކުޅުންތެރިއެއްގެ ގޮތުގައި ކުޅެން އެރި ކަވާނީގެ އެހީއާއެކުއެވެ. އެގޮތުން އެ ޓީމުގެ ފުރަތަމަ ލަނޑު ޖެހުމުގައި ކަވާނީ އެހީވިއިރު، އަނެއް ދެ ލަނޑު ޖަހާ މެޗުން ޔުނައިޓެޑް މޮޅުކޮށްދިނީ ކަވާނީއެވެ.

އެ މެޗަށްފަހު ސަޕޯޓަރުން މަރުހަބާ ކިޔުމަށް ކުރި ޕޯސްޓެއް ހިއްސާކުރުމަށްފަހު ކަވާނީ ވަނީ ސްޕެނިޝް ބަހުން ނަސްލީ ތަފާތު ކުރުމަށް ބާރުއަޅާ އިބާރާތެއް ބޭނުންކޮށްފައެވެ. އެގޮތުން އޭނާ ވަނީ އެ ޕޯސްޓުގައި "ކަޅު ކުޑަ މީހެއް" މި ލަފުޒު ބޭނުންކޮށްފައެވެ. އެކަމަކު އެ ޕޯސްޓާއެކު ފާޑުކިޔުން އަމާޒުވުމާ ގުޅިގެން ކަވާނީ ވަނީ އެ ޕޯސްޓް ފަހުން ޑިލީޓް ކޮށްލާފައެވެ.

އެއާއެކު އުމުރުން 33 އަހަރުގެ ކަވާނީ މާފަށް އެދުނު ނަމަވެސް، އެ މައްސަލައިގައި އިނގިރޭސި އެފްއޭއިން ވަނީ ކަވާނީ ތިން މެޗަށް ސަސްޕެންޑް ކުރުމުގެ އިތުރުން 100،000 ޕައުންޑުން އޭނާ ޖޫރިމަނާކުރަންވެސް ނިންމާފައެވެ.

މި މައްސަލައިގައި އުރުގުއޭގެ ކުޅުންތެރިންގެ ޔޫނިއަން (އޭއެފްޔޫ) އިން ނެރުނު ބަޔާނެއްގައި ބުނެފައިވަނީ ކަވާނީ އެ އިބާރާތް ބޭނުންކުރީ އޭނާގެ ގާތް އެކުވެރިޔަކާ ދިމާލަށް ކަމަށާއި، އެ ބަސް ބޭނުންކުރުމަށްފަހު ކަވާނީ މާފަށް އެދުމުންވެސް އަދަަބުދިނުމަށް އިނގިރޭސި އެފްއޭއިން ނިންމުމުން އެނގެނީ އިނގިރޭސި އެފްއޭ އަކީވެސް ނަސްލީގޮތުން ތަފާތުކުރާ ބައެއް ކަމަށެވެ.

މީގެ ކުރިން މި މައްސަލައިގައި ކަވާނީ އާއި ޔުނައިޓެޑުންވެސް ވަނީ ބަޔާނެއް ނެރެފައެވެ. އެގޮތުން މި މައްސަލައިގައި ކަވާނީ ނެރުނު ބަޔާނެއްގައި ބުނެފައިވަނީ އޭނާ ކުރި ޕޯސްޓުގައި އެ ލަފުޒު ބޭނުންކުރީ އޭނާގެ ރަހުމަތްތެރިއަކާ ދިމާލަށް ކަމަށާއި، އެއީ ސަމާސާއެއްގެ ގޮތުގައި ކުރިކަމެއް ކަމަށެވެ. އަދި އޭނާ ބޭނުންކުރި އިބާރާތަކީ މައްސަލައެއްގެ ގޮތުގައި ފާހަގަވުމާއެކު އެ ޑިލީޓް ކޮށް، އެކަމަށް މާފަށް އެދޭ ކަމަށްވެސް ވަނީ ބުނެފައެވެ. އަދި ޔުނައިޓެޑުން ނެރުނު ބަޔާނުގައި ބުނެފައިވަނީ އެ ޕޯސްޓް ގޯސްކަން އެނގުނު ހިސާބުން ކަވާނީ އެ ޑިލީޓް ކުރި ކަމަށާއި، އެއީ އޭނާ ގަސްދުގައި ނަސްލީ ތަފާތުކުރުމަށް ބާރުއަޅަން ކުރިކަމެއް ނޫން ކަމަށެވެ.

ކަވާނީ ތިން މެޗަށް ސަސްޕެންޑް ކުރުމާއެކު ޕްރިމިއާ ލީގުގައި މިދިޔަ ހުކުރު ދުވަހުގެރޭ ޔުނައިޓެޑުން އަމިއްލަ ދަނޑުގައި އެސްޓަން ވިލާ އަތުން 2-1 ން މޮޅުވި މެޗު އޭނާއަށް ވަނީ ގެއްލިފައެވެ. އަދި މި ހަފުތާގައި އިނގިރޭސި ލީގު ކަޕުގެ ސެމީފައިނަލުގައި މެންޗެސްޓާ ސިޓީއާ ދެކޮޅަށް ކުޅޭ މެޗާއި އެފްއޭ ކަޕުގައި ވަޓްފޯޑާ ދެކޮޅަށް ކުޅޭ މެޗު ކަވާނީއަށް ގެއްލޭނެއެވެ.